Read Thado Chin Isaiah 26 Bible Online

Isaiah 26 - Thado Chin bible

Isaiah 26

¹ Chuche nikho tengchule hiche la hi Judah gamma kisading ahi; keihon khopi dettah khat kaneijun; Pathen'in huhhingna chu kulbanghole kulpiho dinga agetding ahi.

²Nam chonphate, thutah nit mite alut theina dingun, nanghon kotpi chu hong lennun.

³Nachunga alungthim chensah chu chamna kimkeija navet tupding ahi. Ajehchu aman nangma natahsanin ahi.

⁴Nanghon Pakai chu a-imatih chanin tahsanun. Ajehchu Pakai Jehovah'a chu tonsot thahatna chu uma ahi.

⁵Ajehchu sangtah-a chengho chu aman ahinpolhan; khopi sangtah chu akoinemin, tol geija akoinemtai; aman leivui geijin ahinpolhai.

⁶Mivaichate kenghole, lhasamte kalsonho, ngeichu akenga achotbeh ding ahi.

⁷Michonpha te lampi chu kitahna ahin, nang, lungdihpen chun mikitah lampi chu naleptohjin ahi.

⁸Ahi, nathutanlhahna lampia chun, vo Pakai, nangma kangah jingui; kahinnaovin alha ngaipen chu namin le nangma geldohjing ding ahi.

⁹Janteng kahinna-in nalhangaijin ahi. Ahi, kasunga um lhagao chun jingkah matah-in nangma nahol inge. Ajehchu nathutanlhahnaho leija aumteng, vannoi'a chengten chonphatna chu kijil unte.

¹⁰Migilou khohsahna musah jengle chun chonphatna kimudoh dehponte; lungdihna gama chun aman dihlou tah-in thilbol'intin Pakai lalna chu mudohponte.

¹¹Pakai, nakhut nadopsang tengle amahon mupouvinnate. Ahinla mihochunga athangset jeh-un mudoh untin; jahchadiu ahi. Ahi, namelmate meichun amaho akahlih gamdiu ahi.

¹²Pakai, nangman keiho dinga chamna neisuhdet peh dingu ahi. Ajehchu nangman kanatoh jouseu jong neitohpeh taove.

¹³Vo Pakai, ka Pathen'u nang hilou pakai danghon kachunguva vai ahomtai.

¹⁴Amaho athi ahiuvin, hing loudiu ahiuve: Amaho athi ahiuvin, thou talou ding ahiuve. Hijeh chun nangin amaho navilin, nasumangin, ahettheinao jouse jong naman sah-in ahi.

¹⁵Hiche nam mite chu napunsah-in; O Pakai, nangman hiche nam mite chu napunsah tan; Nangma choi-atnin na-umtai; Nangin hichu gamlatah leiset kolmang geijin nakithan sahtai.

¹⁶Pakai, lungkhamin amahon nangma naholun, nagimbolna achunguva aumteng hatah-in ataovun ahi.

¹⁷Nupi naovop asophat ahung naija, anatna nachoi choija ahung pendoh bangin; Vo Pakai, nangma mitmun chutobang chu kanahiuve.

¹⁸Keihon nao kavopmun, kana-uvin, hui lhohdohle kabangui, leijahin huhhingnadol ima kabolpouvin; vannoi'a cheng hojong lhujong alhupouve.

¹⁹ Namithiho chu kamithilong toh thoudoh uva, hing khomdiu ahi. Leivuija cheng nangho thou vunlang la saovin. Ajehchu nadaitwi chu hampa louhingho daitwi bang ahin, leijin mithiho chu ahinledoh ding ahi.

²⁰Hungun kamite, na-indan sunguva lutnun lang, nakotnu kikha khum uvin; lungnat natah akichai kah-in, chomkhat tobang kiselmang uvin.

²¹Ajehchu veuvin, leisetna chengte akhansetnao jeh-a talen pedingin Pakai chu aumna mun'a konin ahung potdoh tai. Leisetnin jong athisan chu asellou ding ahin; chule amithiho jong akhutah louding ahi.