Read Thado Chin Isaiah 55 Bible Online

Isaiah 55 - Thado Chin bible

Isaiah 55

¹ Khaije, adangchah channin twiphung hinjon hen, chule sum neilou chan hungun lang kichoh-un, chule neovin; henge, hungun, lengpitwi le bongnoi sum beija manbeijin hung kichoh-un.

²Ipijeh-a changlhah hilouva sum nasuh manguva? chule van'a louhella natohgim uham? Kaseihi lunglut tah-in ngaijun, nanghon apha chu neuvin, chule nahinnao chu thaona-a chun kipah hen.

³ Nanakol-u hinsungun lang kahenga hungun; ngaijun, chutile nahinnao chu hing ding ahi. Chutile David kihepina tahbeh chu naheng uva tonsot kitepna-a kasem ding ahi.

⁴Vetan, miho dinga hettohsah hidingin amachu kapen, miho dinga lamkainale thuneina amachu kapei.

⁵Ven, nahetkhahlou namkhat kouvin natin, Pakai Pathen vangle Israel mithengpa jala nangma hekhalou namhochu nahenga hungjam diu ahi. Ajehchu aman nachoi-at ahitai.

⁶Mutheija aumpetnin Pakai chu hollun, nailama aumpet nin amachu kouvun.

⁷Migilouvin alampi dalha hen chule chonpha loupan alungngaito dalhahen; Pakai hengle i-Pathen'u henga hung kilehen, chutile hepina changa chamkimtah-a ngaidam hiding ahi.

⁸Ijeh inem itileh kangaito hohi nangho ngaito ahipon, nalampi hou jong kalampi ahipoi, tin Pakaiyin aseije.

⁹Ajehchu leiset sanga vanho asanjoh bangin, keima lampiho jong nangho lampi ho sangin asangjon, chule keima ngaito hojong nangho ngaito ho sangin asangjoi.

¹⁰ Ajehchu gotwi le buhbang van'a kona ahunglhah-a, chunglama kilekitlouva, leiset achapnou joh-a thil akedohsah-a chule amumdohsah ahin, muchi thepa muchi-a apeh nadingle, anneh-a hingpa changlhah apehnadinga ahi.

¹¹Kakam sunga kona potdoh thuchu chutiding ahin, hichu agoh-a hungkile louhel ding, kadeichu asuhbulhitna, kasolna thilla chu lolhingjo ding ahi.

¹²Ajehchu kipah-a kondoh a chamdela nakipuidoh diu, molle lhanghon namasanguva penga la asahdoh jenguva, chule loujaova thingphung jousen khut abehcheh diu ahi.

¹³Lingthing khella chahthihg kehdoh-a, khao lingnei khella lenmuipah phung kehdoh ding, chule Pakai dinga minphatnale suhtan hi louhel ding tonsotna melchihna ding chu hiding ahi.