Read Thado Chin Isaiah 53 Bible Online

Isaiah 53 - Thado Chin bible

Isaiah 53

¹ Kathulhut nu kon atahsana? Pakai bantha koihenga kilah-am?

²Ajehchu ama amasanga chun hamdong kehthah bangle leigo-a ajung kikhodoh bangin hungkhangdoh-in tin, aman limle melhoina himhim aneipon, ideina diu hoina himhim aumpon ahi.

³Ama chu mihemte nahsahmole paidoh-in aumin; lungdon le lung genthei he mi ahin; eihon ama-a konin imaiju ina selmangun, amachu nahsahmon ana umin, eihonjong ina gelsangdeh pouve.

⁴ Atahbeh-in aman ilungkhamnahou apon, chule ilung gentheinahou apotai, ahinla eihon aki engbol, Pathen vohle sugentheijin ingaitouve.

⁵ Ahinla ama eiho suhkhel jeh-in akimavon, eiho khangitlou jeh-in akisugepmin, eiho lungmona dingin gimbolna chu amachunga achutai. Ama kijepna chun eidamsah taove.

⁶ Eiho ibon chaovin kelngoi bangin ivah mangun, eiho amitakip inop nalam cheh-a ikiheijun, ahin Pakaiyin eiho khangitlouna jouse achunga angamtai.

⁷ Ama akisugen theijin, ama akibolgimtai, ahijeng vangin ama akamkapoi. Ama thadinga kikai kelngoi bangin akaijun, kelngoi amulvouho anga athipbeh bangin chutichun akamkapoi.

⁸ Ama sohchan nale thutan na-a konin akilamang tai. Kon ama khanggui thu asut thei dingham? Ajehchu ama mihing gama kona kisumanga ahitai. Ajehchu kamite suhkhel jeh-a ki-engbola ahitai.

⁹ Aman hunamin ima abolpon, akamin jong lheplhahna thu khatcha aseikhapoi; aman alhankhuh chu migiloute-a toh asemgomin, athi-a chun mihaopa toh aumkhom me.

¹⁰Hitajongle suhgep dingchu Pakai lunglam chu ahitan; aman natna athohsahtai. Nangin ahinna chonset thilto-a nasemtengle, aman achilhah kimuntin, anikhoho asaosah ding, Pakai lunglhaina chu akhutna khangtou ding ahitai.

¹¹Aman ahinna thohgimna chu amua, lunglhai ding ahitai. Aman agitlounau apohpeh dingjeh-a kasohdih tah chun ahetna-a mitamtah them achanding ahi.

¹² Hijeh-a chu keiman amachu milenhotoh chan kahop peh-a, aman mihat ho chu thil kichom akihoppi ding ahi. Ajehchu aman thina geijin ahinna abunglhan ahi. Chutichun ama suhkhel hotoh akisimthatan; mitamtah chonsetna apon, achonkhelho dingin ataopeh-in ahi.