Read Thado Chin Isaiah 28 Bible Online

Isaiah 28 - Thado Chin bible

Isaiah 28

¹Ohe Ephraim, jukhamho hoithona lallukhuh chu ada ahi! Ahoina loupi chu pahcha pultheibou ahin, hichu phaicham gampha ho-a anemsesa ho luchung chu ahi.

²Vetan, Pakaiyin thahat le hat chungnung khat aneijin, hichu huile gelin, thil sumangthei khopihui tobang, twilen nasatah let thethu banga akhutna tolla aselhah ding ahi.

³Ephraim jukhamho hoithona lallukhuh chu kengtonoija kilhobeh ding ahiuve.

⁴Chule damphai, amel hoina loupitah chu pahcha pullha hung hintin, nipi masanga theiga masa pulbang hiding; hichu avepan amua akhutna um nalaija anehjoupai tobang ahi.

⁵Hiche nikho chule janel Pakai chu loupina lallukhuh le, amite amoh umcha sun dinga hoina lallukhuh-a hungpang ding ahi.

⁶Chule thutanlhahna-a toupa dinga thutanna lhagao le, kotpi phunga gal lenokit ho dinga thahatna hungpang ahi.

⁷Ahinla amahon jong ju-a konin jong setna aneijun; jukhama konin lampama apetnun, thempuho le themgao hon ju-a konin setna aneijun; jukhama konin lampan apetnun amaho athilmuhouva aseuvin, amaho thutan na-a akipaluve.

⁸Ajehchu dokhang jouse chu loh le thilboh adimin; hitichun muntheng aumtapoi.

⁹Koichun hetna ahila, koichun tahsan lhongpi ahetkhensah dingham? Noichep banghole noija kona kiloidohho chu ahiuve.

¹⁰Ajehchu chondan chunga chu chondan, umtei ding, chondan chunga chodan, thugol chunga thugol, thugol chunga thugol; hia themkhat khu-a themkhat.

¹¹ Ajehchu hiche mite hengahi aman kam-oh le paochoma thu aseiding ahi.

¹²Aman ahenguva, hichehi thachol te nakicholdo sah theinao choldona chu ahin, hichehi kilha jangna ahi. Amahonla angaisahdeh pouve, ati.

¹³Ahinla amaho henga Pakai thu vangchu; chondan chunga chondan, chondan chunga chondan; thugol chunga thugol, thugol chunga thugol; chule hia themkhat, khu-a themkhat, amaho cheova nunglhuh uva, chule mangthah diu, thanga oh-uva akimatdoh theinadiu ahi.

¹⁴Hichejeh chun nangho nahsalou mite, Jerusalem'a chengho chunga vaihomten Pakai thuchu ngaijun.

¹⁵Ajehchu nanghon thina toh kitepna kasemun, thikholkhul toh kitepna kaneitaovin; kivohna twipi alonlet teng jongle kahengu ahinphah tahlou dingu ahi. Ajehchu keihon jouthu beldingin kamangun, jouthun kakisel uve nati uve.

¹⁶ Hijeh chun Pakai Pathen'in hitin ati, veuvin keiman Zion'a inbul songkhat patepna song, manlutah in-ning song, inbulphu tahbeh khat kakoije, atahsanchan chu kicha louding ahi, ati.

¹⁷Thutandih chu gol kaina-a kaman ding, chonphatna chu thil vettohna-a kaman ding ahi. Gellin jouthu umna mun chu alhohmang ding, kiselna ding munchu twijin achup mangding ahi.

¹⁸Chule thina toh nakitepnao chu kisubeija, thikholkhul toh nakinopto nao chu dinglou ding ahi; vohna twipi alonlet tengle hiche chun nachotpeh dingu ahi.

¹⁹Hichu ahung kitola patna, hiche chun nalah khah jing dingu ahi. Ajehchu jingkahsim jingkah seh-a; asun ajanna hung kitolding; thulhut hetkhen dingchu kisuh boina bou hiding ahitai.

²⁰Ajehchu jalkhun chu mikhat kilhon nathei sangin achomjon; akichuna jongchu ama kijelnathei sanga neojo ahi.

²¹ Ajehchu aman anatoh kidangchu atohthei nadingle, athilbol kidangchu amolso theina dinga; Pakai chu Perazim molsang banga hungthouva, Gibeon phaija banga chu lunghang ding ahi.

²²Hijeh chun tun nelpeh hat ho chu hidaovin, nakihen nao lhoucheh sah getninte, ajehchu janel Pakai Pathen'a konin, leiset pumpi geija suhmang nading kigong chu kajatan ahi.

²³Nana sung unlang, ka aw ngaijun; ngaijunlang, kathusei jaovin.

²⁴Muchi thena dinga loukaipan nilhum keija akai hinam? Aman aleilhangho akaldoh-a avohngem hinam?

²⁵Aman atol alaicham tengle lengmusel le Pathikhom athehih-a, sakol changpi le suhlouchangpi, chule butun jong amuncheh-a athe hilou ham?

²⁶Ajehchu a-Pathen'in ama ahila, gellhuh theinadia amachu ahilchah ahi.

²⁷Ajehchu lengmusel ho chu changmola kivo ngailou; pathikhom chunga chu kangtalai kang kitang jilou ahi. Ahinla lengmusel chu tenggola chule pathikhom chu moltuma bou kivoji ahi.

²⁸Changlhah ding changchu akisubongjin; ajehchu a-itih-a vohtho louding, akangtalai kanga jong kitangkeh louding, asakol chungtouho jong asuh bongsah deh louding ahi.

²⁹Hiche jonghi thumopthem kidangtah; thilbol lama nasapenpa janel Pakaiya hung kondoh ahi.