Read Thado Chin Isaiah 43 Bible Online

Isaiah 43 - Thado Chin bible

Isaiah 43

¹Ahinla tun, Vo Jacob, nasempao Pakaiyin, vo Israel natungdoh paovin kicha hih-un atin ahi. Ajehchu keiman kalhatdoh nahin, naminin kakouvin, keija nahitai.

²Twipi napalteng jongle umping ting; vadunghon jong nachup louding; meilah najot teng jongle, nakah louding ahi. Meikou deujejun jong naleogop louding ahi.

³Ajehchu keima Pakai na Pathen, Israel mithengpa nahuhhingpa chu kahi nangma lhatnadin Egypt kapen, nangma khelin Ethiopia le Seba kapei.

⁴Kamitmu-a lutah nahin, ja-umtah nahina jeh-in kangailun ahi. Hijeh chun nakhelin miho pengting nahinna dinga mitin kapeh ding ahi.

⁵Kicha hih-in, ajehchu keiman kaumpi nai, nachilhah solama konin hinpui jingting, lhumlama konin dongkhom inge.

⁶Keiman sahlam jah-a, hin pedoh-in, lhanglam jah-a, henden hih-in; gamlatah a konin kachapate, leiset kolmonga konin kachanute hinpuijin tinge.

⁷Kamina kikouchan chu kaloupina dinga kasema kagon ahin; henge, keiman ama kasem ahi.

⁸Mit neija khomulou leh, nakhang neija khojalou ho chu hinpui doh-un.

⁹Namtin vaipi jouse kikhom khomuhen, chule mipite kikhom khomuhen, alah uva koiham hiche phongdoh dingle thil um masa cheng eivetsah thei uva koiham? Athem chana dingun ahettohsah ho hinpuijuhen; ahiloule ngaijuhen chule adih ahi, tiuhen.

¹⁰Nangho keima hettohsah nahiuve tin Pakaiyin aseije: chule kalhendohsa kalhacha nahi; hitia chu keima neihet uva neitahsan uva, keimahi Ama kahi neihet nadinguva: keima masanga Pathen dang akisempon, keima nunga jong khatcha kisem louding ahi.

¹¹Kei, keima bou Pakai chu kahi, keima tailou huhhingpu dang aumpoi.

¹²Nalah uva gamdang pathen aum masangin keiman kaphong doh-in, kahuhhingun, chule kamusah-un ahi. Hijeh chun nangho keima hettohsah nahiuve, tin keima Pakaiyin aseije, keima Pathen kahi.

¹³Ahi, nikhoho umasanga keima Ama chu kahi; kakhutna kona ladohjou khatcha ana umpoi; keiman katohding chu koiham ajada dinga?

¹⁴Pakai na lhatdampu Israel mithengpan hitin aseije; nangho khohsahna jal-in Babylon'a sepai kasolin, amilaltehou jousele Chaldea ho kong-innei sunga peng jenjunin kahin puisuh-e.

¹⁵Keima Pakai na Mithengpao, Israelte sempa nalengpao chu kahi.

¹⁶Pakai twikhanglen'a kenglampi semaleh twihat sunga lampi sempan hitin aseije;

¹⁷Sakol kangtalai le sakol, sepaiho le athahat ho puidohpa Pakai chun hitin aseije. Amaho lumkhom uva thoutaloudiu ahin; amaho amit adelun, thaomei pat bangin akimutmit taove.

¹⁸Thil masaho geldaovin lang, tonlai thil jong ngaito daovin.

¹⁹Veuvin, keiman thilthah khat kabolding ahin, tu-a hungpotdoh ding ahitan; nahetlou diuham? Gamthiplai geija lampi khat kasema, nelgama jong vadungho kalonsah ding ahi.

²⁰Kamite, kalhentumho dondinga gamthipma twiho chule nelgama vadung ho kapeh jeh-a, gamlah-a gamsaho, dragon ho chule sumbupi hon eijabol dingu ahi.

²¹Hiche mitehi keiding tumtah-a kasem ahin; amahon keima vahchoina atahlang lediu ahi.

²²Ahinla Vo Jacob, nangmanla neikou pon, Vo Israel, nanghon neitheichim un ahi.

²³Nagovam thilpeh-a din ganchaneo neihin choipehjipon, ganlhaina injong neijabol jitapon ahi. Thilpeh-in nangma kana kijenkhahsah pon, gimnamtui jinjong kasugim khapoi.

²⁴Nangin sumin kolchulhum nachokhapon, naganlhai na sathaovin jong neivahva khapon ahi. Ahinla nachonset nao neipohsah-un, nakhangitlou naova neisugimun ahi.

²⁵Kei, keimong monghin, keile kei kikhohsah najala nasuhkhelnao thehmanga chu kahin, nachonset nahou kageldoh kit tahlou ding ahi.

²⁶Neigeldoh jingun; hungun ngaito khomu hite; them nachan theina dingun kisei phongun.

²⁷Napa masapen anachonsen, chuin nahil hou keima douna-in anasukhelun ahi.

²⁸Hijeh chun munthenga pipuiho chu kanasuboh-in, Jacob chu sapsetna-a, Israel chu i-sah louvin kana umsah tai.