Read Thado Chin Isaiah 51 Bible Online

Isaiah 51 - Thado Chin bible

Isaiah 51

¹Chonphatna nung juija Pakai holte nanghon kathu ngaijun; nakikhendoh nao songpile nakilaidoh nao kokhuh lamchu veuvin.

²Napao Abraham le nahingu Sarah lam veuvin; ajehchu achang seh-in kakouvin, phatthei kanaboh-in kapunsah-e.

³Ajehchu Pakaiyin Zion lhamon nintin, amunthip jouse lhamon inte, agamthip chu Eden bangin semintin, chule aneldigam chu Pakai hon bangin semintin, asunga chu kipanale thanopna, thangvahnale la ngei gin kijading ahi.

⁴Kamiten kathu ngaijunlang, Vo kanam mite nanakhang hinsung uvin; ajehchu keija kona danthu hung kondoh-a, mitin salvah dinga kathutan na chu kakicholdo sah ding ahi.

⁵Kachon phatna nikho ahungnaijin; kahuh hingna apotdohtan, kabantenin mitin thu atanding; twikol gamhon eingah untin, kabanna hi atahsan nao angap dingu ahi.

⁶Van lama khodah-un lang, chule noilam leiset chung hinveuvin; ajehchu vanho chu meikhu banga jam manga, leiset hi ponsil banga chulding ahin, chutobanga chu asunga chengho thidiu ahin, kahuh hingna vang atonsotna umjinga, kachon phatna kisumang louding ahi.

⁷Chonphatna he-a alunga kadanthu he-ah nanghon kathusei ngaijun; mihem seiset ginghih-un, ahousetnau jong kicha hih helun.

⁸Ajehchu ponsil banga amaho ngetnin aneh uva, samul banga lungin anehdiu ahin, kachon phatna vang a-imatih chana uma, kahuh hingna akhang akhanga umding ahi.

⁹O Pakai banjang; Khangin, khangin, thahat na-in kivonin; masanglai nikhole khanglui laija bangin khangin, Rahab [5] sat na, Dragon mavo-a chu nang nahilouham?

¹⁰Nanghi twipi thuh nasatah twikhanglen kansah-a, lhatdohsate galkai nadinga twikhanglen thuhtah laija lampi sema chu nahilouham?

¹¹Hijeh-a chu Pakai lhatdohsate hungkileuva, lasahpuma Zion lama hungdiu, aluchung uva tonsot kipana chu umding ahi; amaho kipanale thanopna chang-un tin; lungkhamnale lunghemna jam mangding ahitai.

¹²Keima, keimong monghi nangho lhamon na chu kahin; athiding mihem, hampa bangbepma kisem mihem chapa kichading koi nahiuvam;

¹³Vanho kijaldoh sah-a, leiset bul phutdetpa, nasempa Pakai na Pathen sumila, suhmang dinga nanago jing misugenthei pa lungsatna jeh-a niseh-a tanglouva kichajing nang koi nahim? Misugenthei pa lungsatna chu hoiba hitam?

¹⁴Kokhuh sunga athilouna dingle anehjong alhahsap lounadingin, gal hinga kikaimang chu lhadoh-a aumna din ama akinon ahi.

¹⁵Ahinla akinong ginglellul twipi homkhenpa Pakai na Pathen chu kahin, kamin janelho Pakai ahi.

¹⁶Vanho kaphudetna, leiset bul kavui detna, Zion henga nangma kamite nahi kati theina din, kathuho nakam sunga kakhumin, kakhut limmin nangma kakhu khumin ahi.

¹⁷ Pakai khutna alungsatna khona dona, vo Jerusalem, khangin, khangin, dingdoh-in, kichat jeh-a kitihona khona kon aningkai geijin nadonin, nadon kang hele.

¹⁸Amanun ahindoh chapa jouse lah-a, amanu puihoi ding khatcha aumpoi; ahin vahdoh chapaho jouse lah-a jong akhutna akaile khatcha aumpoi.

¹⁹Hiche thilni hin nahin lhunkhum ding ahin, kon nalungkham peh tantem? Gamnale suhmangna, kel lhahna le chemjam; koijin nang nalhamon tan tem?

²⁰Nachapate alhadah taovin, gam bongchal len thanga oh bangin khosung lamlen laija alumchap mun; amaho Pakai lungsatnale na Pathen'u phosalna dimset changa ahitaove.

²¹Hijeh chun tun lengpitheija hilouva, suhgentheina-a khampan hichehi ngaijin.

²²Pakai na Pakai, amite thu seitohpeh-a na Pathen chun hitin ati, vetan, lamvaina khonle, kalungsatna ningkai khontah chu nakhutna konin kaladohtai; nadonkit tahlouhel ding ahitai, ati.

²³Ahinla nahinna jah-a, nachunga kache theinadiuvin bohkhupmin, tia nasugenthei ho khutna chun tollhang bangle kholai lamlen bangin nachunga lamjot ho dingin natahsa nadotan ahi.