Read Thado Chin Isaiah 58 Bible Online

Isaiah 58 - Thado Chin bible

Isaiah 58

¹Khenlou helin ging tah-in kho samin, sumkon bangin na aw sansah-in, kamite suhkhelnale Jacob insung mite chonsetna chu musah-in.

²Chonphatna bolla, a-Pathen chondanho dalhakhalou namkhat tobangin, amahon nitinin eihol holun, kalampiho hetding anomuve. Amahon thutah chondan ho angeh jiuvin, Pathen hinnai dingjong athanomun ahi.

³Ibolla an ka ngolule neimupeh daova, ibola kahinnao kasuh gentheijule neihetpeh daoham? atiuve. Veuvin, na-anngol niuchun nopsahna naholun, namigoihou jouse nabolseuve.

⁴Veuvin, nanghon kinahnale kinelnan, chule gitlouna khut tuma kisuhto nan an na ngoluve. Chunglama na aw kijahna dinga, tunia banga hi an na ngol loudingu ahi.

⁵Keiman kalhen chu hitobang an ngol hi hija ham? mikhatnin ahinkho asuhgentheiding nikho chu hibanghi hia ham? Lekha phaipheng banga alu kun-a, anoija khaodip pon le vut pha chu an ngol kiti theija ham? Chule hichu Pakai dinga santhei nikho hiding hinam?

⁶Keiman kanalhen an-ngolchu hitihi hilouham? Khansetna-a kikanho lhaplhah ding, pohgih poho doplhah ding, suhgentheija umho jalensah ding, namkoljon tincheng suhboh dinghi hilouham?

⁷ Agil kelho nachanglhah nahoppeh-a, genthei inna kon kikaidoh ho na-inna napuilut ding hilouham? asagoh-a um namuteng pon nasilpeh-a, nangma tahsa tobang neiho-a kona nakiselmanglou chu hilouham?

⁸Chutengle jingkah bangin navah kikhodoh-in tin, nadamtheina gangtah-in hung kilang doh-intin, nachon phatna namasanga chentin, Pakai loupina chu nanungdal hiding ahi.

⁹Chuteng nangin kouvin natin, Pakaiyin nahouding, nangin samin natin, aman hikoma kaume atiding ahi. Nangin nalah uva kona namkoljon le khutjunga kikotona, chule pannabei thu kisei nalah manga;

¹⁰Nahinna chu agilkelte henga nabuh lhah-a, akibol gentheiho nalung lhaisah leh, navah chu athimlah-a vahdoh intin, navela muthim jong sunlai bangding ahi.

¹¹Chule Pakaiyin tanglouvin puijin natin, nahinna chu gamgo laija jong lunglhaijintin, naguho athaosah ding: nangma twi kichapnou jing honsung bangin natin, twinah banga atuichu kanglou ding ahi,

¹²chule nangma-a hidingho chun munsesa luiho chu sephaovintin, khang tamtah-a inbul kiphut chu natundoh ding ahin; nangchu aselai semphapa, chena ding lampiho semphapa nakitiding nahi.

¹³Nangin nakeng chu cholngah nikho kanitheng ni-a nadeilam bolna dinga kona naheimanga; cholngah nichu kipani nati-a, Pakaiya atheng chu ja-uma nagela, ama najabola, nangma nopna lam bolouva, nangma nopsahna dinglam holouva, nangma thu seilouva na-umle:

¹⁴Pakaiyah kipah-in natin, leichung munsang ho-a chun tousah ingting; napa Jacob gou lo-a chu kavahding nahi. Ajehchu Pakai kamin hichu aseidoh ahitai.