Read Thado Chin Isaiah 56 Bible Online

Isaiah 56 - Thado Chin bible

Isaiah 56

¹Tonsot Pakaiyin hitin ati, thukitan chu nit uvin lang, adih chu bollun; ajehchu keima mihuhhing na hunglhung loiding ahitai, chule kachon phatna hungkiphong doh ding ahitai.

²Hiche bolpa hi anunmon ahi; mihem chapa hiche tuhchah jingpa; suboh louva cholngah nikho nitjingpa, chule akhut thilse bolna-a kona tuhtang jingpa chu ahi.

³Gamdangmi chapa, Pakai to kijop matsa chun Pakaiyin amite-a konin eichom khomheltai tin seida hen, nukiso jongchun, vetan, keima thinggo kahitai tin seidahen.

⁴Ajehchu Pakaiyin hitin aseije, nukiso keima choldo nikho jouse nitjinga, kalungdeilam kilhenna, chule kakitepna tuhjingpa chu;

⁵keiman amahotah chu ka-insungle kakulbang sunga munkhat, chapate le chanute sanga phajohel munkhat le minkhat kapeh ding ahi. Keiman amaho amangkit louheldinga tonsotna umjing ding min kapeh ding ahi.

⁶Gamdang mi chapate Pakai toh kijopmat ho, ama jenna dingle Pakai min ngailutna dinga, ama soh hidinga, choldoni suhbohlouva nitjinga, chule kakitepna tuhchah chanjong chu;

⁷ amaho ngei chu kalhangthenga kapuija, kataona insunga kipana kadimsah ding; agovam thiltohoule akithoina houchu ka maicham chunga sanpeh hiding ahi. Ajehchu ka-in chu mijouse dinga taona in kitiding ahi.

⁸Israel kinodohho chomkhom Pakai Pathen chun aseije, ahenga kichomsaho tailouva, adangho jong ahenga kachom khombe nahlai ding ahi.

⁹Loujaova gamsaho jousen hungne jouvun; ahije, nangho gam manga gamsaho jousen jong hungneovin.

¹⁰Akhongah hou chu mitcho ahiuve, ima heloucheh, abonchauva uicha hamma hamtheilou, mijong haptheilou cheh ahiuvin; lumma ihmunom ahiuve.

¹¹Ahi, amaho chimtih neilou uichalop le hetkhenna neitheilou kelngoiching ahiuvin; abonun achennaova koncheh-in, ama deilam chehle aphat chomna dingcheh akivet taove.

¹²Amahon, hungun keiman lengpitwi galangting, khamnatheija idimsoh diu ahin, jing jongkhu tuni tobang hintin, nengjocheh ding ahi, atiuve.