Read Thado Chin Isaiah 60 Bible Online

Isaiah 60 - Thado Chin bible

Isaiah 60

¹Thoudoh inlang Salvah tan; ajehchu navah chu ahunge, Pakai loupi chu nachunga ahungsohtai.

²Ajehchu ven, muthimin leiset ahinkhu-a, muthim lhangkhal in amite ahinkhu ding; hijongle nachunga Pakai chu hungsohdoh-intin, aloupina chu nachunga hungkilang ding ahi.

³Chule chidang namdangte chu navah-a hungun tin, chule lengho navah dohna vah-em lama hungdiu ahi.

⁴Khodah inlang vekimvel temin, chule vechenin; akichom khomun, nahenga ahunguve. Nachapate gamlatah-a konin hunguntin, nachanute chu nakoma kijending ahiuve.

⁵Chuteng nangin munatin, hicheho chu thakhatnin hungsoh doh inte. Chule nalungsung kicha-a, suhjaova umding ahi. Ajehchu twikhanglen ninglhina chu nahenga hungding, chidang namdangte hatna chun nahinphah ding ahi.

⁶Sangongsao tamtah le, Midian le Ephah gam sangongsao golbepho chun nahinlonvuh ding ahin; abonuva Sheba-a kona hungdiu ahin, amahon sanale gimnamtui ahinchoidiu; abonuva Pakai loupina chu atahlangdiu ahi.

⁷Kedar te gancha honho jouse nahenga hung kichom khomuntin; Nebaioth kelngoichal hon najendiu ahi. Amahochu ka-maicham chunga santhei doltah-a hungtou uva, chule ka loupina in chu kachoi-at ding ahi.

⁸Meilhang banga lengle-a, vakhuho banga abangkot dunguva lengle-a hichehohi koi hiuvaham?

⁹Aman loupina-a nachoi-at tahjeh-in, Pakai na Pathen mindingle, Israel mithengpa ding jala nachapate chu adangka hou le asana houtoh gamlatah-a kona puidinga, thonlouhela twikol gamhon einga dingu ahin, Tarshish konglen ho chu masapen dingu ahi.

¹⁰Chule gamdangmi chapaten nakul banghou hinsa doh-uvintin, chule alenghouvin jong nangma najendiu ahitai. Ajehchu kalunghana-a kajep nahin, hijeng jongle khohsah na-a nachunga kanahepi nahi.

¹¹ Hijeh chun miten chidang namdangte thaneina chu nahenga ahinpoh lutnuva, alenghou ahinpui theina diuvin nakotpiho tanglouvin kihong intin, sunle jana kikhah louhel ding ahiuve.

¹²Ajehchu nangma jenlou ding nam le lenggam chu mangthah diu ahin; henge, hiche namho chu mahthah helding ahiuve.

¹³Kamun theng jephoina dinga Lebanon loupina chu nahenga hunglhunga, chahthing, phanthing, meila thingho kehkhoma, kakeng ngapna munchu loupina-a kaki choi-atna ding ahi.

¹⁴ Nabolgenthei ho chapate nahenga kun uva, i-nasahlouho jousechu nakengto noija hungkun uva chibai nabohdiu ahi. Amahon Pakai khopi Israel mithengpa Zion chu nangma nahi, atidiu ahi.

¹⁵Koiman nahin jotpa lou khopma dalhahle hotna nana um ahin, tonsot chungnunna khangtamtah kipana-a kasemding nahi.

¹⁶Nangin chidang namdangte noitwi jong nachepma, lengho noijong nachep ding ahi. Nangin keima Pakai chu nahuhhingpa le nalhatdohpa Jacob mihatpa kahichu nahetding ahi,

¹⁷keiman sum-eng khela sana, thih khela dangka, thing khela sum-eng chule songho khela thih kahinpohlutpeh-a, navaipo te jong chamna kapeh-a, navaihom te chonphatna kapeh ding ahi.

¹⁸Nagamsunga thuse kija louding, chule nagamgi sunga gamna le suhmangna kijalouhel ding ahitai. Nangin nakulbang ho chu huhhingna ahin, nakotpiho chu pachatna ahi, nahin tiding ahi.

¹⁹Sun teng nisa chu navah-a pangchom talouva, vahdinga lhathah-in jong vah napehchom louding ahitai. Ahinla Pakai chu natonsot vah leh na Pathen loupina-a pangding ahitai.

²⁰Na nisa lhumtalouhel ding, na lhathah mangtalouhel ding ahi. Ajehchu Pakai chu natonsot vah hija, nalunghemna nikhoho kichaisoh ding ahitai.

²¹Namite jouse michonpha hiuvintin, atonsotna gamsung alodingu ahin, choi-atna kaum theina dinga amahochu kathingphu bah kakhutsoh chu hiuva ahi.

²²Lhom chakhat chu sangkhat hungsoh intin, aneucha khat chu nam hattah khat hunghi ding ahi. Keima Pakaiyin aphatcha kalhunsah loiding ahi.