Read Thado Chin Isaiah 48 Bible Online

Isaiah 48 - Thado Chin bible

Isaiah 48

¹Vo Jacob insung Israel mina kivo-a Judah twiho-a kona sohdoh-a, Pakai mina kihahsel, thutah le chonphatna-a hilouva Israel Pathen min panho: hichehi ngaijun.

²Ajehchu amahole amaho khopitheng mi akihisah-un, Israel Pathen chunga akingaijui; ama minchu janel ho Pakai ahi.

³Masanglai thilto chu abula patnin kaseiphongin; kakama kona sohdoh ho chu amaho kamusahtai; hiche ho chu kabol phunga guilhung jeng ahi.

⁴Ajehchu nangma milouchal nahi ti kahen, na-ngong chu thih khao ahin, nachalpang chu sum-eng ahin;

⁵Hichu atila patna nahenga kaseija, ahung guilhun masanga kamusah nahitai. Achutiloule nangin kahou milim, alim semthu, kamilim kilhajolin abol ahi tikhan nate,

⁶nanghon najataovin, hicheho jousehi namutaovin; chule naseiphong loudiu ham? tua patnin thilthah ho, thil kisel ho, nanghon nanahetlouho chu kamusah ahitai.

⁷Amaho tun akisemtai, abula patna ahipoi; najah masang nikho jongchu ahipoi; achutiloule nangin, veuvin, ken amaho kahei, tikhan nate.

⁸Ahi, nanaja khapon, nanahe khapoi; hichelaija patchun nanakhang ana kihongpon ahi; tahsanlel nahin, naobu-a patna suhkhelnei nakiti dingchu kanahen ahi.

⁹Ajehchu kamin jala kalungsatna-a kakitima, eikipachat nading jeh-a nangma kasuhtana dinga kona kitima kahi.

¹⁰Vetan, keiman nangma kalhah theng nahitai, sum-eng bang hilouvin, suhgentheina meilhum sunga kalhah nahi.

¹¹Keimajal leh keimatah jala kabolding ahi; Ajehchu kaminhi ibola suhboh a umding ham?

¹² Vo Jacob le kakou Israel, kathu ngai phaovin; keihi amachu kahin; amasale anukhah jong kahi.

¹³Kakhutnin leiset bul jong hi aphudoh ahin, kakhut jet hin vanho chu akaijala, amahochu kakoutengle dingdoh khom jengjiuva ahi.

¹⁴Nangho nabon chaovin kikhomun lang ngaijun; hiche thil ho hi alah uva koipenin aphondoh khah em? Pakaiyin ama alungsetnin; aman Babylon chunga anopnop abolin, akhut chu Chaldea miteho chunga chuding ahi.

¹⁵Kei, keimatah mongin kasei ahitai; amachu kakouvin; kahinpuijin, aman alampi akhantousah ding ahi.

¹⁶Nanghon neihin naijun lang hichehi ngaijun; atila patnin keiman guhthimin thu kaseipon; phat aumtila patnin hia chun keima kaumin; chule tuhin Pakai Pathen le alhagaovin eisoltai.

¹⁷Pakai nalhatdohpao Israel mithengpan hitin aseije, keihi Pakai na Pathen, naphatnadiuva hila, nachenadiu lampia puihoipa chu kahi.

¹⁸Vo nanghon kathu peh ho chu nangaiju hitavele! nachung uva chamna vadung banga longa, nachon phatnao twikhanglen kinong bang hitading!

¹⁹Nachilhah-u jong neldi jat phantin, nalaigilgao sonho jong nel bongsilsel bang ding, kamasanga kona aminu kithai mang louding, suhtanga jong umlouheldiu ahi.

²⁰ Babylon'a konin potdoh-un, Chaldea mite-a konin jam mangun, hichehi lasah ginnin phongjal unlang, leiset kolkimvel geijin seiphongun, Pakaiyin asoh Jacob chu alhatdohtai tiuvin.

²¹Aman nelgam jotpaija apuilaijin adangchah pouvin; songpi-a konin amahodin twi alondohsah-in, songpijong akesah-in, twi chu ahung kikhodoh jengin ahi.

²² Pakaiyin migiloute dingin chamna himhim aumpoi, ati.