Read Thado Chin Isaiah 63 Bible Online

Isaiah 63 - Thado Chin bible

Isaiah 63

¹ Edom'a kona hungpa Bozrah-a kona ponsandup kisila hungahi koiham? Akivon na loupi tah, thahatna nasatah banga hunga chu, Keima chonphatna-a thuseija, huhhingna dinga hattah chu kahi.

²Ipidinga naponsil hitisan hija; chule naponsil chu lengpithei chilpa-a tobanga ham?

³ Keiman kachangin lengpithei kachillin, miholah-a khatchan eihupoi. Ajehchu amaho chu kalunghana-a kachotpha-a, chule kalungsatna-a kachil ngem ding; athisannu kaponsil ho-a kithekhuma, kavon jouse-a kasuhmat ding ahi.

⁴Ajeh chu phulahna nikho chu kalunga uma ahin, kalhatdam kum chu ahung lhunge.

⁵ Chuin keiman kaven, eipanpi ding koimacha aumpon, eikai ding ding koimacha aumlou chu kalungdonge: hijeh chun kakhut tah-in keima dingin huhhingna eihin pohpeh-in, kalunghan na chun eikaiding tai.

⁶Chule kalung hana-in miho chotphang ting, kalunghan na-in amaho khamsah ingting, ahatnau tolsena kanei ding ahi.

⁷Ichunguva Pakai thilpeh jouse dungjuile, Israel insung mite dinga aphatna nasatah dungjuija, amihepina dungjuija athilpeh ho jalleh, ami lungset phatna ho jallin; keiman Pakai lungset phatna chu seijing ting, Pakai vahchoina thu kaseiding ahi.

⁸Ajehchu aman aseije, amahohi keima mite mongmong, chule jouloubeh ding chate ahiuve, ati. Chutichun ama amaho huhhingpu anahi.

⁹Amaho kibol gimna channa ama jong kibolgimji ahin, a-anga um vantil chun amaho ahuhhing tai. Aman angailutna leh akhotona-in amaho chu alhatdoh-in; aman khangluilai jousen amaho avopmin, apolen ahi.

¹⁰Ahinla amahon adouvun, alhagao theng chu ana lungphatmosah-ui. Hijeh chun ama amaho melmadin ahung kihei doh-in, amatah-in amaho akisatpitai.

¹¹Chuphatnin aman khanglui lai, Mosi le amite ageldoh-in, twikhanglen'a kona akelngoihon chingpatoh puidohpa chu hoija umham? asunga A-Lhagao Theng khumpeh pachu hoija umtam?

¹² Loupitah-a Mosi khut jetlama amaho puilea, tonsot amin aumjing nadinga amasanguva twipi sukhenpa hoilam ham?

¹³Amaho akipal louna dinguva gamthip laija sakol banga twi thuhtah laija puigalkai pa hoiba hitam?

¹⁴Phaichama gancha kumsuh bangin, Pakai lhagaovin ama acholdosah-in; chutichun namin loupina dingin namite nakaihoijin ahi.

¹⁵Van'a konin hinvesuh inlang, chule nathen nale naloupina umna mun'a konin hinven; natompan nale nagunchuna keidinga nalainatnale nahepina hoi hitam? kituhtanga hitaovam?

¹⁶Abraham'in eihe hih-u henlang, Israel'in eihehih jongleu, nangma kapau nahi-e. Vo Pakai nang kapau eilhandampu nahi; naminhi a-itih-a patna umjing ahi.

¹⁷Vo Pakai ibolla nalampi ho-a kona nei chekhel sah uva, nangma kakichatna diuva kona neilungtah sah-u ham? nagoulo phungho, nasohte jal-in hungkiletan.

¹⁸Nathenna miten hichu chomcha khatbou aneijun; kakidoupi teovin namun thengchu achotpha taove.

¹⁹Keiho nanga kahiuvin, amaho chunga vai nahom khapoi; amaho namina kikou ahipouve.