Read Thado Chin Isaiah 37 Bible Online

Isaiah 37 - Thado Chin bible

Isaiah 37

¹Chuin ahitin ahi, Hezekiah lengpan hiche thuho chu ajah phatnin, apon abottelin, khaodip pon akikhuh-in, Pakai insunga aluttai.

²Chuin insung vaipo Eliakim le danthusunpa Shebna, chule upa thempuho chu khaodip pon silpumin, Amoz chapa Isaiah themgao henga asoltai.

³Chuin amahon ajah-a, Hezekiah'in hitin aseije, tunihi hesoh nikho, kipho nikho chule taitom nikho ahi. Ajehchu chate pengding ahitan, ahinla apenlhah nadiu thahat aumpoi.

⁴Pakai na Pathen'in Rabshakeh thusei ho ajah theina dinga, amachu apu Assyria lengpan Pathen hing jumso dinga ahinsol ahin, Chule Pakai na Pathen'in athujahho chu abehlhah ding ahi. Hijeh chun akidalha amoh chengse dingin hatah-in taovin.

⁵Chutichun Hezekiah lengpa sohte chu Isaiah henga ahungtaove.

⁶Chuin Isaiah'in, ahenguva, napupao henga hiti ahi nasei dingu ahi, Pakai chun hitin aseije, Assyria lengpa sohten eitaitom nathu najah hou jehchun kichahih beh-un.

⁷Veuvin, keiman achunga hui hattah solingting, chule aman thuthang khat jantin, agamlama kilekit ding, ama agamsung tah-a chemjam'a kalousah ding ahi, ati.

⁸Chutichun Rabshakeh chu akilekitnin ahile Assyria lengpa Libna douna-a agalsatpet agatohtai. Ajehchu aman Lachish adalhatai ti thu anajatan ahi.

⁹Chuin Ethiopia lengpa Tirhakah nangtoh kisatdin ahung kondoh-e ti chungchang thukisei ajatai. Hichu ajah phatnin Hezekiah henga thupo khat asollin, ajah-a;

¹⁰Hitia hi Judah lengpa Hezekiah henga naseiding ahi. Assyria lengpa khutna Jerusalem kipedoh louding ahi tin nangin natahsan pa Pathen chu kilheplhahsah hihbeh-in.

¹¹Veuvin, Assyria lengten gamjouse iti asuhmang hellem, tithu najatai. Hichu ahile nangma huhdohna hideh ding hinam?

¹²kapateuvin anasuh mangho Gozam, Haran, Rezeph chule Telassar'a anaum Eden chate banga chu namtin vaipite pathenho chun amaho chu anahuhdoh nah um?

¹³Hamath lengpa, Arpad lengpa, Sepharvaim khopi lengpa Hena chule Ivah khopi lengpa hoija umtam?

¹⁴Chuin Hezekiah'in lekhathot chu thupole ho khutna konchun alan hichu asimtai. Chuin Hezekiah Pakai inlama achetouvin Pakai angsunga chun aphajaltai.

¹⁵Chuin Hezekiah Pakai henga ataovin aseije,

¹⁶ Vo janel Pakai, Israel Pathen, Cherubim ho kah-a chengjing pa, leiset lenggam jouse-a nangma Pathen nahin; nangma ngeibou nahi. Nangin vanle lei nanasemme.

¹⁷Vo Pakai, nana sungin lang ngaijin, vo Pakai, namit hasah inlang hinvetan, chule Senacherib'in hingjing Pathen housetna-a ahinthot thu jousehi ngaijin.

¹⁸Atahbeh in Pakai, Assyria lenghon namjousele agamsunghou ahomkeovin akoi gamtaove.

¹⁹Chule apathenhou meilhum sunga alehlutnuve, ajehchu amaho pathen hilouva mihem khutsem thingle songbou ahiuvin, hijeh-a chubou asuhmangu ahi.

