Read Thado Chin Isaiah 46 Bible Online

Isaiah 46 - Thado Chin bible

Isaiah 46

¹Bel chu akunin, Nebo [4] chu abungin, amilim hou chu sahole aganchahou chunga aumuve; nathilpoh-u pohgih tah ahin, gancha thachol dinga pohgihsa ahi.

²Amaho abungun, akuncheh uve; amaho pohgih-a chun ahoidoh pouvin, gal hinga kaimangin aumjo taove.

³Vo Jacob insungle Israel insung amohchengse, ka-oisunga patna kavopma, naobu-a kona kapensah hon kathu ngaijun.

⁴Nateh geija jong kei Ama chu kahin; nasamkan geija jong kapoh ding nahi; kasemsa nahin, chule keiman vop ingting kapoh-a; kahuh hingding nahi.

⁵Koito kilo neisah uva, neikibah sah uva, neitekah uva, chule kakibah thei dinguham?

⁶Amaho dipma kona sana anopnopma manga, dangka akitena-a kitedoh-a, sana khengkhat thalah-a; pathen akisemsah-a, a-anga bohkhup jia chibai bohjia ahiuve.

⁷Amahon hichu aleng kou uva adomdoh uvin, apojiuvin, ama munna atungjiove, ama akitung denin; aumna-a konin akichon jitapon ahi. Ahi, min ama kou intin, amanla donbut theilou ding, agimna-a kona jong ahuhdoh theilou ding ahi.

⁸Vo suhkhel neiho, hichehi geldoh-un; miho kimusah unlang lungin geldoh kitnun.

⁹Khanglui laija thilmasaho geldoh-un, keima Pakai kahijeh in adang khatcha aumpoi, keima Pathen kahin, keitobang himhim aumpouve.

¹⁰Abula pat akichainagei, chule masang laijapat akibol loulaiho jong kaseiphong ahitai, kathumop ding jingintin, kanopchan kabolding ahitai, ati.

¹¹Solama kona vacha lol hattah khat gamlatah-a kona kathumopsa tongdoh dingpa chu kouvin; henge, kaseisa ahin, kagui lhunsah ding ahin, kangaitosa ahin boljong kaboldoh ding ahi, ati.

¹²Chonphatna-a kona gamla-a lungtah-a nanghon kathu ngaijun;

¹³kachon phatna hi kahinpo naitan, hichu gamla talou ding, ka huhhingna jong umjing louding ahi. Kaloupina Israelte dinga huhhingna chu Zion'a kakoiding ahi.