Read Thado Chin Isaiah 35 Bible Online

Isaiah 35 - Thado Chin bible

Isaiah 35

¹Gammang lah le gamthip lah chu amaho dingin hungkipah intin, chule neldigam chu thanoma pahchapah banga pahding ahi.

²Nengchetnin pah-intin, kipah le lasah-in thanominte. Lebanon loupina ama kipeding, Karmel le Sharon ahoinapen, Pakai loupina le i-Pathen'u gunchena chungnung penchu amudingu ahi.

³ Khut hatlouho hatsah-un lang, khup ngoiho chu dindet sah-un.

⁴Mi meidoite chu hitin seipeh-un, kicha hih-un! veuvin, phula dingle lethuh dinga na Pathen'u hungding; ama hunga nangho nahuhdoh diu ahi.

⁵ Chutengle mitchote mit kihasah intin, chule na-ngongte kho kijahsah ding ahitai.

⁶ Chutengle elbai chu sakhi banga kichoma, paomo leichun la asahding, ajehchu gamthipma twiho chule neldi gama vachadung ho hungput doh ding ahi.

⁷Chule tolgo chu twikul hungsoh doh-a, chule dangchah na gama chu twisam hungsoh ding, Dragon ho chenna le akolnaova chu hampa toh pumpeng le phaipheng hungkeh ding ahi.

⁸Chua chun lamlhongpi khatle lampi khat umintin, chuche lampi chu thenna lampi kitiding ahi. Atheng louvin achung aho louding; amavang hichu amaho ding ahi. Chule vahle ho ngoljong leu hichea chu adihlou abolloudiu ahi.

⁹Chua chu keipi khatcha umtalou ding; sahingne gamsa khatcha jong hichea chu kaltou louding; hichea chu kimulouhel ding ahitai. Ahinla hichemun chu lhatdamsaten bou aho dingu ahi.

¹⁰Chule Pakai lhatdohsate hungkileu vintin, Zion'a hunguva tonsot kipana aluchung uva umding ahi. Amahon kipanale thanopna aneijuva, lungdon nale khoisatna jam mangding ahitai.