Read Thado Chin Thempudan 1 Bible Online

Thempudan 1 - Thado Chin bible

Thempudan 1

¹Chuin Pakaiyin Mosi chu akouvin, houkhom ho houbuh-a kona chun ahenga thu ahin seijin, hitin ati,

²Israel chate ho henga seijin lang, ajah uva, Nalah uva khattouvin Pakai henga thilpeh ahin choija ahile, athilpeh hinchoi houchu gancha lah uva kon, bonghon lah-a kon, chule kel hon lah-a kon hitei ding.

³Amapa thilpeh chu bonghon lah-a kona govam thilto ahile, achal nolna beihel pehen: aman houkhom ho houbuh kotkhah phunga hing jing Pakai anga ama lungcham tah-a apehding ahi.

⁴Aman hiche govam thilto luchang chunga chu akhut angap ding, chuteng hichu ama dinga longlhena bolpehna dinga kisanpeh ding ahi.

⁵Aman bongchal chu Pakai anga atha ding: chule thempu, Aaron chapate chun thisan ahinchoi dingu, chule houkhom ho houbuh kotkhah phunga um maicham chung kimvela chu thisan chu athe chansoh dingu ahi.

⁶Aman govam thilto chu avun alipma, hal hala achenbong ding ahi.

⁷Chule Aaron thempu chapate chun maicham chunga mei akoidingu, chule chuche mei chunga chu thing gol kitoh chetna aset dingu,

⁸Chule Thempu Aaron chapateho chun akichen bong ho, aluchang, chule athao chu maicham mei kikoi chunga kise thing chunga chu kitohchetna aset dingu ahi.

⁹Ahinla asungho le akengho vang chu aman twija asoptheng ding: chule thempu chun govam thilto, meija kisem thilpeh, Pakai henga gimnamtui hidinga maicham chunga chu aboncha keija ahalding ahi.

¹⁰Ama thilpeh chu kelngoi hon ahilou leh keltah hon lah-a kona govam ganlhaina ding ahile; aman nolna beihel, achal ahin kaiding ahi.

¹¹Aman hichu maicham sahlam panga chu Pakai angsunga atha ding; chule thempuho, Aaron chapate chun maicham chung kimvela chu thisan chu athe chansoh dingu ahi.

¹²Aman hichu aluchang le athao toh puma achen bonga; chule thempu chun hicheho chu maicham chunga mei kihalna chunga thing kigoltoh chunga chu akoitoh chet ding ahi.

¹³Ahinla aman asungho le akengho chu twija asopding; chule thempu chun hichu aboncha ahinchoija maicham chunga ahalding ahi: hichu govam thilto, meija kisem thilpeh, Pakai henga gimnamtui chu hiding ahi.

¹⁴Pakai henga govam thilto-a dinga athilto chu vachaho ahitah-a ahileh, aman vakhu ahiloule vapal nou ahinchoi ding ahi.

¹⁵Thempu chun hichu maichama ahinchoija, alu ahetana, maicham chunga ahal ding ahi. Chule athisan chu maicham panga alhoh lhahding ahi.

¹⁶Aman achang oi le amul ho chu aloidoh ding, chule maicham solam sanga vut ho umna-a chu apaiding ahi.

¹⁷Chule aman alha teni chu aloikeh ding, ahivanga aloikhen pai louding; thempu chun hichu maicham chung, mei chunga um thing chunga chu ahal ding: hichu govam thilto, meija kisem thilto, Pakai henga gimnamtui chu hiding ahi.