Read Thado Chin Isaiah 54 Bible Online

Isaiah 54 - Thado Chin bible

Isaiah 54

¹ Vo achinga chaneilou nun kipah-in la san lang, hatah-in samin; naosonat thohkhalou nu nangma, ajehchu jineiho chate sangin achingnu chate atamjoi, tin Pakaiyin aseije.

²Napon in mun kehlenin lang, chule nachen detna pon in chungchu kijalsah-in, khen neilouvin nakhao chu saosah-in lang, chule ahenna mol ho chu khendetnin;

³Ajehchu jetle veija kithejah intin, nachilhah hon chidang namdangte chu louvintin, khopi gamho chu chenna-a aneidiu ahitai.

⁴Kicha hih-in; ajehchu najachat louding, nakisuhdong louhel ding ahi. Ajehchu naneo laija najachatna nasuhmila, na meithai nahsah louva aumna chu nageldoh kit louhel ding ahitai.

⁵Ajehchu nasempa chu najipa ahin, janelho Pakai chu amin ahi. Nalhatdohpa chu Israel mithengpa ahin, ama chu leiset pumpi Pathen kitiding ahi.

⁶Ajehchu akidalha lhagaova lungnatah neogol ji kideitalou numei khat tobanga Pakaiyin nakoukit ahitai, tin na Pathen'in aseije.

⁷Phat chomcha dinga kadalhahsa nahitan, ahinla hepina lentah-a kakhopkit ding nahi.

⁸Lungkhamna neochakhat jeh-in mitphehkah louvin nanga kamai kanaselin, ahinla tonsot khotona-a kahepi nahi, tin nalhat doh-a Pakai chun aseije.

⁹ Ajehchu keidin hichu Noah nikho tobang ahi, Ajehchu Noah twi chun leiset achupkit louding ahitai, tia kahahsel bangchun nachunga lunghangkit, phohsal kit taponge tia kaki hahsel ahitai.

¹⁰Ajehchu lhangho kitoldoh-a, mol ho kitolmang ding ahin, ahinla kakhotona chu nanga kona kitoldoh louding; kachamna jong nanga kona kichondoh louhel ding ahi, tin, nahepi-a Pakai chun aseije.

¹¹ Vo nang bolgenthei khopi hui mutlon lele, lhamong lou, vetan, nasongho chu ajemhoija kaphua, na inbul chu saphir songa kaphu detding ahi.

¹²Chule nabangkot ho song sandang, chule nakotpiho song santhip, chule nagamgi jouse song hoitah-a kasemding ahi.

¹³ Chule nachate jouse chu Pakai hildoh hidiu, nachate chamna chu nasatah hiding ahitai.

¹⁴Chonphatna-a naki phudetna, suhgentheija kona gamlatah nahiding ahi. Ajehchu tijatna-a kona nakichat louding ahi. Ajehchu hichun nahin nailouding ahitai.

¹⁵Vetan, amaho kikhom khom teidiu ahin, keija konvang hiloudiu ahi. Nangma douna-a kikhom chanchu nangma vanga lhudiu ahi.

¹⁶Vetan, keiman pummeija meihol japma, thihkhengpa anatoh nading manchah kikhendohpa chu kanasem ahin, asumang ding thilsumanghelpa jongchu kanasem ahi.

¹⁷Nangma douna-a galmanchah kigon ho chu lolhing louding; chule thutan na-a nangma douva leigui takipchu themmo nachang ding ahi. Hichu Pakai sohte goulo ahin, achonphatnao chu keija ahi, tin Pakaiyin aseije.