Read Thado Chin Isaiah 34 Bible Online

Isaiah 34 - Thado Chin bible

Isaiah 34

¹Namtin vaipi thungaidin hungnai junlang, nangho mipite ngai phaovin, leisetle asunga cheng jousen, vannoi le ama-a kon hungkondoh thiljousen ngaijuhen.

²Ajehchu Pakai thangtomna chu namjouse chunga, chule alunghana chu agalsat jousete chunga aumtan, amaho chu asumangsoh helin, thagamheldin mithat ho hengah apedohsohtan ahi.

³Amiteu kithat ho jong kipaidoh ding, chule athilonguva kona a-uiju kikhong doh-a, lhangho chu athisan utoh junlhah thading ahi.

⁴ Chule vanlaijola thil um jouse junlha-a, vanho chu lekha kijelbanga hung kijelding; chule avan janel jouse chu lengpiguija kona ana pulbanga, chule theichang phunga aga apulhah banga pullha diu ahitai.

⁵ Ajehchu kachemjam chu van'a notvala umding, veuvin, hichu Edom chungle kagaosap te chunga thutanlha dinga hung khumlha ding ahi.

⁶Pakai chemjam chu thisanin adimtan, chule chemjam chu thaovin atomtan; hichu kelngoi le kelchal thisanto, kelngoichal kal thao ahi. Ajehchu Pakai chun Bozrah'a ganlhaina aneijin, Edom gama kithana nasatah aume.

⁷Chule gambongchal kineiho chu amahotoh hungsuh thantin, bongchal til kilalouho chu bongchal atil kilaho toh, chule agamu chu thisanin chup mintin, aleivui chu thaova jollha ding ahi.

⁸Ajehchu hichehi Pakai phulahna nikho ahin, chule Zion kinepna le khohsahna kum chu ahi.

⁹Chule chua vachadung ho chu thingnaivom hungsoh-a, chule aleivuiho chu kaatsong hungsoh ding, chuche gamchu thingnaivom kadeujeju hungsoh ding ahi.

¹⁰ Hichu sunle jana mitlouhel ding, ameikhu chu tonsotna kitungdoh ding, akhang akhanga agoh-a uma, atonsot atonsotna koimachan ahopa louhel ding ahi.

¹¹Ahinla twivamuhsao le vakeng'in lo intin; sumbupi le vavom asunga chengdio ahin; hiche chunga chu lungnohna khaole khaidihna songho kikhaiding ahi.

¹²Chua milal ho chu lenggama dingin kou untin; koimacha vang umtalou ding, chule aleng chapate jouseu imacha hilouding ahitaove.

¹³Amanu leng inpiho-a lingphung, chule akulpidet hou sunga sachah le theimi hung kehdoh ding, Dragonho chennale sumbupi ho honsung hung hiding ahi.

¹⁴Neldi gam, gamsaho jong twikol gama gamsahoto kitoh untin, chule lhomi chun agol kou intin, sumbupi chu chua chun kicholdontin, amadinga choldona mun amuding ahi.

¹⁵Chua chu sumbupi lentah-in buh ase-a, atwi athah ding, alhaving noija ahuikhom ding ahi. Chua chu muthong ho jong akopcheh-a hung kikhom ding ahiuve.

¹⁶Pakai lekhabu holdoh-un lang simun; hichehohi khatcha thonlou ding ahi; akopto lhasam umlou ding ahi. Ajehchu kam'in thu apeh-a ama lhagao ngeichun akhopkhom ahitai.

¹⁷Chule aman amahodin vang asanin, akhut tah-in khaovin aten, ahopkhen pehtai. Amahon hichu atonsotna alouva, akhang akhanga hichea chu chengding ahiuve.