Read Thado Chin Thempudan 14 Bible Online

Thempudan 14 - Thado Chin bible

Thempudan 14

¹Chuin Pakaiyin Mosi henga aseijin, hitin ati,

² Hichehi miphah kisuhtheng nikho-a juiding dan chu ahi. Amachu thempupa henga ahinpui dingu;

³Chule thempupa chun gebuh-a kona potdoh ding; chule thempupa chun avetding, chule veuvin miphahpa chunga hise chu adam tah-a ahile;

⁴Chuteng thempupan akisuhtheng dingpa henga kona chu vacha theng ahing ni, chuleh Cedar thing, ponsanthip le Hyssop lah dinga athupeh ding ahi.

⁵Chule thempupa chun vacha ho lah-a khat chu leibel sunga twi lona chunga nathadiu ahi, tia athupeh ding ahi.

⁶Vacha ahingpa chu ahile, cedar thing, Ponsandup chule Hyssop chu alah-a, hicheho chu vacha hing chutoh twi long chunga kithat vacha thisana chu adelut ding ahi.

⁷Chule aman aphahna akona kisutheng dingpa chunga sagi vei athin ding, chule amapa chu atheng ahitai tia aphondoh ding, chule vacha hing chu gam onga alha mang ding ahi.

⁸Chule akisutheng dingpa chun aponho asopma, chule asam jouse ahet tolla, ama athen theina dinga twija gakisil ding ahi. Chujou teng chule ama gebuh sunga hunglut ding, aponbuh pama ni sagi khongai nalai ding ahi.

⁹Ahinla ni sagi lhin ni-a chu aman aluchanga asam jouse, akhamul chuleh amitchung mul jouse, amulho jouse ahet ngima, chule aman aponho asopma, ama tahsa jeng jong twija asil ding ahi, chule ama theng ding ahi.

¹⁰Chule niget lhin nileh aman nolna beihel kelngoinou chal ni leh, nolna beihel kelngoinou anu kumkhat lhingbep khat, chule anneh thilto ding changbong nel thao toh kihal ephah hopsom-a hopthum, chule thao log [1] khat ahin choiding ahi.

¹¹Chule ama suthenga pang thempupa chun akisutheng dingpa le chuche thil ho chu houkhom ho houbuh kotphunga apehlut ding ahi.

¹²Chule thempupa chun kelngoinou khat chule thao log khat chu alah-a, suhkhel thilto dinga ato-a, chule Pakai angsunga jap thilto-a ajap ding ahi.

¹³Chule aman kelngoinou chu chonset thilto chule govam thilto athana ding munthenga mun'a chu athading ahi; ajehchu chonset thilto thempupa-a ahibanga, suhkhel thilto jong chutobangma chu hija ahin; hichu atheng chungnung ahi.

¹⁴Chule thempupa chun suhkhel thilto thisan chu phabep alah-a, thempupan hichu akisutheng dingpa jetlam bilmong, akhut jetlam khutpi chung, le akeng jetlam kengpi chunga anuding ahi.

¹⁵Chule thempupan thao log khatna kona chu phabep alah-a, aveilam khutphang chunga alheilhah ding ahi.

¹⁶Chule thempupan akhut veilama um thaova chu akhut jetlam khut jung adelutna, akhut junga thao chu Pakai anga sagivei athe ding ahi.

¹⁷Chule akhutna umnalai thao amohse chu thempupa chun akisutheng dingpa jetlam bilmong, ajetlam khutpi, ajetlam kengpi chunga, chule suhkhel thilto thisan chunga chu anuding ahi.

¹⁸Chule thempupa khutna thao umnalai amohchu aman akisutheng dingpa lujanga asunlhah ding, chule thempupan ama dinga chu Pakai anga longlhena abolpeh ding ahi.

¹⁹Chule thempupa chun chonset thilto chu ato-a, athen louna-a kona kisutheng dingpa-a dinga longlhenna abolpeh ding; chule aman govam thilto chu athading ahi.

²⁰Chule thempupan maicham chunga um govam thilto le anneh thilto chu atoding, chule thempupan ama dinga longlhena abolpeh ding: chuteng ama atheng hiding ahitai.

²¹Ahinla ama chu mivaicha ahia, chuchengpi chu atojou louva ahile, aman alonglhena kibolna dinga suhkhel thilto-a jap dinga kelngoinou khat ahin kaiding; chule anneh thilto-a dinga changbong neljet thao toh kihal ephah hopsom-a hopkhat le thao log khat,

²²Chule aman amujou dandana vapal ni ahiloule vakhu nou ni; khat chu chonset thilto ding le adang khat chu govam thilto dinga ahinchoi ding ahi.

²³Chule hicheho chu aman niget lhin nileh akisuhtheng nadinga thempupa henga, houkhom ho Houbuh kotphunga Pakai angsunga chu ahin choiding ahi.

²⁴Chule thempupa chun suhkhel thilto kelngoinou leh thao log dimkhat chu alah ding, chule thempupa chun hichu Pakai anga jap thilto ato ding;

²⁵Chuteng aman suhkhel thilto kelngoinou chu athading, chule thempupa chun chuche suhkhel thilto thisan phabep chu alah-a, akisutheng dingpa jetlam bilmong chunga, ajetlam khutpi chunga, chule ajetlam kengpi chunga anuding ahi.

