Read Thado Chin Isaiah 25 Bible Online

Isaiah 25 - Thado Chin bible

Isaiah 25

¹Vo Pakai, nangma ka Pathen nahin, nangma choi-an ningting, namin vahchoi jinge; ajehchu nangin datmo um thilho nabolin; malaija nathumop ho chu tahsan umle thudih ahi.

²Ajehchu khopijong leivui nasosah-in, hoidohna khopi chu nasumangin, khopi umlouna dinga gamdang mite leng in-piho chu nasusen, hichu kisadohkit louhel ding ahitai.

³Hijeh chun mihatten nangma loupisah-un natin, tijat um namtin vaipiho khopi'n nagindiu ahi.

⁴Ajehchu nangma vaichate din thahatna nahin, alhasamte hesoh laija thahatna nahin, khopihui hatlaija belding nahin, nisa noija lim nahin, khopihuijin kulbang anuh tobangkhu nahije.

⁵Gamdang miteho husa chu mun go laija nisa sat banga nasuhnem ding; meilhang lima asa jengjong chu nasuhnem ding ahi. Kichat umtah abahho chu kisunem ding ahi.

⁶Hiche molsanga hi janel Pakaiyin, lengpituichih-a mijouse golvah, thil thaova golvah, thil thao lhintwi dimsetna, lengpitwi chih kilhithengsella golvah abolding ahi.

⁷Aman hiche molsang hi namtin jouse chunga kikhukhum maikhule, namtin jouse chunga kidah ponlukhuh chu asuhmang ding ahitai.

⁸ Aman thina chu jona-a aval lhuma; chule Pakai Pathen'in mai jouse-a kona mitlhiho atheh hulding, chule leiset pumpi jouse-a kona amite kiphona alahmang ding ahi: ajehchu Pakaiyin hichehi asei ahi.

⁹Chule hiche nikho chule hitia kisei ding ahi. Veuvin, hichehi i-Pathen'u eihon ingao, eihuhhing dinguva amahi ahi. Hichehi eihon ina ngajingu Pakai chu ahi. Ami huhhing na-a eiho ikipaova itha nopdiu ahitai.

¹⁰Ajehchu Pakai khutchu hiche lhanga hi kingama, changpol eh-molla kon akilholhah banga, ama noija Moab chu chotbeh-a umding ahitai.

¹¹Twijap pan twijapna dinga akhut ajah banga, aman alah uva akhut ajahding ahi. Chule aman akiletsah naochu akhutnuva achomdoh houtoh asotlhahtha ding ahi.

¹²Chule akulpidet kulbang sangho chu asuhnempeh-a akoinema, tolgeija, leivui changeija asotlhah ding ahi.