Read Thado Chin Isaiah 44 Bible Online

Isaiah 44 - Thado Chin bible

Isaiah 44

¹Tuvangin Vo kalhacha Jacob, Vo kalhenchom Israel, ngaijun;

²Nasema leh naobu-a kona nahin gonga napanpi ding Pakai chun hitin aseije; Vo kalhacha Jacob chule vo kalhenchom Jerusalem, kicha hih-in.

³Ajehchu adangchah chunga twi kasuna, tolgolaija twi kasosah ding ahi. Nachilhah ho chunga kalhagao chule nasonho chunga kaphat theina kabuh lhah ding ahi.

⁴Amaho hampalah banga hungdon doh diu, twipanga huisum thingho bangdiu ahi.

⁵Khatnin, keima Pakaiya kahin; achomkhatma Jacob mina kikou ding; chule adang khatnin akhut tah-a Pakaiya ding tia ajih ding, chule Israel mina kiminvo ding ahi.

⁶ Pakai Israelte leng, alhatdampu janel Pakai chun hitin ati; Keima amasale anukhah kahin, kei tailou Pathen dang aumpoi, ati.

⁷Malai miho katundoh laija chu keima bolbanga koiham aboldingle aphongdoh dinga? chule abancha umsah ding? chule thil ahunglhung dingle ahunglhung saho chu amaho musah-u hen.

⁸Tija hih-un, kijong kicha hih-un; chuche laija patna kahilkhahlou, kaseipeh khahlou nahiuvem? Nangho kathu hettoh sahmong nahiuvin ahi. Keitailou Pathen dang umem? ahi, Pathen dang aumpoi, khatcha jong kahepoi.

⁹Alim semthuho abonun ahomkeo ahiuvin; anopsahnao thilho jong pannabei ahin; amaho chu amaho hettohsah ahiuve, ajachat theina diuvin amahon amupouvin, hejong ahepouve.

¹⁰Aphat chomna bei pathen le alim semthu milim sema koiham?

¹¹Vetan, aloiho jouse jahchao vintin, chule anatong amaho jong mihem bou ahiuve.

¹²Thih khengpan achoiche toh meihola agouvin, sehcha'n avotoh-in, aban thahatnin atongjin ahi; henge, ama agilkelin, ahatna angoilhajin, twila adonpon, alhadahjitai.

¹³Thingthem bolpan agolkaina ahinladoh-in; gol akaijin, amelchih-in; tolnam na-in atoltoh-in, vettohna-in amelchih-in, mihem gong bangin mihem hoina dungjuijin a-insunga aumden nadingin amelchih-in ahi.

¹⁴Aman cedar thingho aphuh lhun, khengthing le gangpi thing amadingin gammang lah-a akhansah-in ahi. Aman meila thing aphutnin gotuijin achapnoujin ahi.

¹⁵Chujoule hichu mihem dinga tiding hintin; ajehchu aman thing lah-a akehkhat chu akitikouvin a-oilumjin; changlhah akangjin; a pathen lim sem angsunga chun abohkhupmin ahoujin ahi.

¹⁶Aman phabep chu meija atih-in; sa go nan aneijin oiva nan anen; meisa chu a-oilumin, katejo, keiman lum kasatai, meimu-a kahitai atijin ahi.

¹⁷Chule thing moh chu pathen khatnin semthu milim ngeijin asemjin, a-anga aboh khupmin, ahouvin, ahenga ataovin, ka-pathen nahi jeh-in neihuh doh-in atijin ahi.

¹⁸Amahon anahepouvin, hetjong ahethem pouve; ajehchu amulouna diuva amitnu achotsah-a, ahetkhen themlouna diuva alungthimu akhachah ahi.

¹⁹Abang meija katih-in, henge, chua mei mama chun changlhah kakangin, sa kakigon kanei; achutile amohchu thet umtah khatna kasema, thingbul khat anga kabokhupma kahou diham? tin koiman alungin chihnale hetkhenna injong angaitopoi.

²⁰Ama vutna kivah ahin; lheplhahna lungthimin aheikon ahin, ahinna aman ahuhdoh theilouna dia kakhutjetna jou uma hilouham, atin ahi.

²¹Nangma kalhacha nahi jeh-in vo Jacob, le Israel hichehohi geldoh-in; kasemsa nahin, kalhacha nahi, Vo Israel, nangma kasuhmil theihoi nahipoi.

²²Keiman meilhang satah tobang nasuhkhelnaho le nachonset naho meibol tobang chu katheh mang tai; kahenga hung kile kitnin, keiman kalhatdoh nahitai.

²³Vo vanho hichu Pakai ahijeh-in la saovin; lei noilama umhon aovun; nangho mol ho, Vo gammang chule chua thingphung tinnin la san aodoh uvin, ajehchu Pakaiyin Jacob alhatdoh-in, Israel lentahle loupitah-in akichoi antai.

²⁴Pakai nalhatdohpao naobu-a kona nagongtoh paovin hitin aseije, keihi thiljouse sema, Pakai achangseh-a vanho jahdoh-a, leiset phajaopa chu kahi, ati.

²⁵ Mi jouho melchihna imalou so-a, doi-aithemho ngolsah-a; michingho nungnokit na, ahetnao ngolna-a sosah-a;

²⁶Asohpa thusei sudetpa, asottol ho thumop molsopeh-a; Jerusalem jah-a nangho chenna ding ahin; chule Judah khopiho jah-a, nangho kasahdoh kitna, alhusa munho kaphoh ding kitding ahi atipeh-e.

²⁷Twithuh jah-a kangin, navadung ho jong kakansah kitding ahi tipa,

²⁸ Cyrus jah-a, ama kakelngoi chingpa ahin, kadeijouse asuhbulhit ding ahi, Jerusalem heng jenga jong nangma, kisapha ding nahi tin, chule houin jah-a, na-inbul kisem phading ahi tipa chu kahi, ati.