Read Thado Chin Isaiah 40 Bible Online

Isaiah 40 - Thado Chin bible

Isaiah 40

¹Nangho lungmongun, nangho lungmongun, kamite, tin na Pathen'un aseijin ahi.

²Jerusalem henga damheochan seijun, agalbol lah molso ahitan, akhan git louna akingaidamtai tin ajah-a samun, ajehchu amanun achonsetna jouse jal-in Pakaiya konin ajat ni akimutai.

³ Gamthipma khosam aw chun nanghon Pakai lampi semtoh-un, nelgama chun i-Pathen'uva din lamlhongpi semjangun, ati.

⁴Damphai jouse kidomsanga, molsangtin le lhang jouse kisunem ding ahi. Akonlai kisujanga, aphonlai chu kisunamding ahi

⁵Chuteng Pakai loupinachu hungkilang intin, tahsaphe jousen amukhom sohkei diu ahi. Ajehchu Pakai kamin hichu asei ahitai.

⁶ Ogin chun samin, atin ahi. Chuin aman ipi kasap dingham? ati. Tahsaphe jousehi hampa tobang ahin, aphatna jouse jong loujaova pahcha pah tobang bou ahi.

⁷Hampa agopjin, pahcha apuljie, ajehchu Pakai lhagaovin ahinsemji ahi. Tahbeh mongin mihem hi hampa tobang ahi.

⁸Hampa agopjin, pahcha apuljie, ahinla Pathen thu vang atonsotna ding jingjeng ding ahi.

⁹Kipana thupha hinpo-a, vo Zion, molsanga khun kaltouvin; kipana thupha hinpo-a, vo Jerusalem, nathanei chasunin na aw sansah-in, sansah-in; kicha hih-in, Judah khopiho henga, veuvin, na Pathen'u khu? tiuvin.

¹⁰ Veuvin, Pakai Pathen chu khut thahat tah-a hungding ahi, chule abantha-a avai ahomding, atohphat man chu akoma uma chule anatoh chu amasanga umding ahi.

¹¹ Aman kelngoi chingpa banga aganchahon avah ding ahi. Aman abana akelngoiho chu ahoikhoma, a-opma akipomding, anousen puma hicheho chu olchacha apuile ding ahi.

¹²Akhut phang tonga twivei ho tetheija, akhapma van tethei, leija leivuiho tena khatna hedohtheija, tena-a molsangho tedoh-a, chule lhangho khaikotna khaija koiham?

¹³ Pakai Lhagao chu hila, thumopma panga, hilchah-a koiham?

¹⁴Koito kithumoptoa, ama kon ahila, thutandan lampi kon ahila, chule chihna thu ahila, chule hetkhen themna lamlhah kon ama amusah khah-em?

¹⁵Vetan, namtin vaipihi baltina twi vatkhat bangbep ahin, chule khaikotna leivui sipah bangbepma asim ahin, vetan, twikol gamho chu thil neochakhat bangin alan ahi.

¹⁶Chule Lebanon chu meija tikham ahipon, asunga ganhingho jeng jong govam thil to-a tokham ahipouve.

¹⁷Namtin vaipi a-angsunga ima ahipouvin; amaho chu amadinga imacha hilou, agohkeo ahiuve.

¹⁸ Achutile Pathen chu koito nakibahsah uva? Ipi akibahpito natekah dingu ham?

¹⁹Mikhut themin milim asemjin, sana khengin achunga sanan atomjin, chule dangka sumgui akhengjin ahi.

²⁰Todoh ding neiloi mivaicha tah chun amotlouding thing akilhenin; achatloh theilou ding semthu milim semsah dingin, mikhut themtah akiholjin ahi.

²¹Nahet khah, najahkhah loulai uham? Semtila patna kihilkha loulai nahiuvem? Leiset bulkiphu-a pat nahetkhen thei loulai uham?

²²Leiset kikol lum chunga touva ama ahin, asunga cheng ho jong khaokhopi tobang ahiuvin; vanho ponjal banga jeldoh-a, chenna inding pon-in banga jahdoh-a ama ahi.

²³Aman leng chapate imalouvin akoijin; aman leiset thutan ho agohkeovin asemtai.

²⁴Henge, amaho kiphut lou ding ahiuvin; tu jong kitulou dingu; aphungu leija jungkho manlou ding; chule Aman amaho amut teng jongle amaho gop lhading, chule changpol banga chimpeijin apeimang dingu ahi.

²⁵Achutile koito neikibah sah uva, ahiloule koito kakibah dingham? tin mithengpan aseijin ahi.

²⁶Namtinin chungsang lam nganlang, hichengse sempale ajanelu ahon hona puidohpa khu vetemun; aman aletnale athahatnan amincheh-in akouvin, Ama thanei na-a hattah ahijeh in khatcha akhenpoi.

²⁷Vo Jacob, vo Israel, kalampihi Pakaiya kona kisel ahin, kathutanhi ka Pathen'a kon ahipoi tia ipidinga naseiham?

²⁸Pathen, Pakai, leiset kolmong geija sempa, nahetkhah-a najahkhah louham? Lhasam khalou, choljong cholkhalou, ama hetkhen themna holdoh jouhoi hilou ahi.

²⁹Aman milhasam chu hatna apen; chule thaneilou chu athahat nao akalsahjin ahi.

³⁰Khangdongho jengjong lhasama choldingu, gollhangho jong kipala lhuding ahiuve.

³¹Ahinla Pakai ngahjingho chun athao kisem thah-un tin; muvanlai bangin alhaovin lengtou untin; amaho lhaijuva chollou dingu; chule vahleuva lhasam louding ahiuve.