Read Thado Chin Isaiah 42 Bible Online

Isaiah 42 - Thado Chin bible

Isaiah 42

¹ Veovin, kasottol, katuhjing, kalhentum; achunga kalung kipanakhu; achunga kalhagao kakoijin; aman chidang namdang ho henga thutanna anei ding ahi.

²Aman kho asaplouding, a-aw asodoh louhel ding, khopi lamlena jong a-aw kija louhel ding ahi.

³Pumpeng kihehchip ahebohpai louding, thaomei patkhu athamit pailou ding ahi. Aman thudih-a thutanna apohdoh ding ahi.

⁴Leiset chunga thutanna aumsah masangse-a losam louding chule lungjong lunglhalouding; twikol gamhon ama danthupeh angaidiu ahi.

⁵ Vanho sema jahdohpa, leiset le asunga kona hungsoh ho phajaopa; chule achunga mite henga haina hule asunga vahle miho henga lhagao pe-a Pakai Pathen chun hitin aseije.

⁶ Keima Pakai hin chonphatna-a kakou nahin, nakhut katuh-a kavet tupma, mitin dinga kitepna chule chidang namdangte vah hidinga kasem ding nahin;

⁷mitcho ho mit hasah ding, sohchangho songkulla kon puidoh ding, chule songkulsung muthim lah-a touho puidoh dinga kapansah nahi.

⁸Keima Pakai chu kahin; hichu kamin ahi. Kaloupina chu midang kapehlouding, eiki vahchoina jong milim semthuho henga pelouding kahi.

⁹Veuvin, phatmasa thilho chu ahung lhungtan, thilthah ho kaphong doh-in; ahung dotdoh masanga athu dollu kahil masatdem nahiuve.

¹⁰Nangho twikhanglen'a kumsuh hole asunga umho jousen; twikol gamle asunga cheng, leiset kolmonga patnin Pakai henga lathah khat saovin.

¹¹Gamthip le akhopiho Kedar chan geija kho ho pengu hen a-aw sansah uhen, songpi-a chenghon kipa la saohen lang, molsang hon chungvuma konin samu hen.

¹²Amahon Pakaiya loupina peuhenlang, twikol gamho-a chun a thangvahna phongjal uhen.

¹³Pakai chu mihat tah bangin kondoh intin, galsat mi banga thangthipna acho thouva, kholhang asapding; ama hat tah-a kituma, amelmate ajoding ahi.

¹⁴Sottah thipbeh-in kaumtan; kathipbeh-in, kakitimkit hamhame, tunvang naosonat thohlel bangin peng ingting; kasuhmanga kavalhum ding ahi.

¹⁵Mol le lhangho agoh-in koi jingting, ahampaho gotsah gaming ting, vadungho twikol gammin semingting, chule twikulho kansah soh inge.

¹⁶Mitcho ho chu ahetkhah lounao kenglampia puijing ting; ahetkhah louvu lampia kaijinge; amasanguva muthim chu vahsah ingting, akonlaiho ka jansah ding ahi. Hicheng hi ahenguva kabolding, kadalhah louding ahiuve.

¹⁷Milim semthu tahsan ho, milimho jah-a, nangho kapathen'u nahiuve tiho chu hung kinungle uva, jahcha lheh ding ahiuve.

¹⁸Na-ngong ho, nanghon ngaijunlang, nangho mitcho hon namutheina dinguvin veuvin.

¹⁹Mitcho koiham, kalhachapabou hilouham? atiloule kasottol kasolpa banga nangonga koiham? michamkim pa banga mitcho koi hijam? Pakai sohpa banga mitcho koiham?

²⁰Thiltampi namun ahinla najuipoi; nakhangho chu avangnan ahinla ajapon ahi.

²¹Achonphatna jal-in Pakai alunglhai tangeije; aman danthupeh chu aloupisah-a ja uma asemding ahi.

²²Ahinla amahohi agumanga leh asuthanghoi ahiuvin; amaho jouse kohoma thangkol ho ahiuvin, songkul inho-a kisela ahiuve. Amaho akithatgam ding ahiuvin, ahuhdoh dingu khatcha aumpon; suhchatvai ding ahiuvin, lepeh kitnun tia khatcha aumpoi.

²³Hichea nakhang sungdinga nalah uva koi nahiuvem? Ahunglhung ding phat ho dinga kon nangai uva, najahdiu ham?

²⁴Galthil kichom banga chomdinga Jacob pe-a, guchaho henga Israelte pedoh-a koiham? chonset iboluva idoupao Pakai chun apehdoh hilouham? ajehchu amaho alampiho-a achenom pouvin, adanthu jong ajuipouve.

²⁵Hijeh-a chu achunguva alunghana meikongle galkisat hattah chu abuhlhah khum ahi. Hichun akimvel meija ahalin, ahin amanla ahethei dehpon; hichun aka-in, ahivanga alungsungah aching dehpon ahi.