Read Thado Chin Isaiah 3 Bible Online

Isaiah 3 - Thado Chin bible

Isaiah 3

¹Ijeh-inem itile, veuvin, Pakai janel Pakai chun, Jerusalem'a konle Judah a konin, anehnao lampile adonnao lampi jouse aladohsoh heltai.

²Mihatpa le gal hatpa thutanpa le themgao, milungching le upapa ahin,

³mi somnga kaihoipa le mija umpa, thumopthempa le khutthempa, chule kamthem mitpheldoi thempa ahiuve.

⁴Chule keiman chapangho chu apipuiho diuva kapeh ding, naosen hon achunguva vai ahomdiu ahi.

⁵Chule mipichu suhgentheija umding, amitakip chu midangin chule amitakip aheng akomin asuhgenthei ding; Chapang chu upa chunga chule pannabei michu ja-umtah chunga kiletsah tah-a umding ahi.

⁶Min apa insungmi asopi khat atuh-a, nangin ponsil naneijin, kavaihom-un panginlang hiche amangsahi nakhut noija umhen atitengle,

⁷hiche nikhoteng chule aman asap phonga, keima midamsah hiponge; ajehchu ka in'a nehdingle ponsil ding aumpoi. Mipi vaihomin neipansah hih-in, hin tinte.

⁸Ajehchu athuseijule anatoh-u chu Pakai dounale aloupi mithipsah bou ahitah jeh-in, Jerusalem kipal lhu-a chule Judah chu lhu-a ahitai.

⁹Amel lhona kilang chun amaho adou ahettohsah-in; hicheho chun Sodom'a tobang achonsetnao aphongjalin, aselpeh pouve. Amanitah-in thilse akilamthu lhon jeh-in ahinna lhonchu ohe ada na-e!

¹⁰Michonpha chu seipeh-un, hichu ama dinga apha ahi, Ajehchu amahon atohgao chu anehtei dingu ahi.

¹¹Migilou chu ada ahi! amadin hamsetna ahi. Ajehchu akhut teni-a atohdoh chu kipeding ahi.

¹²Kamitehi amaho bolgentheija pang chate jeng ahitaovin, numei hon achunguva vai ahom uve. Vo kamite, napuihouvin napuiseuvin, nachennao lampiho asumanguve.

¹³Pakai chu thutan din ahung kipanin, miho thutan ding chun adingtai.

¹⁴Pakai chu amite upaho le milen milal ho toh thutanlha dinga lutding ahi. Ajehchu nanghon lengpilei chu nanejouvun; migenthei ho thil kichomdoh chu na-in uva aumme.

¹⁵Kamite navoh ngem uva migenthei te maichangtah sumheija natahgoijiu chu ipi natinao ham? tin janelho Pakai chun aseije.

¹⁶Chuche kalvallin Pakaiyin aseije; Zion chanute chu hoithotah-a aumuva, ngong vaiputna le jonmit puma avaleuva, akengu jangjet jetna chule gingdet detna achejeh-u ahi.

¹⁷Hiche jeh-a chu Pakaiyin Zion chanute lujang khichet chutna ajepma, Pakaiyin atahsao aselguh laihou chu ahodoh pehdiu ahi.

¹⁸Hiche nikho chule Pakaiyin akenguva jephoina gingselsel, haona a alukophou, lhathah tobang angong ou chu asutlhah ding ahin,

¹⁹Sumgui ho, chaojangho chule ngongvei ho,

²⁰Lutomna ho, keng jephoina ho chule lukanna ho, gimnamtui ho bomho, chule bilba ho,

²¹khutjem ho le nahkuiba sana ho,

²²von khelthei ho, sangkhol chol ho, ponsil ho chule dipho,

²³phatvet ho, tupat ponnem ho, delkop ho chule ponlukhuh ho, asutlhah peh diu ahi.

²⁴Chule hunghiti ding ahi: gimnamtui khella a-ui; konggah khella khaojang; sam pojolsel khella lutol leolou; ponchol hoitah sanga khaodip pon; melhoina sanga meikah umjoding ahi.

²⁵Napasal hou chemjam'a, namihat hou galla thigamdiu ahi.

²⁶Chule amanu kul kotpiho chu lunghema kapdiu; amanu ahomkeo ahitahjeh-a tolla touding ahi.