Read Thado Chin Isaiah 65 Bible Online

Isaiah 65 - Thado Chin bible

Isaiah 65

¹ Kahenga thumlou hon eiholun, eihol louhon eimuve; kamina kikoulouhel nam mite henga chun, neiveuvin, neiveuvin, kati.

² Amaho lunggella achona lampi phalou houva vahlea, doupanho chunga chun kakhut kajah nilhum lhumjin ahi;

³Tanglouva lung hansah dinga kamaija eilung phatmo sah-a; honsunga kithoija, chehsong maicham chunga gimnamtui hal mite;

⁴Lhanho lah-a umdena, songko sung ho-a geh-a, vohsa ne-a, Abel sunguva thet umtah satwi kitunna;

⁵Nachang seh-in dingin, neihin nai hih-in; ajehchu keima nang sangin kathengjoi, tiho chu ahiuve. Hicheho chu kanahko homsunga meikhu jing ahiuvin, nilhumkeija kongjing meikou ahiuve.

⁶Veuvin, hichehi kamasanga akisune: Thipbeh in umponge. Ahinla lethuh ingting, a-opkong sungtah uva kalethuh ding ahi.

⁷Nakhanset naole napu napateu khansetna agoma, molsang ho chunga gimnamtui ahal uva, lhangho chunga eitaitomu ahin, hijeh-a chu anatoh masah hou chu a-opkong sunguva katepeh ding ahi, tin Pakaiyin aseije.

⁸Pakaiyin hitin ati, lengpiga lomlah-a kon lengpitwi akimu bangin, mikhat touvin asungahi phattheina aumjeh-in sumang hih-un ati banga: chutobanga chu kasohte jala abonchauva kasuhmang louding ahiuve.

⁹Chule keiman Jacob'a kona sonkhat, chule Judah'a kona kalhangtheng loding khat ka hinpuidoh ding; chule kamilhen hon hichu lovintin, chua kasohte chengden diu ahi.

¹⁰ Chule Sharon chu ganchahon dinga hongsung hintin, chule Achor phaicham chu ganchaho dinga kolna mun hiding; ajehchu keima eihola kamite jong chutobang ding ahi.

¹¹Ahinla nangho Pakai dalha-a, Ka molsang theng sumila, chuche sepaihon ho dinga dokhang gonpeh-a, chule chuche mijat ho donding thilpeh bulhitpeh nahiuve.

¹²Hijeh chun chemjam'a kasimding nahiuvin, athatpa anga nakundiu ahi. Ajehchu kakoupetnin neihou pouvin, kahoupet un neingaipeh pouvin; ahinla kamitmun thilse nabol jouvin, keima deilou joh nakilhen taove.

¹³Hijeh chun Pakai Pathen'in hitin ati, veuvin, kasohten anehdiu, nangho vang gilkela naum diu; veuvin, kasohten adonuva, nangho vang nadangchah diu ahi. Veuvin, kasohte kipah untin nangho vang najachatdiu ahi.

¹⁴Veuvin, kasohten lungsung kipa la saovintin, nangho vang gentheijeh-a nakadiu ahi. Chule lhagao bolsetjeh-a napenjah diu ahi.

¹⁵Chule naminu chu kamilhendohpa henga sapsetna-a nadalhah diu ahi. Ajehchu Pakai pathen'in nangma natha-a, asohte minchoma akouding ahi.

¹⁶Leisetna amale ama phatthei kiboh-a chu, Pathen dihna-a amale ama phatthei kiboh ding ahin, chule leisetna kihahsela chu Pathen dihna-a kihahsel ding ahi. Ajehchu lungkhamna masaho akisumilin, chule kamitmu-a konin akisel mang taove.

¹⁷ Ajehchu veuvin, vanho leh leithah kasemin ahi. Chule thilmasa chu kiheta louhel ding, lunga jong langtalouhel ding ahi.

¹⁸Ahinla kathilsema chun nangho a-itih-in halna in kipah unlang thanomun; ajehchu veuvin keiman Jerusalem chu kipa na-in, amite chu thanop na-in kasemtai.

¹⁹ Chule Jerusalem'a chun kipah ingting, chule kamite lah-a jong thanominge, Chule hia chu kana aw gin, penna aw gin jong kijalouding ahitai.

²⁰Chuteng chua chun naosen nikho lhomcha bou hinga leh tehse adamsung hin nikho lhinglouho umta ponte. Ajehchu chapang chu kum jakhatna thiding; ahinla michonse kum jatamtah hingho chu sapset chang hiding ahiuve.

²¹Amahon inho saovintin, hiho-a chu chengdio, chule amahon lengpihon bolluntin, aga anehdingu ahi.

²²In asah uva midang cheng talou ding; thingphung aphu uva midangin aneh tah louding: Ajehchu thingphung khat hinkho banga chu kamite hinkho jong hiding, kalhendohten akhut tah uva atohgao phatsotpi anopsahpidiu ahi.

²³Amahon moh-a atohgim loudiu, lungjina dingbepma jong cha ahinloudiu ahi, ajehchu amaho Pakai phattheiboh son ahiuvin, ason apah houtoh umkhoma ahiuve.

²⁴Chule hung hitiding ahi, amahon keima eikou masang uva kahouding, chule thu aseijing nahlai uva jong kajahpai ding ahitai.

²⁵ Kamkeile kelngoinou lhakhoma, bongchal banga keipin changpol anehding, leivui chu gulho dinga sa hiding ahi. Kalhangtheng chung jouse-a chu amahon asukhah-u, asuhmangu umlou ding ahi, tin Pakaiyin aseije.