Read Thado Chin Isaiah 30 Bible Online

Isaiah 30 - Thado Chin bible

Isaiah 30

¹Pakaiyin doubolnom chate, midang kithumop kisan-a, keija nahsahlouva koiho, chonset chunga chonset bolbe theina dinga keima lhagaova hilouva khukhumna dang khatna khukhum ho; ohe, adau ahi!

²Kathusei ngaicha louva Egypt'a chengdinga chesuh ho, Pharoah hatna-a kihatsah dingle, Egypt le-lim tahsan dinga cheho, ohe, adau ahi!

³Hijeh-a chu Pharoah hatna chu najachat nao hungsoh-a, Egypt le-lim tahsan nachu nakisuhmo nao hung hiding ahitai.

⁴Ajehchu amilenteu Zoan'a aumun, apalaihou Hanes-a ahunguve.

⁵Amaho jousen amaho phatchomsah joulou miho chu ajachat piuvin, panpina le phatchomna hilouvin jachatnale housetna joh ahi.

⁶Lhanglam gamsaho pohgih; lungkhamnale lungnatna gam, chua konchun keipi noule keipitah, gulse le gulsum ahungin, amahon aphatchom sah loudiu miho henga, sangan golho lengkou chunga ahao naole, sangongsao tinghem chunga agouho chu pouvinte.

⁷Ajehchu Egypt miten pannabei jin panpiuvintin, chule apanajong umponte. Hijeh-a chu keiman hiche thua kasei ahi, athahatnao chu thabei pannabei ahi.

⁸Tun chenlang, atonsot atonsot phat hunglhung dingin, amasanguva dokhanga chun suninlang, lekhabua chingin.

⁹Hichehohi kiphin mite, joubol chate, Pakai danthupeh ngailouding chate ahiuve.

¹⁰Amahon mitvah neiho jah-a, muhih un; themgaoho henga thildih neigaopeh hih-un lang, kahenguva thungei ngei neisei peh-un alhembou neigaopeh-un.

¹¹Lampi dalhan, lamsih-a kiheidoh unlang, Israel mithengpa chu keiho masanga konin phapoh tahih-un atiuve.

¹²Hijehhin Israel mithengpan aseitai, nangho hiche thu nanah sahmo uva suhgenthei nale golkehna natahsan uva chua na-umden jeh un;

¹³hiche jehchun hiche khangitlouna chu nachung uva bang sangtah aselai pohjah dingkon, photlot mitphet kahlouva hung chimlha ding tobang nahidiu ahi, ati.

¹⁴Chule aman hiche beldengpa bel suhkeh ahal halla achip banga asuhchipma; akhen louding, apokehna halchu meithuh-a kona mei-am lonading, ahiloule kokhuh-a kona twi thaldohna ding jeng jong kimulouding ahi.

¹⁵Ajehchu Pakai Pathen Israel mithengpan, hungkilea choldona chu huhhing nachan na hiding; thipbehnale tahsanna chu nahatnao hiding ahin, nangho nanompouve, ati.

¹⁶Ahinla nanghon ahipoi sakol chunga katou uva kajamdiu ahi, nati uvin, hijeh-a chu nangho najamdiu, chule gangtah-a kajamdiu ahi nati uvin, hijeh-a chu nanungdel hou jong gangtah hidiu ahi.

¹⁷Mikhat phosala; sangkhat jamding, minga phosala; molvum'a melchihna kitah bangle, lhang chunga galponlap banga nakidalhah kahseuva najamdiu ahi.

¹⁸Hijeh-a chu nangho nakhoto theinadiuva Pakaiyin nangao ahi, ajehchu nachung uva hepina aneitheina dinga ama kichoisang ding ahi. Ajehchu Pakai chu thutan Pathen ahin; ama ngahte jouse anunnom ahiuve.

¹⁹Ajehchu mitechu Jerusalem'a Zion'a chenguntin: nakakit louheldingu ahitan; napennao awginna chu aman nakhoto lheh dingu ahin; aman hichu ajahtengle nadonbut jengdiu ahi.

²⁰Chule Pakaiyin hesohna changlhah, suhgimna twi napejeng jongleu, nahil hou chu ningchonga kichonlut louheldiu, namitnun nahil hou chu amujoh dingu ahi.

²¹Chule nangho nakijet heijuva chule nakiveihei tengule, nanunglam uva thakhatna hichehi lampi ahi, jotnun, tia nanunglam uva thukhat kiseichu nanauva najahdiu ahi.

²²Nanghon dangka milim kikhegho tomnale, sana milim kilhaho kijepna nasuhboh diu ahin, pon thenglou napai uva, ahenguva hia konin chemangin tia naseidingu ahi.

²³Chutengle aman namuchi diuvin gotwi hinpeuvin natin, chutia chu nangin leisetna nathe-a, leija anneh pungding, hichu phatahle nengtah hiding ahin; chuche nitengle na ganchate chu ganlhaina munlen tah-a kivahdiu ahitai.

²⁴Chutobangma chu bongchal hole sangan nou lou kaihon, chang japnale changlona-a kijapchilsa ngen gancha antheng anehdiu ahitai.

²⁵Chule kithana nasatah nikho-a insangho chimtengle, molsang chungle lhangsang chung tina, vapile vadungho chule luidungho hung longdiu ahi.

²⁶Chukalvala jong Pakaiyin amite maput atoma, akijepnau mahaho adamsah nitengle, lhavah chu nisa vah bangjenga, nisa vah chu ajat sagi jenna nisagi vah kigom bangkhopma vahding ahitai.

²⁷Veuvin Tonsot Pakai minchu gamlatah-a konin lunghang tah-in ahunge, chule hiche pohgih chu gihtah ahi. Akamsung chu thangtomna adimsetnin; alei chu kavamjengthei meikong tobang ahi.

²⁸Ahu hai chu ngong geija longlet vadungsoh abangin, namtin vaipi manthah na tengsa-a lochildin agon, chule suhkhelsah nadinga mitin kama kamdal umcheh ding ahi.

²⁹Nanghon kutpitheng kimanjan banga la khat najah dingu ahin, chule mikhat kuli mutpum ma; Israelte thahatpa Pakai molchunga chebanga lungkipa najong nanei dingu ahi.

³⁰Pakaiyin a-aw loupitah kijahna ding bolintin, lunghan nasatah toh, halvam thei meikong toh, huipi le gopi toh, chule gel'a alunghana khut chu alhahding ahi.

³¹Ajehchu Pakai awgin'a kona Assyria te chu molla kinolhu ding kisumang ding ahiuve.

³²Chule Pakaiyin achunga angapding kivohna tenggolin aphahding, munjouse-a chu khongchale selangdah kithoding ahi. Aman gal mun kihotling mun'a chu akisatpi ding ahi.

³³Ajehchu Tophet hi malaija anakisudetsa ahitan; ahi, hichu lengpa dinga kigongsadem ahin; thuh tahle lentah-a asem ahi. Chua kikhol chu meile thing tamtah ahin, Pakai hu-hai chu meile kaat luija long deujeju bang ahi.