Read Thado Chin Isaiah 27 Bible Online

Isaiah 27 - Thado Chin bible

Isaiah 27

¹ Hiche nikho chule Pakaiyin achemjam hemtah lentahle lhoutah-a chu leviathan gul ngongle leviathan gul kiveikol ngeng nung chu talen apeh-a; chule twikhanglen'a um dragon chu athading ahi.

²Hiche nikho chule; lengpitwi san lengpilei, amanu henga la saovin.

³Pakai kiti keimahi, tuhdetpa kahin; phat tinin twichapminge, achutiloule min sukhante, tia sunle jana kavettupding ahi.

⁴Keija lungsatna aumpoi, galla eidou dinga koijin lingle khao chu akoiding ham? Keima alah uva kache-a, kahalchap ding ahi.

⁵Ahiloule eikichampi theina dingin, kahatnahin kivonhen, chutile eikichampi ding ahi.

⁶Aman Jacob mite ahungho chu ajung khosah ding ahin; Israelte mum doh-a pahlhading, chule leiset chunghi aga dimset ding;

⁷Ama jepho ajep bangtah a chu avoh hitam? Ahiloule ama thatte kitha banga chu amachu kithatna hitam?

⁸Solam hui anun banga, nangman amanu chu nalungsat na-a nanodoh-a, chule gal le sohchan na-a naumsah ding ahi

⁹Hijeh chun hiche hin Jacob khansetna chu asop ngima, hichehi achonset lahmangna ding chu ahin, ngunsong kivochip jengjung banga maicham songho abol tengle thingbong hole, milimho dingdoh talou ding ahi.

¹⁰Kulpi kikhokhum khopi jongchu kamhel intin, chenna munchu kidalha-a gamthip banga umding; chua bongnou kivah-a, chua chu kolding, hichea thingbaho chu anehjou ding ahi.

¹¹Abahho chu agot tengle mangthah intin, numei ho hunga meija atidiu ahi. Ajehchu hetkhen themna neilou mite ahijeh-un, asempao chun achunguva hepina aneilouding, agongdoh paovin khohsahna amusah louhel ding ahi.

¹²Chule hiche nikho chule hitiding ahi: Pakaiyin vadunglen kama pat Egypt vachadung geijin long'intin, chule vo Israel chate nangho khat khatna naki khopdiu ahi.

¹³Chule hiche nikho chule hitiding ahi: Sumkon lentah chu hung kimut intin, Assyria gama mangthah dehdeh hole, Egypt gama akinodohho chu hunguva, Jerusalem lhangthenga Pakai chu ahoudiu ahi.