Read Thado Chin Isaiah 36 Bible Online

Isaiah 36 - Thado Chin bible

Isaiah 36

¹Tun, Hezekiah lengpa lengchankal kumsom le kumli alhinin, ahitin ahi, Assyria lengpa Sennacherib chu Judah gam khopi satdin ahungtouvin, alasohtan ahi.

²Chuin Assyria lengpan Lachish'a konin Rabshakeh chu sepai tamtah toh Jerusalem'a Hezekiah lengpa henga asoltan ahi. Chuin ama ponsoppa lou lamlhongpia twikul sahnung twilam panga chun anadinge.

³Chuphatnin insung vaipo Hilkiah chapa Eliakim le Danthusunpa Shebna chule thuchingpa Asaph chapa Joah toh ahunguve.

⁴Chuin Rabshakeh-in ahenguva aseijin, tun nanghon Hezekiah jah-a, leng loupitah Assyria lengpa chun hitin aseije, natahsan kingapna chu ipi ham? ati, tin gaseijun ati.

⁵Keiman kati ahi, nangin (ahinla hicheho chu mohthu maimaibou ahi) galsatnadin lunggelna le thahatna kaneije natin ahi. Tun koichunga natahsana, keima douna-a gal naboljeng hitam?

⁶ Ven, nangin hiche peng tenggol chipsa Egypt mitehi natahsan ahin, achunga chu mi akingaile akhutna lutna asutding ahi. Egypt lengpa Pharoah chu ama tahsan jouse chunga chutiji ahi.

⁷Ahinla nangin kahenga keihon Pakai ka Pathen'u katahsanu ahi, tijongleu chun; ama chu Hezekiah'in amunsangho le amaichamho alahmangpeh-a, Judah le Jerusalem mite jah-a nanghon hiche maicham masanga bou nahoudiu ahi ati hilouham?

⁸Hijeh chun tun kangeh nahi, ka Pakai pa Assyria lengpa henga kitepna neijin, nangin achunguva touding mi naneiding poule sakol sangni pengkate.

⁹Kapu sohte sepai lamkai neopen khat maichu iti naheimanga, sakol kangtalai le sakol galmiho jeh-a Egypt chunga natahsan na-ngap jeng ham?

¹⁰Tu-a keima Pakai panglouva hiche gam douva sumang dinga hungtouva kahiham? Pakaiyin kajah-a hiche gam doudin chetou vinlang, gasumangin eiti.

¹¹Chujouvin Eliakim le Shebna, chule Joah chun Rabshakeh jah-a nahenga katao ahi, nasohte hengahin Syria te paovin thu seijin; ajehchu hichu keihon kaheuve, palvuma um miho hetthei Judah paovin seihih-in, atiuve.

¹²Ahinla Rabshakeh chun kapu chun napule nang hengabou hiche thuho seidinga eihinsol ham? Aman palvuma touho khun aeh-u akineh theina diule, ajunu akidon theina diuva ahenguva eihinsol hilouham?

¹³Chuin Rabshakeh adingin gingtah-in, Juda te paovin asamin; lengloupi Assyria lengpa thuseihohi ngaijun:

¹⁴Assyria lengpan hitihin aseije; Hezekiah'in nahuhdoh jouloudiu jeh in ama kilheplhahsah hih-un.

¹⁵Hezekiah chun nangho Pakaiyin thonlouvin eihuhdoh untin hiche khopihi Assyria lengpa khutna kipedoh louhel ding ahi, tin natahsan sah daohen.

¹⁶Hezekiah thu ngaihih un; Assyria lengpan thilpeh khatnin kinoptona neipeuvinlang, kahenga hungdoh-un; nalengpilei cheh kineh unlang, natheichangphung cheh kineh-un, chule mitinin natwikula twicheh kidonun;

¹⁷keiman nagam tobangu gam khatna changle lengpitwi umna gam changlhah le lengpitwi umna gam khatna kahungpui kahseuvin ati.

¹⁸Chingtheijun, achutiloule Hezekiah'in Pakaiyin eihuhdoh naovinte tintin najollha getnunte. Assyria lengpa khutna kona namtin vaipi pathenho khattou agam huhdohpeh-a umkha tam?

¹⁹Hamath le Arphad mite pathenho hoiba ham? Sepharvaim pathenho chu hoija umam? Amahon kakhutna kona Samaria ahuhdoh beh-um?

²⁰Hiche gamho pathen lah-a kakhutna kona agamu huhdoh-a koiham? Hitia chu Pakaiyin kakhutna kona Jerusalem ahuhdoh dingham? ati.

²¹Ahinla amaho athipchetnun, thucheng khatchan adonbut pouve, ajehchu amachu donbut hih-un tin lengpa thulhahna aumtai.

²²Hitichun insung vaipo Hilkiah chapa Eliakim le lekhasunpa Shebna chule thuchingpa Asaph chapa Joah chun aponu kibottel pumin, Hezekiah henga ahungun Rabshakeh thusei ho chu ahung seipeh un ahi.