Read Thado Chin Isaiah 41 Bible Online

Isaiah 41 - Thado Chin bible

Isaiah 41

¹Vo twikol gamho, ka-anga thipchetnun; miten athao semthah-uhen; amaho hungnaiju henlang, chuteng thu seijuhen, thutanna mun chu naicheh-u hite.

²Solama kona michonpha pa chu hintungdoh-a, akhophang bulla kou-a, namtin vaipi a-angsunga pe-a, lengho chunga ama vaihomsah chu koiham? Amahochu leivui kisoh dingin chemjam ma apedoh-in; changpol kithethang bang thethang din athalpi henga apedoh tan ahi.

³Amaho chu anungdelin bitkeijin agalkaijin; lampia chun akengin jong achepoi.

⁴Hichehi koijin atoh-a chule abol hintem; semtila patna akhang akhanga miho kou-a natong jouva chu koiham? Keima Pakai amasale anukhah, ama chu keihi kahi.

⁵Twikol gamhon hichu amuvin, akichauve; leiset kolmangho jong akitihot hot-un, ahung kikhin naijun ahing taove.

⁶Amaho amitakipmin aheng akomcheh akithopiuvin; chule amitakipmin asopipa jah-a, hangtah-in pangin, atiuve.

⁷Chutichun khut thempan sana khengpa atilkhouvin, chule sehcha-a khenpan thihnoidou khenpa atilkhouvin, ajah-a, solmat dinga phasadem ahitai atin, akilon lounadin thihkilin akildetne.

⁸ Ahinla, Israel nangma kagolpa Abraham chilhah-a kalhacha Jacob chu nahi.

⁹Leiset kolmonga kona kalah-a, chukoma milenho-a kona kakouva, najah-a kasei ahi.

¹⁰Nangma kaumpi jeh-in kicha hih-in, keima na Pathen kahijeh-in lunglha hih-in; henge, keiman kahatsah ding nahin; Keiman nakithopi nange, chule keiman nangma kachon phatna khutjetna katuh ding nahi.

¹¹Vetan, nangma douva lunghansah jouse chu jahchaova, kisudongdiu ahi. Amaho imalouhel banguntin, nakinahpiho chu mangthah ding ahiuve.

¹²Nangman amahole nakinahpiho ngeichu nahola namu louding; nangma douva galbolho chu imalouhel leh pannabei sohding ahiuve.

¹³Ajehchu keima Pakai na Pathen'in nakhutjetna katuh-a, kicha hih-in, keiman nangma panpi nange kati ding ahi.

¹⁴Nangma lungtol Jacob, chule nangho Israel mite kicha hih-un; keiman panpinange, tin Pakai nalhandam pu Israel Mithengpan aseije.

¹⁵Vetan, keiman nangma chang chilna manchah hanei hemtah-a kasemthah ding nahi. Nangin mol ho nachila, navoh ngemding, chule lhangho chu changvai nabahsah ding ahi.

¹⁶Nangin amaho najapma, huichun alhoh mangdiu, chule chimpei chun athecheh diu ahi. Chule nangma Pakaiya halna-in kipah-in natin, Israel Mithengpa-a chun loupitan nate.

¹⁷Avaichale alhasamin twi athuma, koimachan pelouva aleiju dangchah-a agotteng, Pakai keiman nousah ingting, Israel Pathen keiman amaho kapaidoh louding ahi.

¹⁸Keiman munsang ho-a vadunglen holeh phaicham lailunga twinahho kahonding ahi. Keiman gamthiplai twikul'a chule gam golai twisam putna-a kasemding ahi.

¹⁹Keiman gamthipma cedar thing, thinggi thing, le pahcha thing chule thao thing kaphua; neldi gama chahthing, phan thing chule thingkhang thing kaphu ding ahi.

²⁰Chutia chu amahon amuva, ahetnuva, angaitouva, chule ahetthem cheh theina diuva Pakai khutnin hichu abola, chule Israel mithengpan hichu anasem ahi.

²¹Pakaiyin nakibaonao hinpolutnun ati; nathu hahsao hinpolutnun tin Jacob dinga lengpan aseije.

²²Amahon hicheho chu hinpolutnu henlang thil hunglhung ding eimusah uhen; amahon thil masaho chu ipiham? kangaitouva, akichaina kahet theina dingun eimusah-uhen; ahiloule ahunglhung dingho eiphon dohpeh uhen.

²³Nangho pathen ho nahiuve ti kahet theina dingun, tununga thil hunglhung dingho tahlangun; ahi, kalung thoijuva kamucheh nadiuvin apha ham aseham boluvin.

²⁴Veuvin, imacha hilou nahiuvin, natoh-u jong pannabei ahi. Naki lhanpao chu thet umtah ahi.

²⁵Keiman sahlam gama konin mikhat katungin, ama chu hungding ahi: aman niso-a pat kamin akouding; Songchung kichonpha tobangle beldengpan leingan achil banga ama pipuiho chunga hungchu ding ahi.

²⁶Ihettheina diuleh ama chonpha ahi iti theina diuva abula patna kon aphonkhah-em? ahi, khatchan atahlangpon; ahi, khatchan aphongdoh poi; ahi, nathu ja-a khatcha ana umpoi.

²⁷Amasan Zion henga, ven, ven, amahokhu tinnate; Jerusalem chu kipana thupha pole-a khat kapeh ding ahi.

²⁸Ajehchu kagah vetleh koimacha kamupon; amaho kadohjongle thukhat donbut theijong alah uvah kamupoi, khatcha aumpouve.

²⁹Vetemun, abonun pannabei jeng ahiuvin; atoh-u jong mohseh ahin; amilim kilhajol ujong hui lhi le ahomkeo ngen ahiuve.