Read Thado Chin Isaiah 45 Bible Online

Isaiah 45 - Thado Chin bible

Isaiah 45

¹Pakaiyin hitin aseije, athao nu Cyrus jah-a namtin vaipi a-anga sunem dingle, lengho konggah lhamkang ding, amasanga pehni kisuto kotpiho hongdingle, khahkit loudingin, akhut jetna katuh chahpa henga chun hitin aseijin;

²keima namasanga chengting, akonlaiho kajansah ding; sum-eng kotpiho kavohchima, thih kotgol ho kasatkhen ding ahi.

³Chule keima Pakai, namina nakoupa, Israel Pathen chu kahin, keima neihet theina dinga goukhol le munthipma kiselgu sumjong kapeh ding nahi.

⁴Kalhacha Jacob le kalhen chom Israel jala namin monga kakou nahi, nangin neihetlou vanga keiman kaminvo nahi.

⁵Keihi Pakai chu kahin, adang aumpoi, kei tailou Pathen dang himhim aumpoi; neihetlou vanga nakong kagahpeh nahin;

⁶Kei tailou adang aumpoi. Keima Pakai chu kahi, adang him him aumpoi, ti nisolama pat nilhum lam geija miten ahet theina diu ahi.

⁷Keiman khovah kagong doh-in, muthim jong kaseme, chamna kasemin, setna jong kaseme, kei Pakaiyin hitiho jousehi kabol ahi.

⁸Nangho vanho, chunga konin hung julhaovin, chule vandum hon chonphatna hinsunglhaovin, leiset kihonghenlang huhhingna sodoh-u hen, chonphat nato hung kedoh thaohen; keima Pakaiyin hichu kasem ahi.

⁹ Asempa kinelpi chu ohe! ada ahi: beldengpa bel hal chu leiset bel hal to kinel hen. Bon nganin asempa henga, ipi sema nahim? ahiloule nathilbol chun aman khut kaneipoi tintem?

¹⁰Apa jah-a ipi hinga nahim? ahiloule anujah-a ipi nana hindoh hitam? tiachu ada ahi.

¹¹Pakai Israel mithengpa le asempaovin hitin ati, kachate chungchanga thil hunglhung dingchu neidongun, chule, kakhut natoh chungchang thu neipeuvin.

¹²Leiset hi kasem ahin, achunga mihem jonghi kasem ahi, Kakhut ho-a vanho kajahdoh-a, janelho jong kathupeh ahi.

¹³Ama chu chonphat na-in kakhou khah-in, alampi jouse hilinge. Aman kakhopi asahdoh-a, kasohchang ho alhadoh ding, kipamanle tohphat man thil peh-a ding ahipoi, tin janel Pakaiyin aseije.

¹⁴Pakaiyin hitin, ati, Egypt tohgimna le Ethiopia le Sabea mite sumkolvei ho, misang tahtah ho chu naheng lama hunguva nanga hidiu ahitai. Nanung ahin juijuva, thihkhaova kihenpuma hung galkaijuva, na-anga bohkhup uva, chibai nabohdiu, nahenga lungsetna angeh uva tahbeh-in Pathen nangma-a aum monge, adang aumpoi, Pathen dang himhim aumpoi atidiu ahi.

¹⁵Vo Israel Pathen, huhhingpa kisel thipbeh Pathen tahbeh mongchu nahi.

¹⁶Amaho jahchaova abonchauva kisudongdiu; milimsem amaho chu lungnoh phah puma lutkhom diu ahi.

¹⁷Israel vangchu Pakaiya tonsot huhhingna-a huhhing-a umdiu ahin; nangho tonsot geija jahchalouva akhonna beija kisudong louding nahiuve.

¹⁸Ajehchu vanho sempa, Pakai, leiset sutoh-a, sema tungdohpa, aman agohkeo asem hilouva chenna dinga anagong dohpa Pathen amatah chun hitin ati; Keima Pakai chu kahin koima cha dang aumpoi,

¹⁹keiman leiset munthim mun'a guhthimin thu kaseipoi, keiman Jacob chilhahte henga agohkeovin neiholun katipoi, Pakai keiman chonphatna kaseijin, thudih bou chu kaphondoh ahi.

²⁰Nangho namtin lah-a asohcha chengse kikhom munlang, hungun, hinnai cheh-un. Thing semthu milim tungdoh-a, ahuhhing theilou diu Pathen henga taoho, amahonla hetna aneipouvin ahi.

²¹Seipeh unlang hinpui naijun; thu kimopna chu sang uhen, masang laija patna kon aphondoh khah em? chulai apat kon nanahil um? Pakai keimahi kahilou ham? Pathen dihle huhhing-a Pathen dang aumpoi, kei tailou adang aumpoi.

²²Leiset kolkimvela mi jousen keilam hinveuhen lang huhhingin umuhen; keima Pathen kahin, koimacha dang aumpoi.

²³ Keile kei kaki hahsel in, kakama kona chonphatna thu potnachu hungkilekit louding ahi. Chutia chu khup jouse ka-anga dilsua, lei jouse kihahsel ding ahi,

²⁴dihtah-in min Pakaiya chun chonphat nale thahatna kaneije tin seijinte; ama henga mi hunga; ama douva lunghansah jouse chu jahcha ding ahiuve.

²⁵Israel chilhah jouse chu Pakaiya them changa loupidiu ahi.