Read Thado Chin Isaiah 8 Bible Online

Isaiah 8 - Thado Chin bible

Isaiah 8

¹Chukalvallin Pakaiyin kahenga Maher-shalal-hash-baz chung thudol, lekha jol lentah khat lanlang asunga chun mihem twi-mollin sunin eiti.

²Chuin thuching ding hettohsah tahsan umtah Uriah thempulen le Jaberekiah chapa Zekeriah chu kapansah in ahi.

³Chuin themgaonu henga kagachen; ahile amanu ahung gaijin chapa khat ahinge. Chuin Pakaiyin kahenga amin Maher-shalal-hash-baz sah-in ati.

⁴Ajehchu naosen chun hepa heno tije hetna anei masanga, Damascus haonale Samaria thilchomdohho chu Assyria lengpa anga kipomang ding ahi, ati.

⁵Pakai chun kahenga thu ahinsei kitnin,

⁶hiche mite hin Shiloah twi longdel delho adeimouva, Rezin le Remaliah chapa akipapi jeh uvin;

⁷hijeh tahchun tun vetan, Pakai chun vadung twiho hattahle tamtah, Assyria lengpa le aloupina jouse jengjong achunguva alonvuhsah ding, twilam jouse ahinchupma avakam jouse-a letlha ding,

⁸chule Judah gama longlutna achupsoh-a letlha ding, ngong geihel aphahding chule alhaving jahchun nagamu avai akhokhong ding ahi, vo Immanuel, ati.

⁹Vo miteho nangho ahal hala chiplhading nahiuve! gamlhatah miho nabonchaovin nanau hinsungun, natai kigah-uvin, achutiloule ahal halla nachipdingu ahi,

¹⁰Ngaito khomun phachomponte, thuchu seijun dingjou pouvinate. Ajehchu Pathen'in eiumpiuve.

¹¹Ajehchu khut thahat tah-in, Pakaiyin kahenga aseijin, hiche mite lamlhah a kavale lounadin eithumop in, hitin aseije;

¹² hiche miten guhthima thilphalou agonu ahi tia asei-ujong guhthim tohgon ahi tin seidao henlang, agihnao jong kichat nale gentheinan neidaohen.

¹³Janel Pakai amatah chu thensah-un lang, naginnu ama hisah unlang, natijat naochu ama hihen.

¹⁴ Chule amachu muntheng hiding, Israel insungteni dinga vang kipalna songle kisuhmona songpi hiding, Jerusalem'a chengho dinga thangle pel hidingbou ahi.

¹⁵Alah uva mi tamtah kipala lhuhna le kisuhgepna hiding; thanga oh-uva kimandohdiu ahi.

¹⁶Hettohsahna chu kantup minlang danthupeh chu kaseijuite lah-a namdet jengin,

¹⁷chule keiman Jacob insunga kona amai selmangpa Pakai chu ngah ingting, amabou vengkate.

¹⁸ Veuvin keile Pakaiyin eipeh chapangtehi, Israel insunga melchihna leh thilkidang hidinga Zion molla cheng janel Pakaiya hungkon kahiuve.

¹⁹Chule amahon naheng uva mithisa lha kouho le doithemho guhthima vea, phuisam ho chu hollun atitengule miten athi khella ahina dinga a-Pathen'u chu ahollou dingu ham?

²⁰Amahon dan thupeh le hettohsahna thu dungjuija asei lou uleh, asunguva khovah umlou ahi.

²¹Chule amahon hesohtahle gilkeltah in gamchu jotpaovintin, chule hitiding ahi. Gilkella aumtenguleh, lungsa tuntun untin, alengpaole a-pathen'u gaosap untin chunglam avetdiu ahi.

²²Hiteng chule amahon tollam hinveuvintin, lungkhamnale muthim, lungnat khojin amudiu chule amahochu muthim lah-a kinolutding ahiuve.