Read Thado Chin Thempudan 11 Bible Online

Thempudan 11 - Thado Chin bible

Thempudan 11

¹Chuin Pakaiyin Mosi le Aaron henga thu aseijin, hitin ati,

²Israel chate henga hitihin seipeh lhonin, Hiche hohi leiset chunga sa ho jouse lah-a naneh diu saho chu ahiuve.

³Sa jouse lah-a kon akengtin kikhena, atin ni-a kika, chule anehsa ihdoh kitna lhaikit tapou chu naneh dingu ahi.

⁴Hijeng jongle hiche hohin anehsa ihdoh kitna lhaikitnu henglang, atinnu kika jong le naneh lou dingu ahi: Sangongsang hin anehsa a-ihdoh kitnin alhainan, ahin akengtin akikah loujeh-in; ama chu nangho dinga athenglou ahi.

⁵Chule jupi khun anehsa a-ihdoh kitnin alhainan, ahin atin akikah loujeh-in, ama chu nangho dinga athenglou ahi.

⁶Chule telep khun anehsa a-ihdoh kitnin alhainan, atin akikah loujeh-in, ama chu nangho dinga athenglou ahi.

⁷Chule vohcha khu akengtin akikhena atin akikah jeng vangin, anehsa a-ihdoh-a alhailou jeh-in, ama chu nangho dinga thenglou ahi.

⁸Amaho sa naneh lou dingu, chuleh athilong jong natohkhah lou dingu ahi. Amaho nangho dinga athenglou ahiuve.

⁹Hichehohi twilah-a um naneh dingu jouse chu ahi: twilah-a um alha le alip neitapou, twikhanglen ho-a um hihen, vadung ho-a um hijongle, hicheho chu naneh dingu ahi.

¹⁰Chule alha le alip neilou ho jouse, twikhanglen ho-a um hihen, chule vadung ho-a um hijongle, twi lah-a chatle thei jouse le twilah-a um ahingthei jouse chu, nangho-a dinga thet umtah hiding ahi.

¹¹Amachu nangho dinga thet umtah hiding ahin; nanghon asa-u chu naneh loudiu, athilong hou chu thet uma nahet joh dingu ahi.

¹²Twilah-a um alha le alip neilou tapou hu nangho dinga thet umtah hiding ahi.

¹³Chule hiche hohi vachaho lah-a nanghon thil thet uma nahet dingu chu ahi; nanghon hicheho chu nanehlou dingu ahin, amaho thet umtah ahiuve: mulaopi, muvanlai chule mungagal.

¹⁴Muthong le, mu chilhah jouse:

¹⁵Va-ah tincheng le achilhah jouse;

¹⁶sumbupi, lhang simbu le kakhut, chule muthi le achilhah jouse,

¹⁷Chuleh sumbu neo, twivatot vom, chule sumbupi,

¹⁸Chule twivatot, twilen vamuhsao, chule chammu,

¹⁹Twiva, Vakengsang chule achilhah jouse, chule Vashonglhu chule bah.

²⁰Tolla vah vacha jouse, akeng li-a che ho jouse chu nangho dinga thet umtah hiding ahi.

²¹Hijongle nanghon nanehthei tolla vah kengli nei ahia lengle thei hochu, lei chunga chople nathei ding akengphang chunguva kengho neichan chu;

²²Amaho lah-a kona hicheho hi naneh thei dingu ahi; khaokho leh achilhah, khaonam leh achilhah, lhenglhe le achilhah, chule khaokhopi le achilhah.

²³Ahinla adang tolla vah kengli nei ahia lengthei jouse chu nangho dinga thet umtah hiding ahi.

²⁴Chule hicheho jeh-a hi nangho athenglou nahi dingu ahi: koi hile amaho thilong tongkha chu nilhah tokah-a aboh hiding ahi.

²⁵Chule koi hileh amaho thilong pokha chun apon akisop ding ahin, chule nilhah tokah-a aboh hiding ahi.

²⁶Sa akeng tin kikah-a ahia ni kisolou leh anehsa ihdoh-a lhailou taphot thilong chu nangho dinga aboh ahin; atongkha tapou chu aboh hiding ahi.

