Read Thado Chin Isaiah 32 Bible Online

Isaiah 32 - Thado Chin bible

Isaiah 32

¹Veuvin, leng khatnin chonphatna-a vai ahomding, chule pipuihon thutan dihtah-a vai ahomdiu ahi.

²Chule mikhat chu khohuija kona kiselna munle huipi le gopi-a kona kivenbitna hiding; gamgolaija twi umna vadung le cholna gama songpi lenkhat lim tobang hunghi ding ahi.

³Chule khomuho mit chu thimlouva, khojaho chun angaidiu ahi.

⁴Lungkinon jong hetkhen themtheina hetna aneija, pao oh hon jong kichentah-a thu aseidingu ahitai.

⁵Mikhangse chu mihongphal kiti talou ding, migenthei chu ninglhing dehlouhel ding ahi.

⁶Migilou chun gitlou thujeng aseijin, ajehchu phatlhemna kijil dingle, Pakai douna-a adihlou seidingin, gilkelte oisung akeova umsahdingle dangchah te donding thonsah dingin mi nunse chun thusese seijintin, alungsunga khan gitlou abolding ahi.

⁷Migenthei chu amanchahho jong phaloutah ahin, milhasam hon thudihtah aseiteng jongle, mivaichaho suhmang hela aum nadingin, thujouva jona thet umtah lungthim giloutah apodohjin ahi.

⁸Ahinla mihongphal tah-in hongphalin, hongphalna thilho agongdohjin; ama hongphalna thilho-a chu ding jingding ahi.

⁹Nangho numei ho thoudoh uvin; khohsahna bei chanuten ka-aw ngaijunlang; kathusei jahin nana sungun.

¹⁰Khohsahbei numei nangho nikhoho le kumho tamtah-a nalungkham diu ahi. Ajehchu lengpithei hungga louding, aga lona hung umlou ding ahitai.

¹¹Numei nangho kithinguvin, khohsah bei nangho lungkham mun, kihoh lhaovin, nakeuvin umun lang, nakong uvah khaodip pon kigah-un.

¹²Loumun pha le, lengpigui gapha dinga, lunghem ding ahiuve.

¹³Kamite gama lingle khao hungpou doh ding ahin; henge, khopi kipana pena insung kipah jouse-a jong chutiding ahi.

¹⁴Ajehchu leng inpiho kidalha-a; mitamna khopi chu dalhah-a umding; galkul hole daivei insangho jong a-itih-a dinga gam sanganho, kinomtol nale ganchahon ho hamnehna mun hung hiding ahi.

¹⁵Chunga kona lhagao ichunguva ahung kibuh lhah-a, gamthip lou mun pha ahungsoa, lou mun pha gammanga akigel kahse-a;

¹⁶Chutengle gamthipma chu thutan lhahna uma, loumun pha-a chu chonphatna umden ding ahi.

¹⁷Chonphatna natohchu chamna hintin; chule hiche chonphatna chun a-itih-a ol-heuna le aphotchena asodohsah ding ahi.

¹⁸Kamite chu chamdela umnale dettah-a chendetna inmun, chule ol-heuva choldona mun'a cheng taovintin;

¹⁹gellhah tengle gammang chunga hunglhantin; chule khopi chu mun nema kikoiding ahi.

²⁰Twipang dunga muchi tu-a nangho anunnom nahiuvin; chukoma bongchal le sangan lhatlutsah-a nangho anunnom nahiuve.