Read Thado Chin Isaiah 6 Bible Online

Isaiah 6 - Thado Chin bible

Isaiah 6

¹ Uzziah lengpa athikum chun Pakai chu laltouna sangtah chunga atouva alalpon chun houin alodimset chu kana mun ahi.

²Achunga chun alha gupcheh nei Seraphim'ho anadingun; alhaving ni in amai akhun, ni in akengteni akhun, ni in alengin ahi.

³ Chule khatchun khat henga, ATHENG, ATHENG, ATHENG, chu janelho Pakai chu ahi. Leiset pumpihi aloupina adimsetne tin asamin ahi.

⁴ Chuin ahinsampa Ogin chun kotpi khomho akihotnin, chule in chu meikhun adimtai.

⁵Chujouvin kaseitai: ohe ada kahi! ajehchu keima kamtheng lou kahin, mi kamtheng loute lah-a cheng kahi. Ajehchu kamitnin leng janel Pakai chu amutai, kati.

⁶Chuin maicham-a kona akhutna mei-am chaichea hinchoija, Seraphim holah-a khat kahenga ahung lengin,

⁷chuin kakam-ah ahinkoijin aseitai; ven, hiche hin nane teni atongkhatan; nakhansetnaho akilamangin nachonset naho jong suhthengin aumtai.

⁸Hichun Pakai awginin hitia asei kajai: keiho dinga koi chedingham? Hichun keiman kaseijin; keima hia kaume, neisolin kati.

⁹ Chuin aman chenlang, hiche mitehi gahilin, nanghon jaovin natin, ahinla nahetkhen theilou dingu; chule mu uvin natin, ahinla nahetdoh loudiu ahi, ati.

¹⁰Hiche mite lunghi thao tomsah inlang, anao ngonsah in, chule amitnujong kisinghen; achutiloule amitnun muvintin, anaovin jauvintin, alungun hekhen-uvintin, lung heijuntin, chule damget nunte.

¹¹Chuphatnin keiman Pakai itih chan hiding ham? Katile aman eidonbutnin; khopiho acheng beija agohkeo ahikahsele, inho-a mi acheng abeihela, agamchu akamhel kahse-a,

¹²chule Pakaiyin mite chu gamlatah a achon manga, agamlailunga mun kidalha lentah umding ahi.

¹³Ahinla hiche sunga chun somlah-a khat umintin, hichu kile-a kinejouding, chahthing phungle gangpi thing ana apultengle akungbul umnalai banga muchi theng chu akungbul umjing ding ahi.