²⁷Chule akeng li-a che gamsa jouse lah-a, akhophanga chetapou chu nangho dinga aboh ahi; koi hileh amaho thilong tongkha chan chu nilhah tokah-a aboh hiding ahi.

²⁸Chule amaho thilong pokha chanchun aponho akisop ding, chule nilhah tokah-a aboh hiding ahi; amaho chu nangho dinga aboh ahi.

²⁹Hicheho jong hi leichunga vah ganhingho lah-a nangho dinga aboh hiding ahiuve; kongkoi, jucha, sumkong le achilhah,

³⁰Chule khoili, thangkip, tangnam, dahdeng chule bui,

³¹Hicheho hi avathoho jouse lah-a nangho dinga aboh hochu ahiuve: koi hileh amaho athi nunguva tongkha chan chu nilhah tokah-a aboh hiding ahi.

³²Chule ipi hitaleh hicheho hin athi nungule alhah khum pennu chu aboh hiding ahi: thinga kisem umle bel hihen, von hihen, vun hihen, dip hihen, chule itobang umle bel hihen ipi tobang bolna-a kimangcha hijongle, hichu twija delut ding ahin, chule hichu nilhah tokah-a aboh hiding ahi; chutengle atheng hibep ding ahi.

³³Chule hicheho chun akheh khum leibel tapou chu, asunga chu ipi uma hijongle aboh hiding; chuleh nanghon leibel chu nasukeh dingu ahi.

³⁴Nehthei anneh jouse lah-a chutobang twijin ajotkhum tapou chu aboh hiding: chule chutobang lhenga kona kidon tapou jongchu aboh hiding ahi.

³⁵Chule hicheho thilong halkhat nin alhahkhum thil tapou chu aboh hiding ahin; tapkong hihen, bel kitunggol hijongle, hicheho chu suhset hiding ahi: ajehchu hicheho chu aboh ahin, chule nangho dinga aboh hiding ahiuve.

³⁶Hijeng jongle twinah ahiloule komtong twi nengtah-a aumna mun chu atheng hiding ahi: ahinla ipi hijongle hicheho thilong tongkha chan chu aboh hiding ahi.

³⁷Chule hicheho thilong halkhat chun tuding muchi khattou akheh khuma ahile, hiche chu atheng hiding ahi.

³⁸Ahinla amuchi chunga chun twi themkhat akikoija, chule hicheho thilong halkhat chu hiche chunga chu achuh-a ahile, hichu nangho dinga aboh hiding ahi.

³⁹Chule naneh theiju saho lah-a kona khattou athia ahile; athilong tongkha chanchu nilhah tokah-a aboh hiding ahi.

⁴⁰Chule chuche thilong nekha chun aponho akisop ding, nilhah tokah-a aboh hiding ahi. Chule chuche thilong popa jongchun aponho akisop ding, chule nilhah tokah-a aboh hiding ahi.

⁴¹Chule leichunga kitholtho ganhing tapou chu thet um hiding ahi; hichu nehlou helding ahi.

⁴²Ipi hitaleh a-oija kithol, kenglia chetho, ahilouleh leichunga kithol tho ganhingho lah-a keng tampi neija kitholtho ho, hicheho chu nanehlou dingu ahi; ajehchu hicheho chu nangho dinga thet um ahiuve.

⁴³Nangho akitholtho ganhing tapouva naki suhboh louhel dingu, chule naboh louna dinguva amaho-a kona jong nakisuhnet lou dingu ahi.

⁴⁴ Ijeh inem itile keima Pakai na Pathen'u kahi. Hijeh-a chu nangho nakisuh thenguva, atheng nahi dingu ahi; ajehchu Keima atheng kahi. Chule leichunga kitholtho ganhing tapouva nangho le nangho naki suhboh lou dingu ahi.

⁴⁵Ijeh inem itile keima na-Pathen'u hidinga Egypt gama kona nahin puidoh uva Pakai chu kahi; Hiche jeh-a chu nangho nathen dingu ahi; ajehchu keima atheng kahi.

⁴⁶Hichehi saho, vachaho, twilah-a vahle ahingthei jouse, chule leichunga kitholthoho chung changa dan chu ahi;

⁴⁷Aboh le atheng khenna dingle, sa nehthei le nehtheilou kisekhen theina dinga ahi.