Read Thado Chin Isaiah 9 Bible Online

Isaiah 9 - Thado Chin bible

Isaiah 9

¹ Ahijeng vangin lunglha-a ana um amanu dingin nguina umta ponte. Phatmasa laija chu aman Zebulun gam le Naphtali gam chu olla ana gimbol ahin, chule khonungle Jordan gal, twikhanglen lampi-a namdangte Galilee chu nasatah-a abolgim be cheh ding ahi.

² Muthima vahle mihochun vah loupitah amutaove, thina lim gama chengho chunga chun kho avahtai.

³Nangman namtin vaipi chu napunsah-in, kipana napunsahtai; nangma masanga chang-at laija kipana bangin akipah-un, chule thilkichom akihoptenguva akipau bangin akipah uve.

⁴Ajehchu nangman amapa pohgih namkoljon le alengkouva mol lhon, chule sugentheipa moltum chu Midian ho nikho laija bangin nasuhbohpehtai.

⁵Ajehchu gal hatpa galbol jouse ginchu kisuhnohna awginin ajuijin, chule galvonho chu thisan abehjin, ahinla hichehi kavama meikhu sohding ahi.

⁶Ijeh inem itile eihodingin naosen khat apengin, chapa khat eikipeuve, chule vaipohna chu alengkouva aputding, chule aminchu kidangtah, thumopthem, hat chungnung Pathen, tonsot Pa, chamna leng chapa kitiding ahi.

⁷ David laltouna chung leh alenggam chunga avaipohna le chamna khangtou ding, akichaitih umlou ding ahi. Tua pat atonsot geija thutanna le thudih atundoh ding ahi. Janel Pakai tompanna chun hichehi abolding ahi.

⁸Pakaiyin Jacob thukhat athotnin, hichu Israel chunga alhungtai.

⁹Chule mijousen hichu aboncha ahetdiu ahin, Ephraimle Samaria'a cheng hoithotah le kiletsah tah-a seija:

¹⁰cheh ho achimlhatan ahinla song kikheng in kisah taovinge; Theiba akiphuhlhun ahinla cedar thingin kheltao vinge, tihochun hetao vinte.

¹¹Hijeh chun Pakaiyin Rezin kidoupiho chu ama doudin tungdoh intin, amelmate chu apankhompi ding ahin;

¹²amasanga Syria ho, anunglama Philistine hon kamka-a Israelte avallhumdiu ahi. Hicheng jouse jehhin alunghan abeidehpon akhut alamjing nalaijin ahi.

¹³Chuteng jongleh mipi ho chu abolgimpao heng lama akihei dehpouvin, janel Pakai jongchu aholdeh pouve.

¹⁴Hijeh chun Pakaiyin Israel'a kona alu le amei, abah le apumpeng chu nikhatleh asatlhah ding ahi.

¹⁵Miluile mija-um, amachu alu ahin. Jouthuhil themgao amachu amei ahi.

¹⁶Ajehchu hiche mite lamkaihon asuhkhelsah uvin, chule alamkai houchu suhmangin aumuve.

¹⁷Hijeh chun agollhangho chunga chun Pakai chu akipahpon, apabeiho le ameithaiteu hepinajong anei louhel ding ahi. Ajehchu amitakip aphalhemle khansetbol ahiuvin, akamuvin ngolthu aseicheh uve. Hicheng jouse jehhin alunghan abeidehpon, akhut alamjing nalaijin ahi.

¹⁸Ajehchu dihlou nahi mei bangin akadohjin; hichun lingle khaoho akahvam ding, chule gammang thim letlut lah-a kongdoh a; chule meikhu kitungdoh banga kaltou diu ahi.

¹⁹Janel Pakai lunghan na-a kona gamsunga thim jinga, mihochu meija tiding thing tobang hidiu ahin, koimachan asopipa jong akhen louding ahi.

²⁰Aman akhut jetnin manloi chelintin, hijongle agilkel phachom louding; Chule akhut veilamin nentin, oivadeh louding ahi, amitakipmin ama banphe cheh akineh dingu ahi.

²¹Manasseh, Ephraim; chule Ephraim, Manasseh: pangkhoma Judah te adoudiu ahi. Hicheng jouse jeh hin alunghana abeidehpon akhut alamjing nalaijin ahi.