Read Thado Chin Isaiah 33 Bible Online

Isaiah 33 - Thado Chin bible

Isaiah 33

¹Nangla kichom khalouva michompa; amahonla nangma tahsanlel louva, mikitahlou pa; nada ahi. Michom nangah phatle, nangma nakichom ding; nangman kitahlouna nangah phatle, amahon nangma natahsan leldiu ahi.

²Vo Pakai, neilungset in, keihon nangma kangah jinguve, jingkahsehle aban nu hinlang, thohgenthei laile eihuh hingpao vin hung pangin.

³Thunoh husagin chun miho ajam mangun; nangma nakichoi sangna-a chun namtin thecheh-in aumtai.

⁴Nathil chomdoh chu lungmul kikhol khom banga kikhol khom ding ahi. Khaokhopi suhle tunga achoplele banga achunguva lhai lele ding ahi.

⁵Chungsanga um ahijeh-in Pakai chu akichoisangtai. Aman Zion chu thutandih nale chonphat na-in adipsohtan ahi.

⁶Chihnale hetna chu nahinkhodetna le nahuhhingna thahat hunghi ding ahin, Pakai gin chu ama-a dinga goukhol ahi.

⁷Veuvin, amihangsan hou pama penguntin; chamna palaiho chu lhasetah-in kapmunte.

⁸Lamlhongpiho chu akeoheltan, chule vahlea athipdeltai. Aman thulhuna asukeh-in, khopiho i-asahpon, koimacha anahsahtapoi.

⁹Leiset hi alunghemin ahesoh-e, Lebanon ajahchan lhamlhah ahitai, Sharon chu gamthip abangin; Bashan le Karmel'in aga hou ahotpul taovin ahi.

¹⁰Tonsot Pakaiyin; tun keima thouving ting; tun kichoisang inting; tun kidomsang tange; ati.

¹¹Nanghon changsi navop uva, chang kung nahindingu, nahaiju husa chun mei tobanga nakahvam dingu ahi.

¹²Mitin chu ngunsong kihal kong banguntin, ling kisatlha-a meija kihal tobang hidiu ahi.

¹³Gamlatah-a um nanghon ipi kabol em ngaijun; chule naicha umhon jong kathahatdan heuvin.

¹⁴Zion'a michonseho akichauvin, miphalhem ho tijatnin alungdongun ahi. Ilah uva halvamna meikongto chengdinga koiham, ilah uva tonsotna kongjing meito chengdinga koiham?

¹⁵Chonphatna-a vahlea dihtah-a thuseipa, bolgentheija kona phatchomna i-sah loupa, nehguh lahna-a kona akhut thinglhapa, thisona ding thu jah-a kona akol kisipma, thilse mu-a kona amit singpa chu;

¹⁶amachu chungsanga chengintin; akihuhna munchu songa kisem kulpi hiding, nehding changlhah ama kipe-a adonding twi jong amuteiding ahi.

¹⁷Namitnin lengpa hoina amu-a, gamlatah-a um gamchu amudoh dingu ahi.

¹⁸Nalungsungin kichatna nasatah nangaito ding ahi. Danthusunpa hoiba hitam? Alalutpa hoiba hitam? Daivei insangho simtohpa hoiba hitam?

¹⁹Nangin kichat umtah mi namutahlou ding, giltah-a paodoh mi nahetchen theilou lei-oh mi namutah louhel ding ahi.

²⁰Kut loupiho kiman nading Zion khopi chunglam chu vetemin, namit tenin mongtah-a chenna Jerusalem; phetlhah louding houbuh kisonna akhom khatcha kibotdoh louhel ding; akhaojang jong khatcha kibottan louding chu munnate.

²¹Ahinla loupi Pakai chu eiho dinga luidung lenho le luidung neoho hiding ahin, Chua chu kong innei kongtol ho chelouding ahin, kong innei hattah jong chelouding ahi.

²²Pakai chu ithu tanpao ahin, Pakai chu danthu eipepao ahin, Pakai chu ilengpao ahin; aman eihuh hingdiu ahi.

²³Nakong tolna ponkhao ho akikangin; apondalu khombul chu ahendet theipouvin, pondal chu ajahthei pouve. Chuin gala thil kichom tamtah akihomun, elbaijin jong akilah-e.

²⁴Chule chua chenga chun kadampoi atilouding, chua cheng mitechu akhansetnao kingaidam ding ahi.