Read Thado Chin Isaiah 59 Bible Online

Isaiah 59 - Thado Chin bible

Isaiah 59

¹Veuvin, Pakai khutchun mi ahuhhing joulou dingin akisuchompon; anakhang jong kho ajah theilouna dingin angong hih hele.

²Ahinla nakhansetnao chun nanghole na Pathen'u kikah-a nachomkhenu ahin, nachonset nao chun ajahlouna dinga nangho-a kona amai asel ahibouve.

³Ajehchu nakhut hou thisanna, chule nakhut junghou khansetna-a kisuboh-ah ahitai; namuh-un thujou aseijin, naleigui uvin jong thukaleh jeng asodoh jin ahi.

⁴Koiman adihtah aseipon, koima thutah dinpi aumpoi. Amahon ahomkeo atahsanun, thujou aseijuve. Amahon umchan phalou avopmun, khansetna ahin jiuve.

⁵Amahon gulse tui a-opkeuvun, maimom pan akhongjiuve; hiche tui nechanchu athijin, akikhedoh penpen chu gulse-in akeujiuve.

⁶Amompan ho chu ponsil sohdoh louding, athilbollu chu kihuina anei louheldiu ahi. Athilbol hou khansetna thilbol ahin, hunam thilbol chu akhutnuva um ahi.

⁷ Akengu thuphalou lama alhaijin, amaho thisan sonan akinojiuve. Angaitou chu suhmangna ngaito ahin, alampiuva gamnale manthah na aumme.

⁸Amahon chamna lampi ahepouvin, achele naova thudihtah aummong mongpoi. Amahon lampikon akisemun, chua che chanchun chamna ahet loudingu ahi.

⁹Hijeh chun thutah chu eihoa konin agamlan, thudih-in jong eipha joupouve. Eihon khovah ingah-un, ahinla muthim akimui, khovah khelin muthim lah joh-a ivahle taove.

¹⁰Keihon mitcho bangin bang kachulun, mit neilou bangin kakimai lele uvin ahi. Janlai bangin sunlai tah-in kakipalun; mithiho bangin mungemsa laitah-a kaum jiuve.

¹¹Vompi bangin kakitum letlut cheh-un, vakhuho bangin lhasetah-in kamao mao-uve, thutanna kangah-un, khatcha aumpoi. Huhhingna kangah-un, keiho-a kona gamlatah ahijoi.

¹²Ajehchu kakhangit lounao namasanga apungcheh cheh-in, kachonsetnu hin eiphochen jiuvin ahi. Ajehchu suhkhelna hoto kaum khomun, kakhan setnao dolchu kakihetnun ahi;

¹³Pakai douna-a chonkhelnale thujouva, ka Pathen uva kona chemangin, suhgenthei nale kidouna thuseijin, jouthu kalunguva kavopmun, kasodoh jiuve.

¹⁴Chule thutanna chu akinung chonin, thudih chu gamlatah-a adingtai. Thutah chu lamdunga alhupan, adih chu alut joutapoi.

¹⁵Ahi, thutah chu athonjin, aphalouva kona kikangse chu anchah-in apangjitai. Hichu Pakaiyin amun, thudih tanna himhim umlou chun alung phamotan ahi.

¹⁶ Chuin mi aumlouhel chu amun, midinga taopeh abeihel chu adatmo lheh-e, hijeh chun abantenin huhhingna apohpeh-in; ama chonphatna chun adinsahtai.

¹⁷ Hichechun aman chonphatna ompho bangin akivonin, alua huhhingna lukhuh akhuh-in, phulahna ponin akivonin, tompanna chu sangkhol chollin aki ah-e.

¹⁸Anatoh-u dungjuijin kibang tah-in lethuh unte, akidoupiho chu lungsat na-in, amelmate lethuh inte, twikol gamhojong lethuhna-in lethuh inte.

¹⁹Kichaovintin, chutia chun amahon lhumlama konin Pakai minchu, chule nisolama kona aloupisah diu ahi. Melma chu twisoh banga ahung kondoh tengle chuche douna-a Pakai lhagao chun ponlap khat atundoh ding ahi.

²⁰ Chule lhatdampu chu Zion huhdoh dingle Jacob sunga suhkhelna-a kona kilete henga hungding ahi, tin Pakaiyin aseije.

²¹Keidin vang hiche hi amahotoh kakitepna ahi, tin Pakaiyin aseije. Nachunga um kalhagao chule nakamsunga kathuho chu, nachilhahte kama konle nachilhahte chilhahte kama kona jong tua pat atonsot ageija potdoh louding ahitai, tin Pakaiyin aseije.