Read Thado Chin Isaiah 49 Bible Online

Isaiah 49 - Thado Chin bible

Isaiah 49

¹Vo twikol gamho, kathusei ngaijun; gamlatah-a konin miten ngaijuvin; Pakaiyin naobu-a kona einakouva; kanu oisunga kona kamin anasah sa ahitai.

²Aman chemjam hemtah bangin kakam anasemin; chule aman akhut lima einaselin, thalchang kinot dulin einasemin, alivathei sunga einaselin ahi.

³Kahenga, Vo Israel, nangma kalhacha kaki choi-atna dingpa chu nahi anatin ahi.

⁴Chuin keiman, mohseh-a tonggima kahitan, kathahatna imacha hiloule mohseh-a kaman ahitai. Hitajongle kathutana chu Pakai toh um ahin, kathilbol chu Pathen to uma ahi, kati.

⁵Chule tun Israel chu anakikhom khomlou hitajongleu, naobu-a patna alhacha-a pangdinga einagonga, Jacob chu ahenga hinlepuikit dinga, Pakai mitmu-a keima loupinalai dingle ka Pathen chu kathahat hidinga einagongpa Pakai chun aseije.

⁶Chuin aman Jacob phungho tungdoh dingle, Israel vetupma lepehkit dinga kalhacha-a napanding chu thil jangkhaicha ahi, ati. Leiset kolmong geija nangma kahuhhing nahiding, chidang namdangte salvahna dingjong kapeh ding nahi.

⁷Tahsan umtah Israel lhatdohpale, amithengpa, mite i-sah loupa, namtin hotbolpa, vaipoho sohpa henga chun Pakaiyin hitin aseije; Tahsan umtah Pakai Israel mithengpa aman nang nalhendingjehin: lenghon amuteng thoudohdiu, leng chapatenjong chibai abohdiu ahi.

⁸Pakaiyin hitin aseije, lahphat chan natao nao kangaijin, huhhing nikhon nangma kapanpin, chule nangma nahongbit ningting, Leiset tungdoh dingle goulo kamhelsa gam lodinga miho thulhun hidinga kapeh ding nahin;

⁹chutia chu sohchangho jah-a potdoh taovin, chule muthima umho jah-a hungkilahdoh un natiding ahi. Lamdunga kivah-untin, munsang jouse-a alhatlenao mun umding ahi.

¹⁰ Amaho gilkel dangchah talou ding; alumle nisanjong akahnat loudiu ahi. Ajehchu ahepi paovin puihoi jintin, twisam putna pang dunga apuilediu ahi.

¹¹Chule kamolsang jouse lampin semingting, kalamlhongho kadop sang ding ahi.

¹²Veovin, hiche hohi gamlatah-a kona hungdiu ahin; chule vetan, hiche hohi sahlamle lhumlama kon; chule hiche hohi Sinim gama kona hungdiu ahi.

¹³Vo vanho; kipala saovin; Vo leiset, thanomin umin; Vo molsang ho awthong jeju-a lasahnan pohjah-un. Ajehchu Pakaiyin amite alhamonin, akibol gentheinao chunga ahepiding ahi.

¹⁴Ahinla Zion'in, Pakaiyin eidalhan, ka Pakaiyin eisumil tai, ati.

¹⁵Numei jin anao noicheplai asuhmiljouva, ataijola peng achapa lainat louva umthei dingham? henge, amahon sumil theijunte, hijengjongle kenvang nangma kasuhmil louhel ding nahi.

¹⁶Ven, kakhut phang chunga kasemdoh nahin, nakulbang ho kamasanga aumjinge.

¹⁷Nachate chu ki kino uvintin; nasumanghole panabeija nakoi houchu nanga kona potdoh ding ahiuve.

¹⁸Khoda-in lang nakimvel vetemin, hiteho jousehi akikhom khomun, nahenga ahunguve. Pakaiyin keima kahingjingnai, nangin amaho jousehi thonlouhela kijepna-a naneiding, mounu kijep banga nachunga kijepna-a nanei ding ahi, ati.

¹⁹Ajehchu mun ongle namun kamhelsa ho, chule namanthah nao gamhochu tu-a chengho dinga chu neo behseh ding ahin, chule naval lhum hou chu gamlatah-a kitolmangdiu ahitai.

²⁰Adangho namansah nunga nacha nahin dingho chun, munhi kadingin aneubehseh-in, kachenna ding mun neipen tia nanakhanga aseikitdiu ahi.

²¹Chuteng nangin nalungsunga, kon eihinpeh hitantem? Kachatela kachan joutan, akamhela kahin, sohchanga suhle tunga kichonlea kahilouham? vetan, kachang seh-a eikidalha-a, amahohi hoija anaum hiuvintem? natiding ahi.

²²Pakai Pathen'in hitin aseije, veuvin chidang namdangho chunga kakhut kadopsanga, miho dinga kaponlap katundoh ding; chule amahon nachapateo akhutnuva ahinpuijuva, alenguva nachanuteu ahinkitot dingu ahi.

²³Lengho chu nadontup uva pate hung hiuvintin, chule lengnu ho jong chu nadontup nu-u hiding ahiuve. Amaho na-ang uva amaiju tolam ngatna bohkhup uva, nakenga leivui ahinle ngimdiu ahin; chutia chu keihi Pakai chu kahi ti nahet jengding ahi. Ajehchu keima eingah ho chu jahcha louhel ding ahiuve.

²⁴Mihatpa-a kona anehban kilahpeh theija, ahiloule dandih-a gal hinga kikai chu, sohchathei ding ham?

²⁵Ahivangin Pakaiyin hitin aseije, sohchang mihat tahho jeng jong kilamanga, gin umtah nehban jong kisalhah peh ding ahi. Ajehchu nangma kinelpipa chu kinelping ting, nachate chu kahuhhing ding ahi.

²⁶Chule nangma sugenthei hochu amaho tahsa tah-a kavah-a, ju lhumtah banga amaho thisantah chu adonkhamdiu ahi. Chutengle tahsa hing jousen keima Pakai chu nahuhhingpa, nalhatdohpa le Jacob mihatpa kahi ahetdiu ahi.