Read Thado Chin Isaiah 64 Bible Online

Isaiah 64 - Thado Chin bible

Isaiah 64

¹Molsang jouse chu na-angsunga twi lonna alonlhah suh theina dinga, O nangin van ho chu nasatella, nahung kumlhah nom hileh,

²nakidoupi ho namin hetsahna dingle, na angsunga namtin kithingthinga aumna diuva, meijin akahjola akonbanga, meijin twi asousah bangin!

³Kakinep pilouvu tijat umtah thil naboltengle, nahung kumlhajin na-angsunga molsang ho alonglha jeng jiuve.

⁴ Ajehchu vannoi kipatna pat nangma tailou Pathen dang, ama ngah ho dinga natonga; mihemin aja khapon, nakhangin jong ajahkhapon, mitnin jong amukhapoi.

⁵Kipahtah-a uma chonphatna bolpa, nangma hejing puma nalampi jotpa nakimupin, vetan, kachonset jeh-un, nalung ahangin, chuho-a chun kaum jom jingun, huhhing kahidiu ahi.

⁶Ahinla kabonun thilboh kabang sohkeijun, kachon phatna jouse jong ponsenen bangbou ahin, kabon chaovin nathel bangin kamol lhaovin, kakhanset naovin huibangin eilhohmang gamtaove.

⁷Chule namin panna nangma kolchah dinga kitilkhouva khatcha aumtapoi, ajehchu keiho-a konin namai naselin; kakhan setnao jeh-in neisumangtaovin ahi.

⁸Ahinla tun, vo Pakai, nangma kapao nahin; keiho bel kiden na leiset kahiuvin, nangma beldengpa nahi; chule keiho kabonun nang khutsoh jeng kahiuve.

⁹Vo Pakai, lunghang behseh hih-in, khanset najong tonsotnin geldoh jinghih-in; ngaijin, vetemin, kangeh-u nahi, keiho namite jeng kahiuve.

¹⁰Nakhopi thengho gamthip asohgamin, Zion jong gamthip ahin, Jerusalem jong akamheltai.

¹¹Kapu kapa teovin nangma navahchoi nao ka-inthenghou leh ka inhoi houjong meijin akavam gamtan; kathildeihou jouse jong manlou asoh gamtai.

¹²Vo Pakai, hicheho-a dingahi nangma nakitim ding hinam, nangma nathip beh-a, neisuhgenthei teitei diuham?