Read Thado Chin Isaiah 38 Bible Online

Isaiah 38 - Thado Chin bible

Isaiah 38

¹Hichelai chun Hezekiah chu thidingin anatan ahi. Chuin Amoz chapa Isaiah themgao chu ahenga ahungin, ajah-a, Pakaiyin hitin aseije, na-insung kisemtuptan, ajehchu nangma damdoh joulouva nathiding ahitai, ati.

²Chujouvin Hezekiah'in banglama amai aheijin, Pakai henga ataovin.

³Vo Pakai kengeh nahi, namasanga thutah le lungdih po-a, chule namitmu-a thilpha kanabolho chu tun neigeldoh peh tan, ati. Chuin Hezekiah hakan akaptai.

⁴Chuin Pakai thuchu Isaiah henga ahung lhungin.

⁵Hezekiah henga chun chenlang gaseijin, Pakai napa David Pathen'in hitin aseije, nataona kajan, namitlhi lon kamutai; vetan, keiman nahinkho kum somle kumnga kajopbe ding ahi, ati.

⁶Chule keiman nangmale hiche khopihi Assyria lengpa khutna kona kahuh doh-a hiche khopihi kahonbit ding ahi.

⁷Pakaiyin aseisa chu aboltei ding ahi, tihi Pakaiya kona namelchihna ding chu ahi;

⁸Vetan, keiman nisa lim chu hinlepui kitningting, Ahaz maikoh-a lhumsuhsa chu kalsoma kanungchon ding ahi. Chutichun alhumsuhsa-a konchun nisa chu kalsom anungchontan ahi.

⁹Judah lengpa Hezekiah damlouva auma ahung damdoh phatna athilsut chu hichehi ahi.

¹⁰Kahin nikho kisumanga thikholkhul kam jonding kahitan, kahin kumkho umnalai ho chu lahpeh kahitai, kanatin ahi.

¹¹Pakai muponge, chule mihing gamachun Pakai le vannoi'a cheng mihemchu mukit taponge kanatin ahi.

¹²Kakhanghi achemangin, kelngoi chingpa pon in bangin akichonmangtai. Kahinkhohi pon kikhong bangin akijel doh tai. Natah-a kisuh natna-a eisuhmang ding ahi. Sun-apat jankhang geija neikichai sah ding ahitai.

¹³Jingkah geijin kakou kouvin, keipi bangin chutichun kagu jouse subongintin, sun-apat jangeija neikichai sah ding ahitai.

¹⁴Chule pelpa le vakengsang bangin kaham hamin, vahui bangin kamao maove. Chunglam vetnan kamit teni akhamtai. Vo Pakai eiki sugenthei tai, neivesui jin.

¹⁵Ipi seitang em? Aman kahenga aseijin, ama maman abolchai tai. Kahinna hi gimtah-in kahinkho lhumkeijin oltah-in chejingjeng tange.

¹⁶Vo Pakai hitiho jal hin mite ahingjingin, hicheng thil jouse-a hi kalhagao hinna hi uma ahi. Chutichun nangin neidamsah kitnin natin, neihinsah kitnin nate.

¹⁷Vetan chamnahi kana hotbol lheh-e; Ahinla kalhagao hi ngailutna-in setna kokhuh-a konin nahuhdoh tai. Ajehchu kachonsetna jouse nanung lama nasep mangtai.

¹⁸Ajehchu thikhol khulin navahchoi theipon, thina in nakipapi theipoi. Kokhuh-a kumlha hon jong nathudih akineppi theipouve.

¹⁹Mihing, mihingin vang tunia kabol banghin vahchoi jinnate, pan chate chu nathudih hetsah unte.

²⁰Pakai chu eihuhhing dinga phasadem ahi. Hijeh chun tumging tothon kahinkho lhumkeijun Pakai insunga la saovinge.

²¹Ajehchu Isaiah'in theichang bohkhat laohen lang uilut chunga chun louvin nu-uhen chutile damkit tante, ati.

²²Hezekiah'in Pakai inna kachetou nading melchihna ipiham? tinjong anaseije.