²⁰Hijeh chun tuhin, vo Pakai, ka Pathen nu, akhutna konin nei huhdoh-un, chutile leiset lenggam jousen nangma Pakai, nangma sehbou Pakai nahichu hethei taovinte, ati.

²¹Chujouvin Amoz chapa Isaiah chun Hezekiah henga mi asolin, Assyria lengpa Sennacherib douna-a kahenga nataona chu, Israel Pakai Pathen'in hitin aseije,

²²ama chungchang Pakaiyin aseithu chu hichehi ahi. Nungah theng Zion chanun nangma nanoisen, nahsahmonan nanuisat in, Jerusalem chanun alu nathin khume.

²³Nangin koi nahousetna nataitom ham? Koi douna-a na aw nasansah-a chungsang lam nangatna navettou ham? Israel mitheng patah douna ahi.

²⁴Nasohte-a konin Pakai chu nahousen hitin naseije, ka kangtalai tamtah toh molsang ho geijin Lebanon lhang pangho-a hungtou vingting, cedar thingphung sanghole chahthing hoiho phuhlhung ting, agamgi munsang ho le Karmel gammanga kalhut ding ahi.

²⁵Keiman kotong kalaijin twi kadontai. Chule kakengton aki-umkul munho-a vadung jouse kalho kangtai.

²⁶Hichehi iti kanabol hija, malaija patna iti kagontohsah-am, tichu sotna nanajah hitalou ham? Tu-a hi kagui lhunsah ahitai, Kulpi kikaikhum khopi ho akeova umsah-a, manthah na-a sevum dinga chu nangma nahiding ahi.

²⁷Hijeh chun achengho chu thalhom tah ahiuvin, amaho alungthoijun alungdonguve. Amaho chu loujaova hampa tobangle chang aphung lhin masanga huise semgot tobang ahiuve.

²⁸Hinla keiman naumna, napotdoh, nahunglut chule kachunga nalunghan kahenai.

²⁹Ajehchu kachunga nalunghannale, nahusa ginchu kanasunga ahunglut tai. Hijeh chun ka ngakoi nanah homa sutongting, nakama kakamdal kabuding, nahungna lampia chu kalehei kitding nahi.

³⁰Hichehi nangdinga amelchihna hiding ahi. Tukum achama kehho naneh ding, kum nina jongle chuche-a dondoh chu nen natin, chule kumthum nateng nanghon kitun lang, ki-atnun, chule lengpilei kibolin lang aga nen.

³¹Chule Judah insungmi asohcha ahoidoh chengsen, jung akhosuh-a chule achunglamin ga aneiding ahi.

³²Ajehchu Jerusalem'a kona ahoidoh chengsele Zion'a kona asohchaho hung sohdoh ding ahiuve. Janel Pakai tompana-in hiche aboldoh ahi.

³³Hijeh chun Pakaiyin Assyria lengpa thudol hitihin aseijin, ama hiche khopi sunga hunglut louding, thalchang khatjong akap louding, amasanga lumdal puma jong hunglou ding, hiche satna dinga leikul jong asetlouding ahi.

³⁴Ahungna lampi mama-a chu kinungle-a, hiche khopiahi hung louhel ding ahi, tin Pakaiyin aseije.

³⁵Ajehchu hiche khopihi keimajeh le kasoh David jeh-a kahuhdoh ding ahi, ati.

³⁶Chuin Pakai vantil chu apotdoh-in, Assyria ho ngahmuna sang jakhatle sangsomget le sanga athattai. Chuin jingpi-a ahungtho phatnun vetan; mithilong jeng anahitaove.

³⁷Chutichun Assyria lengpa Sennacherib chu apotdoh-in achen akilekitnin Nineveh'a achengtai.

³⁸Chutichun ahitin ahi. Aman a-pathen Nisroch insunga pathen ahoupetnin achapateni Adram-melech le Sharezer'in chemjamin athatlhonin, Armania gama ajamlut lhontai. Chuin achapa Esar-haddon chu akhelin alengchang tai.