Read Thado Chin Isaiah 66 Bible Online

Isaiah 66 - Thado Chin bible

Isaiah 66

¹ Pakaiyin hitihin aseije, vanhi kalaltouna ahin, leihi kakengto ngapna ahi. In nei sahpeh-u chu hoi ham? Kacholdona ding mun hoiba ham?

²Ajehchu thiljouse chu kakhutna kasema, thiljouse chu uma ahi, tin Pakaiyin aseije. Ahivangin hiche migenthei pa, lungsung kisih-a kathua kihot hotpa bouhi kavet ding ahi.

³Bongchal thatpa chu mithat tobang ahin, kelngoinouva kithoipa chu ui ngong sattan tobang ahi; Pathen'a thilpeh toh-a chu vohcha thisan tobang ahin, gimnamtui halpa jong chu milim semthu pathen phattheiboh tobang ahi. Ahi, amahon alampidiu akilhenun, thet umtah ahinaova chun alungu akipah-in ahi.

⁴Keiman amaho bolgentheina lhenpeh ingting, chule achunguva akichatnao chuhsah inge, ajehchu kakoupetnin khatchan eidonbut pouvin, thu kaseipetnin angaipouve. Ahinla kamitmun thilse bou abollun, kakipana louhelbou akilhenuvin ahi.

⁵Pakai thuhi ngaijuvin, athua kithing thinga nangho, nasopiu nangho nahotbol houle keima min jeh-a nangho napaidoh hou chun, Pakai chu choisangin umhen tiuhen; ahinla ama nakipa naova hung kilah-in tin, chule amaho jahchajo ding ahiuve.

⁶Khopi-a kona husagin, houin'a kona husagin chu Pakai husagin ahin, amelmate lethuhna dinga Pakaiyin hiche chu asodoh ahi.

⁷ Naosonat athoh masangin cha ahingin, anat thohgim masangin, naosen pasal khat ahingtai.

⁸Hitobang chu kon ajahkhah-a, hitobang chu kon amukhah-em? Leiset nikhat sunga kisemdoh-a, namkhat hi khatvei so-a sohjeng theijem? Ajehchu Zion hin naosonat athoh thoh-in achate ahingdoh jenge.

⁹Pakaiyin cha kahindoh sah-a, kapen lhahsah louding ham? ati. Keiman kasolhah sahji ahin, naobu kakha-ji dingham? tin na Pathen'in aseije.

¹⁰Nangho ama ngailu jousen Jerusalem kipa thanop piuvin lang, ama lunghempi nanghon halna-in kipa thanop piuvin.

¹¹Hitia chu nangho ama lunghempi ho jousen alhepbina noitwi chu nachep uva, nachim theina diuva, aloupi chamkimna lhingset chu nakipapi theina dingun, ati.

¹²Ajehchu Pakaiyin hitin ati, veuvin, amanu henga chamna vadung long banga, chule chidang namdangte loupina chu twilong banga kalonsah-a, chuteng nachep uva nangho amanu pangteni-a nakipoh uva, akhup chunga nakichop diu ahi.

¹³Anun alhepbi mikhat banga hitia chu kalhepbiuva, Jerusalem'a lhamonga naum dingu ahitai.

¹⁴Hichehi namu tengule nalungu kipah-a, nagu nachang jouse jong hamhing banga nouding, Pakai khutchu asohte lama kilanga, alung himona amelmate chunga kilangding ahi.

¹⁵Ajehchu vetan, Pakai chu meikong banga, huipi nung tobanga akangtalai ho puma, alunghana lungsatna sodoh dingle, aphosalna meikong banga hungding ahi.

¹⁶Ajehchu Pakaiyin meile achemjama tahsahing jouse thu atanding, chule Pakai mitha chu tamtah hiding ahi.

¹⁷Amaho acham chama kisuthenga, chule honsung lailunga thingphung khat nunglama amale ama kisuthenga, vohsa phe thet umtah chule juchasa neho chu mangthah khomdingu ahi, tin Pakaiyin aseije.

¹⁸Ajehchu athilbol houle alung ngaitohou kahenai, keiman namjousele paojouse kakhopkhoma, kaloupina amunadiuva hunglhung ding ahi.

¹⁹Chutengle keiman alah uva melchihna khat koijing ting, chuleh alah uva asohcha hochu namtin vaipi keima minthan jakha louhel ho, kaloupina mukha loulaiho: Tarshish lam, Put lam, chule thalthem Lud lam ahin, Tubal leh Javan lam chule gamlatah twikol gamho geija kasolding ahiuve. Chuteng chule amahon chidang namdang lah-a kaloupina aphonjal dingu ahi.

²⁰Chule amahon, Israel chaten Pakai insunga lheng thengsel sunga thilto ahinchoi banguva, nasopiteu jouse Pakai henga thilto toh dinga namtina kona, sakol kangtalai chunga, talaija, sakol pol ho chunga, ganhing gangho chunga ka mol theng Jerusalem'a ahintollut dingu ahi, tin Pakaiyin aseije.

²¹Chule kenjong alah uva chu thempuho dingle, Levi ho ding kalhen ding ahi, tin, Pakaiyin aseije.

²² Van thah hole leithah kasem dingchu kamasanga aumjing bangin, nasonhoule naminu chu umjing ding ahi, tin Pakaiyin aseije.

²³Chule hung hitiding ahi, lha ahungthah-a patna ahungthah kitchan, choldoni-a patna choldoni kit chan mijouse kamasanga keima hou dinga hung dingu ahi, tin Pakaiyin aseije.

²⁴ Chutengle amaho chedoh uva, kachunga chonkhelna neiho thilong chu avetjing dingu ahi. Ajeh chu alungu thilouhel ding, ameikong jong mitlouhel ding, chule amaho tahsa hing jouse dinga kidah umtah hiding ahiuve.