Read Thado Chin Isaiah 47 Bible Online

Isaiah 47 - Thado Chin bible

Isaiah 47

¹ Vo nungah theng chanu, hungkum lhanlang leivuilah-a touvin, laltouna aumpon, Vo Chaldea mite chanu; ajehchu nangma nouchetle nomsa kitikit talou ding nahi.

²Sumhei songho lanlang chang goijin napon lukhuh hoh-inlang, kengkeuvin umin, na pheipi hohdoh inlang, vadungho palgalkai jin.

³Nasagohkeo chu khulouvin umintin; najamo kisel chu kimuding ahi. Phu langting, mihembanga nangma kakimupi louding ahi.

⁴Eilhatdohpao chu Israel mithengpa, janelho Pakai chu amin ahi.

⁵Chaldea te chanu thipbeh in touvin lang, muthima lutnin, ajehchu lenggam ho pakainu kitijom louding nahitai.

⁶Kamite chunga kalungsan, kagouloho kasuboh-in, amaho chu nakhutna kanapeluttai; nanginla hepina nanamusahpon; golluiho chunga napohgih tah namkoljon chu na-ngapkhum tai.

⁷Nangin imatihchanna pakainu kahijing ding ahi nanatin; chutichun nangin hiche hohi nalunga nanakoi pon khonunga akichaina diujong nanageldoh him himpoi.

⁸ Hijeh chun tun anop nopma uma, chavaitah-a chengnu, alungsunga keitailou adang aumpon, keibou kahin; meithai banga toulou ding kahi, chate thi thu jong hehih helinge, tia seinun ngaijin;

⁹ahinla hiche thilni, chate thinale meithai hinahi nikhatsunga hetmanlouva nachunga hungchu ding ahi. Hicheho chu namitpheldoi ho tamjeh le, kilhim ngolna bulhin lheh jeh-a nachunga lhingsetna hungchu ding ahi.

¹⁰Ajehchu nakhansetna natahsanin, koiman eimupoi natin ahi. Nachihnale nahetna in naheimangtan; nalungsunga keima kahi keitailou adang himhim aumpoi natin ahi.

¹¹Hijeh-achu thilse nachunga hungchua hi hoija hung kipan ahi nahetlouding; setna nachunga hungchu ding; hichu nasuhmang joulou ding; chule nahet loubeh ding manthah na nachunga hung chuphung ding ahi.

¹²Tun naki lhim ngolnale namitpheldoi themna tamtah, naneolaija patna nahinjilna chun naphat theipi jouva, najo thei khattou dingle dinpi tan,

¹³nathumop tamjeh-in nacholtan ahi. Tun ahsi lekhathem ho, ahsi velhi jingho, lhatina khonunga hunglhung ding melchih themho dingdoh uhenlang, nachunga hung chudingho-a konin kihuhdoh sah-in.

¹⁴Veuvin, amaho changpol bangbep hiuvintin; meijin akahvamdiu; meikong thahat na-a kona amahole amaho kihuhdoh loudiu; kisahlum nading mei-am tobang hilouva, amasanga tounangam mei tobang jong hilouding ahi.

¹⁵Nangdinga naneolaija patna nasumkol veipiho, chule nanatoh gimpi amaho jengtah jong chutichu hintin, amaho khatcheh-a a-inlam cheh-a vahmanga, koimachan nahuhhing louding ahi.