Read Thado Chin Isaiah 57 Bible Online

Isaiah 57 - Thado Chin bible

Isaiah 57

¹Michonpha amangthah jin, koiman lunga akoipoi. Mihepiho akipui mangin, thilphalou hunglhung dinga kona michonpha kipuimanga ahi, tin koiman agelpoi.

²Ama chamna-a lutnintin: amaho ajalkhun uva choldodiu, ama dihsahna-a lamjotcheh ahiuve.

³Nangho gaothusei them chapate, mijigem le mijong sonho hilama hungnai jun,

⁴koi douna-a golsehbol nahiuvem? Koi douna-a kamka-a leilha doh-a nahiuvem? Nangho suhkhel neiho chate, mijouho son nahi lou uham?

⁵Thing hing phung noi tina milim hotoh Nachon thanghoi juva, phaicham dunga songpi khikeh ho noija naosen ho thatgama nahilou uham?

⁶Vachadung song jolpet ho lah-a nachan aumin; amaho, amahotah chu navang chan ahin, amaho hengtah-a chun donding thilto nalhei lhan anneh thilto natohji-e. Hicheho-a hi lhamon na kamu ding ham?

⁷Nangin munsangle molsang chunga najalkhun nadon; chulamtah-a chun ganlhaina tohdingin nakaltouve.

⁸Kot hole khomho nunglama chun naki melchihna natung doh-e; ajehchu keisanga achom nahi chu nangle nangin neikhe doh-in, nakaldoh-e. Nangin najalkhun nakeh lenin amahotoh kitepna nasemin ahi, nangin nagahmu ajalkhun hou chu nangaichan ahi.

⁹Chule nangma lengpa henga nuding thao nachoijin nachen, nanamtui behseh-in, chule nasottol gamlatah-a nasolin, thikholkhul geijenin naki suneme.

¹⁰Nalampi saojeh-in nachol lhehtai, ahinla nangin kinepna aumpoi natidehpoi. Nangin nakhutna hinna nakimutai; hijeh chun nalungkham poi.

¹¹Chule koi nakichat na ahiloule naginna jou nasei hija, keima neigeldoh louva, nalunga jong koilouva nahim? sottah kathipbeh hilou hija neigin louhel ham?

¹²Nachon phatna le nanatoh phongdoh inge, ajehchu hicheho chun phatchomsah ponnate.

¹³Nakatengle naloihon nahuhdoh-u hen; ahinla amaho abonuva huijin alhohmang gamuva, mohseh-a alenmang pidiu, ahinla atahsan keija ngampan bou gamsung chu aneija, kalhangtheng chu aloding ahi.

¹⁴Chule sepsangun, sepsangun, lampichu semtoh-un, kamite-a konin kipalna bul ladoh-un tinte.

¹⁵Ajehchu tonsot munlo-a asangle chungnung pen amin atheng chun, hitin aseije; keima munsangle mun thenga cheng kahi, lhagaova lungnempa suhal dingle, chonset lungkham pipa lung suhhalna dingin, chonset lungkhampipa le lhagaova lungnempa kachen khompi-e.

¹⁶Ajehchu tonsotnin doujing pongting, lungjong lunghang jingponge, ajehchu kasemsa lhagaole hinna chu kamasanga hungthon getnunte.

¹⁷Ajehchu akhangit louna kilosetna-a chun kana lunghangin, kanavon ahi; kamai kasela kalunghan ahin, amachu alung gotna lampia seingailou hella chepeh-a, ahi.

¹⁸Keiman alampiho kamutan, kadamsah ding ahi, ken amajong chu kapuija, amale alhaset piho chu lhamona kapeh ding ahi.

¹⁹Keiman kamsung ga chu kasem ahin, gamlatah-a umpale naija umpa henga chamna, chamna umhen, keiman ama kadamsah ding ahi, tin Pakaiyin aseije.

²⁰Ahinla migilouho chu twikhanglen kinong tobang ahiuvin, aumthimbeh louteng bonlhohle bohse jong anuhdohjin ahi.

²¹Ka Pathen chun migilouho dinga chamna himhim aumpoi ati.