Read Thado Chin Isaiah 7 Bible Online

Isaiah 7 - Thado Chin bible

Isaiah 7

¹ Chuin ahitin ahi, Jotham chapa, Uzziah chapa, Judah lengpa Ahaz lallaijin, Syria lengpa Rezinle lengpa Pekah Remaliah Israel lengpa chapa chu Jerusalem satdingin akontou lhonin, ahivangin anajou joulhon tapoi.

²Syria chu Ephraim toh apangkhome ti David insungmite akihiltai. Chuin amale amite lungchu gammang thingho huijin amutling bangin alinglao gamtai.

³Hichun Pakaiyin Isaiah henga, nangle nachapa Shear-jashub chu twikul sahnung twilam monga ponsoppa lamlhonga khun Ahaz to kimutodin potdoh lhoninlang;

⁴Ahenga, chingtheijin lang thipbeh-in Syria toh Rezin le Remaliah chapa engset lunghanna maiso mei khuthethu ni tobang chu kicha hih-in, lunglhah nanjong neihih beh-in ati.

⁵Ajehchu, Syria, Ephraim, chule Ramaliah chapan nangma dounan thil gilou angaitouvin aseijuve,

⁶Judah doudingle nokhum dingin chetou uhitin, khopi chu suchimu hitin, chutengle alaija chun Tabel chapa chu lengin tung uhite.

⁷Pakai Pathen'in hitin aseije, hichu ding joulou ding, guijong guilhung louding ahi.

⁸Ajeh chu Syria luchang chu Damascus ahin, Damascus luchang chu Rezin ahin; kum somgup le kumnga sunga Ephraim chu namkhat hiloudinga kisucheh ding ahitai.

⁹Chule Ephraim luchang chu Samaria ahin, Samaria luchang chu Remaliah chapa ahi. Natahsan lou uleh atahbeh-a naki phudet louhel ding ahi.

¹⁰Chukalvalin Pakaiyin Ahaz henga aseijin,

¹¹Nangman Pakai na Pathen henga melchihna kithumin; hathuh-a thuh ahiloule hasana sangkhat kithumin, ati.

¹²Ahinla Ahaz in, keiman thumponge, Pakai jong patep hihhel ing kate, ati.

¹³Chuin aman aseitai, David insung mite, tun nanghon ngaitemun! mihem cholsah hi thilneova nagel uva, ka Pathen sana nacholsah jeng dinguham?

¹⁴ Hijeh chun Pakai amatah-in melchihna khat hinpeu vinate; veuvin, nungah theng khat gai jintin chapa khat ahinding, aminchu Immanuel [1] kitiding ahi, ati.

¹⁵Aman bongnoi thaole khoiju aneh ding ahi, chutia chu aman aselam hotbola aphalam lhenje ahetding ahi.

¹⁶Ajehchu chapang chun aselam thetbol dingle aphalam kilhen dingje ahetthei masanga nanaginu gamhochu aleng teniu chun adalhah diu ahitai.

¹⁷Judah'a kona Ephraim achemanga patna ana lhungkhalou nikhoho chu Pakaiyin nangle namite chung, chutengle napa insung mite chunga Assyria lengpa nahin lhutpeh ding ahi.

¹⁸Chule hiche nikho teng chule hung hiti ding, ahi. Pakaiyin Egypt vadunga thousi ho mutkhom minintin, chule Assyria gamsunga khoiho akoukhom ding ahi.

¹⁹Chule amaho hunguntin, abon chaova phaicham gohkeu laija songpi kohomho-a, lingho chung jouse-a, chule hamhing ho chung jouse-a umdiu ahi.

²⁰Hicheni mama-a chu Pakaiyin samchem alap'a vadung gal lamho toh Assyria lengpa chu aluchangle akengmul ho ahet namding ahi; chule akhamul sanna jong ahet chaiding ahi.

²¹Chuche nikhole hung hitiding ahi, pasal khatnin bongla khatle kelngoi ni avulding ahin;

²²chule hung hiti ding ahin, chuche teng chule bongnoi nengtah-a apehdiu jeh-a amapan bongnoi thao anehji ding ahi. Ajehchu chuche gama kidalha chanchun bongnoi thaole khoiju jeng anehdiu ahi.

²³Chule chuche nikholai chule hung hitiding ahi, dangka sangkhat man cheng, lengpilei sangkhat umna munchana chu lingle khao jengbou kehding ahitai.

²⁴Agam pumpi lingkhaole lingphung ahung dimtah ding jeh in chulama chu thalpi le thalchang puma miho hungdiu ahi.

²⁵Chule tuphenga kilai lhang jouse chunga linglekhaoho ginna-a chulama hunglou ding, ahin, bongchalho le ganchaho lhatna hung hiding ahitai.