Read Thado Chin Isaiah 61 Bible Online

Isaiah 61 - Thado Chin bible

Isaiah 61

¹ Pakai Pathen lhagao chu kachunga aume; ajehchu Pakaiyin milung nengte henga kipana thupha seiphong dinga thao einu ahin; lungna teho suhdampeh dinga eisol ahi, sohchangte henga chamlen nathu lhangsam ding, chule sohchang ho henga songkul kihondoh thu hillhang dinga eisol ahin,

² Pakai santhei kumle, i Pathen'u phulah nikho hillhanga, alunghemte jouse lhamonsah dinga;

³Zion'a lunghemte henga lhamonsahna, vut khella hoina, lunghemna khella kipana thaotwi, lhagao pohgih khella pachatna ponsil pe dinga, hitia chu amaho Pathen thingphu, chonphatna thingphung tia akikouna diu, hitia chu ama choi-atna amutheina dinga eihinsol ahi.

⁴Chule amahon agamlui sesao asah phatnuva, masanga akamhelsa atundoh kitdiu, chule khopi gamsaho khangtamtah-a kamhelsa asemphat dingu ahi.

⁵Chule gamdangmi hung kipatdoh uva nakelngoi honnu avah uva, gamdangmi chapate chu nalou kaijule nalengpilei lhouvuva hungpang ding ahiuve.

⁶Ahinla nangho Pakai thempuho nakisah uva, mihon Pathen kinbolho natidiu ahin; nanghon chidang namdangte haona naneh uva, aloupinao chu nakisonpi diu ahi.

⁷Najachat nao khella ajatni namudiu, chule lungnoh phah khella achanuva kipahdiu ahin, hijeh-a chu agamsung uva chu chan nijen alodiu, achunguva tonsot kipana umding ahi.

⁸Ajehchu Pakai keima hin thutah kangailun, govam thilto dinga thil kichom kimangcha kathen; chule dihtah-a anatoh-u lamkai jingting, amahotoh tonsot kitepna kasemding ahi.

⁹Chule achilhahteu chu chidang namdangte lah-a hetna uma, chule achateu chu mipite lah-a hetdoh-a umdingu ahi. Amaho mujousen amaho ahetkhendiu, hitia chu Pakai phatthei boh chilhahte hidiu ahi.

¹⁰ Keima Pakaiya hapan kipah ingting, kahinna ka Pathen'a kipah inte. Ajehchu aman huhhingna pon eisilpehtan, moulang akijep bangle, mounu sana vona akivon bangin aman chonphatna ponlenin eihuije.

¹¹Ajehchu leisetnin apahmum ahinsodoh bangle, honin asunga thil kituho adondohsah banga, hitia chu Pakai Pathen'in chonphatna le vahchoina namjouse masanga ahinsepdoh ding ahi.