Read Thado Chin Isaiah 29 Bible Online

Isaiah 29 - Thado Chin bible

Isaiah 29

¹Ohe Ariel, Ariel,[3] David chenna khopi nada ahi! Akum kum-in belap unlang, ganlhaina sa thasah uvin.

²Ariel chu kabolgentheija, chua gihsalnale lungdonna umding ahin, chule hichu keija dinga Ariel tobanga hiding ahi.

³Chule nangma dounan nakimvela ngahmun sangting, galkul sangtah kakaikhuma, kulpiho kakhokhum ding nahi.

⁴Chutia chu kisulha ding nahin, tolla kona nahung paodoh-a nathusei chu leivuija konin olcha gingding, na aw chu tolla kona thilhavop khat aw bang hintin, nathusei chu leivuija kona aw thopma gingdoh dingbou ahi.

⁵Chukalvalin nagamchom mipi ho chu leivui sipahbep hintin, tijat umtah mipite chu changsi lengmang bangbep hintin: henge, gangta-a chutiphung ding ahi.

⁶Janel Pakaiyin van ginna, chule inlingle husa kithong, hui le go chule khopihuija, chule kavam helthei meikonga nahungvil ding ahi.

⁷Chule Ariel douna-a galsat namjouse-a kon mipi ho, amale agal manchah sat ho jouse, chule abolgenthei jouse geija janmang bangbep hiding ahiuve.

⁸Chule mi gilkelin mang aneija, chule veuvin, amanga chu an aneh-a, ahivanga akhahdoh phatna la vachom dehlou: ahiloule midangchah in mang aneiteng vetan twi ana donna, ahivanga akhahdoh phatna la ngoideh jeng, asunga adangchah abangbep ahijing jeng banga: Zion lhang douna-a galsat namjouse mipi chu chutobangbep hiding ahiuve.

⁹Nanghotah khongai unlang, datmouvin; kapmun lang, pengdoh uvin; amaho akhamun, ju-a konvang ahipouve; alon lele uvin khamnatheija konvang ahipoi.

¹⁰ Ajehchu Pakaiyin nachung uva imutsetna lhagao abuhlhah-a, namitnu asinsah ahitai. Themgaoho le navaipo hou, mitvah neiho akhuchahtan ahi.

¹¹Chule nanghodin mu neijousehi lekhabua thuchengho kisinkha khum tobang ahung hitan, hichu lekhathem khat henga kichoija; hichehi simin, tia nahenga katao ahi: Chule aman akisinkha jeh-in kasimtheipoi, ati tobang ahitai.

¹²Chuin lekhabu chu athemlou khat akipen, katao ahi, hichehi simtemin atile, aman keima kathempoi, atin ahi.

¹³ Hijeh chun Pakaiyin aseije: hiche mite hin akamuvin einaijun, amuh uvah eijabollun, ahinla alungu vang keija kona gamlatah ahin, keima eiginu jong mihem chondan thuhila konbou ahi, ati.

¹⁴ Hijeh chun ven, hiche mite lah-a hi thilbol kidangtah, thilbol kidangle datmo umtah jong kasodoh ding ahi. Ajehchu amichingteu chihna chu mangthah ding, chule ahegilho hetnachu kiselding ahitai.

¹⁵Pakaiya kona selding giltah-a holtechu ohe adau ahi. Anatoh-u chu muthim lah ahin, kon eimuvem? kon eihetnum? atiuvin ahi.

¹⁶ Tahbeh-in thil akhup athala naleu chu beldengpa khutna hahlei banga naki ngaitou ahi. Ajehchu athilsem chun asempa chu aman eisem hibeh am? atia ahiloule thil gontohsa chun agongtohpa chu aman hetkhenna aneipoi atiji em?

¹⁷Lebanon chu leiphatah sosah-a aumdingle, leiphatah chu gammang banga akigelding chu chom chakhat kahbou hung hitalou dingham?

¹⁸Hiche nikho chule na-ngongin lekhabua thuchu ajah-a, mitcho ho mitnin khojinle muthim lah-a kona jong amudiu ahi.

¹⁹Minunnemho jong Pakaiya halna-a akipanao pungding, milah a mivaichate jong Israel mithengpa-a kipahdiu ahitai.

²⁰Ajehchu gin umtah khatchu imalou akisotan, mi i-sah loupa chu akisutanin, khan-gitlouna velhi jingho chu akisubeitan ahi.

²¹Hicheho chun thu cheng khatnin mi akipalsahjin, kotpi phunga phosal achan nadin thang akampehjin, midihtah chu ima hilouhela koijin aumtan ahi.

²²Hijeh chun hitihin Jacob insung thudolla Abraham lhatdoh-a Pakai chun aseitai, tu-a Jacob jahcha talou ding, amaijong dang talou ding ahi, ati.

²³Ahinla achate kakhutsohho chu alah-a amutengle, kamin thensah-un tin, Jacob'a mithengpa chu athen sah uva, Israel Pathen chu agindiu ahitai.

²⁴Lhagaova suhkhel neihon jong ahin hetkhen themuva, aphunchel ho jong tahsan lhongpi kihildiu ahi.