²⁶Chule thempupa chun thao chu ama khutphang veilam chunga alheilhah ding,

²⁷Chule thempupa chun akhut veilama um thao chu ajetlam khutjunga sagi vei Pakai angsunga athe ding,

²⁸Chule thempupa chun akhutna thao chu akisutheng dingpa jetlam bilmong chunga, ajetlam akhutpi chung, ajetlam kengpi chunga, chule suhkhel thilto thisan chunga chu anuding ahi.

²⁹Chule thempupa khutna aum nalaiho sechu, aman akisutheng dingpa lujanga anua, amapa-a dinga chu Pakai anga longlhena abolpeh ding ahi.

³⁰Chule aman amapan amujou dungjuija ahinchoi vakhu teni ahilou leh vapal nou teni chu lah-a, khat chu atoding,

³¹Amapan amujou dungjuija khat chonset thilto dinga, chule adang khat chu anneh thilto le govam thilto dinga ahinchoi ding, chule thempupa chun Pakai anga akisutheng dingpa chu longlhena abolpeh ding ahi.

³²Hichehi koi hileh phah hise veija, akhutna akisuhtheng nadinga kimujou louho chunga kimang ding dan chu ahi.

³³Chuin Pakaiyin Mosi le Aaron henga aseijin, hitin ati,

³⁴Keiman nalodiuva kapeh-u Canaan gam nahung lutnuva, chule keiman nalonao gamsunga chu insung khatna phah hise kachuhsah tengleh;

³⁵Chuche inneipa chu thempupa henga hunga, Insunga hin hise khat um bangin kahe-e, tia aseiding ahi.

³⁶Chutengle thempupa chun chuche insunga umjouse chu abona aboh ahilouna dinga, ama hise phochen dinga insunga asunglhah masanga, a-in chu amahon asuh-ong nadiuva thupeh apehding ahi. Chujou tengle thempupa chu insung vedinga sunglha ding ahi.

³⁷Chule aman hise avetna, chule veuvin, hise chu in-bang dunga auma, engdang ahilouleh sandang banga akilah-a, bang sanga athuhlut joh-a ahile,

³⁸Chuteng thempupa chu insunga kona kotphunga hungdoh-a, a-in chu nisagi akhatup ding ahi.

³⁹Chule thempupa chu nisagi nile hungkitna, avetding, chule hise chu chuche inbang ho-a ana challa ahile;

⁴⁰Chuteng thempupa chun hise umna in'a song ho chu alahdoh diuva athupeh ding, chule amahon song ho chu khopi pam muntheng lou khatna aselut dingu;

⁴¹Chule aman a-insung kimvel chu ahet theng sah ding, chule amahon ahet lhah-u vutvai chu khopi pam muntheng lou mun khatna agasun lhah dingu ahi.

⁴²Chule amahon song chombeh alah uva, chuche songho umna-a chu akoikhel dingu, chule aman leingan dang alah-a, in chu aloithah ding ahi.

⁴³Chule ijemtia aman songho alahdoh-a, a-in chu ahet ngima, chule aloithah kit jouva, hise chu ahungkitna chuche insunga chu ahung sokitna ahile;

⁴⁴Chutengle thempupa chu hunga avetding, chule hise chu insunga kithe jalsoh-a ahile; insunga chu tijat umtah hise chua ahitan; chule hichu athenglou ahitai.

⁴⁵Chule aman a-in, asongho, athing ho, chule aloina jouse asuhsetna, chule khopi polam muntheng lou laija apohdoh ding ahi.

⁴⁶Chujongle chuche in khachah-a aum laisungse-a chu koitobang agalutna aumle, amachu nilhah tokah-a atheng louva umding ahi.

⁴⁷Chule chuche insunga galum kha-a chun aponho akisopma, chule chuche insunga gane kha-a chun aponho akisop ding ahi.

⁴⁸Chule a-in kiloithah jouva chu thempupa ahung lutna, ahungvetna, chuleh a-insunga hise chu kithejal soh louva ahile; thempupa chun in chu atheng ahi tia aphonding ahi: ajehchu hise chu dama ahitai.

⁴⁹Chule aman in suhtheng nadinga vacha ni, Cedar thing le Ponsanthip, chuleh Hyssop alah ding,

⁵⁰Chule vacha teni lah-a khat chu leibel sunga twilong chunga athading,

⁵¹Chule aman cedar thing, hyssop, ponsanthip, chule vahing chu alah-a, vacha kithat thisan sungle twi longa adelut ding, chule in chu sagi vei athekhum ding;

⁵²Chule aman vacha thisana, twilonga, Cedar thinga, hyssopma, chule ponsanthipma in chu asuhtheng ding ahi.

⁵³Ahin aman vacha hing vangchu khopi pampeh gam onga agalha doh ding; chule chuche insung dinga chu longlhena abolding; chule hichu atheng hiding ahitai.

⁵⁴Hiche hi phah hise jouse le tithah jouse,

⁵⁵Chule vonphah, inphah,

⁵⁶Apomdoh, akhihdoh, chule avamdoh-a dinga dan chu ahin,

⁵⁷Athenlou pet le athen pet kihetna dinga kihilna chu ahi: hiche hi phah chung changa dan chu ahi.