Read Thado Chin Thempudan 10 Bible Online

Thempudan 10 - Thado Chin bible

Thempudan 10

¹Chuin Aaron chapate Nadab le Abihu'in alheng cheh ala lhonin, asunga mei akoi lhonin, chuin asunga chun gimnamtui akoi lhonin, aman athupeh-u hilou Pakai angsunga mei kidangtah atohdoh lhontan ahi.

²Chuin Pakaiya konin meikou ahungdoh-in, amani chu akan, Pakai angsunga chun athi lhontan ahi.

³Hichun Mosi'n Aaron henga, Hichehi Pakaiyin anasei, Keima eihin naiho-a chu suhthenga kaum ding, chule mipi ho jouse angsunga loupisah-a kaum ding ahi, tia aseichu ahi, ati. Chuin Aaron athipbeh tan ahi.

⁴Chuin Mosi'n Aaron paneopa Uzziel chapateni Mishael le Elzaphan chu akouvin, ajah lhona, Hungnai lhonin, munthenga konin nasopite niu hi gemun pamlama podoh lhonin atin ahi.

⁵Hitichun amani achenai lhonin, Mosi'n aseibang chun asangkhol lhona aman lhonin, apumin gebuh pama apodoh lhontai.

⁶Chuin Mosi'n Aaron le achapateni Eleazar le Ithamar henga, Naluchungu hohdoh hih-un, naponu jong botkeh hih-un; achuti loule thi khaovin natin, chule mipi ho jouse chunga lunghanna hunglhung khante: ahinla nasopiteu, Israel insung pumpi hin Pakaiyin achokou meikong hi lhasetpi joh-u hen.

⁷Chule nangho houkhom ho houbuh kotna kona nachedoh louhel dingu ahi, achuti loule thikhaovin nate: ijeh inem itile nachung uva Pakai thaonu chu uma ahi, ati. Chule amahon Mosi thusei bangchun abolcheh-un ahi.

⁸Chuin Pakaiyin Aaron henga aseijin, hitin ati,

⁹Nangma nahin, naumpi nachate ahiuvin, houkhom ho houbuh sunga nachelut tenguleh ju ahiloule khamnathei nadonlou dingu ahi, achuti loule nathi dingu ahi: hichehi nakhang khanguva a-itih-a dinga chonna dan hiding,

¹⁰Chutia chu nanghon atheng le athenglou, chule angim le angimlou nase khen theijuva,

¹¹Chule nanghon Israel chateho chu Pakaiyin Mosi khutna amaho aseipeh chondan jouse nahil theina dingu ahi, ati.

¹² Chuin Mosi'n Aaron le akidalha achapateni Eleazar le Ithamar henga, Meija kisem Pakai henga thilto lah-a aval anneh thilto chu laovin lang, hichu chol beijin maicham panga chun neovin: ajehchu hichu atheng chungnung ahi.

¹³Chule nanghon hichu muntheng mun'a chu naneh dingu ahi: ajehchu hichu meija kisem Pakai henga ganlhaina ho lah-a nangma chan chule nachapate chan hija ahi: hitia hi keima eina kithupeh ahi.

¹⁴ Chule jap thilto a-op le dop thilto adahbul chu nangma le nachapaten, chule nangma toh umkhom nachanuten muntheng khatna naneh diu ahi: ajehchu hicheho chu Israel chate chamna thilto ganlhainaho-a kona kipedoh nangma chan chule nachapate chan chu ahi.

¹⁵Dop thilto adahbul le jap thilto a-op chu amahon Pakai anga jap thilto-a ajap dinga meija kisem athao thilto chutoh ahin choitha dingu; chule hichu Pakai athupeh dungjuija a-itih-a chondan hidinga, nangma le naumpi nachapate chanding hiding ahi, ati.

¹⁶Chuin Mosi'n chonset thilto kelcha chu hoitah-in akholin ahile, veuvin, hichu akahvam tan ahi: hichun ahing nalai Aaron chapateni Eleazar le Ithamar chunga chun alung ahangin, hitihin aseitai,

¹⁷ Ipiding jeh penna nanghon chonset thilto chu theng chungnung ahi ti henasa le Pathen'in hichu houkhom ho chonkhelna poding le Pakai anga amaho dinga longlhenna bolna dinga nangho napeh-u ahi ti henasa-a munthenga naneh lou uham?

¹⁸Veovin, athisan chu muntheng sunga ahin kichoilut poi: keiman kathupeh banga, tahbeh-a nanghon hichu munthenga nananeh ding dolu ahi, ati.

¹⁹Chuin Aaron'in Mosi henga, Ven, tuni kho-a hi amahon achonset thiltou leh agovam thiltou Pakai anga atou ahin chule hitobang thil hohin eilhun khumtai. Chule keiman tuni hin chonset thilto chu ana netaleng, hichu Pathen mitmun san hinantem? ati.

²⁰Chuin Mosi'n hichu ajah phatnin, alunglhai tan ahi.