Read Thado Chin Thempudan 15 Bible Online

Thempudan 15 - Thado Chin bible

Thempudan 15

¹Chuin Pakaiyin Mosi le Aaron henga aseijin, hitin ati,

²Israel chate henga thu seilhonin lang, ajah uva hitin seilhonin, Pasal khattou atahsa-a kona longdoh thi neija ahile, hiche athi lonjeh-a chu amachu aboh hiding ahi.

³Hiche hi athilong doh-a kona abohna hiding ahi: athi longdoh atahsa-a kona ahung londoh jenga, ahiloule atahsa-a kona alondohsah da-a ahijongle, amachu athenglou ahi.

⁴Thilongdoh neipa galupna jalkhun tapou chu aboh ahin, chule ama toupha thil jouse jongchu aboh hiding ahi.

⁵Chule thilongdohpa lupna tongkha tapou chun aponho asop ding, amatah twija kisil ding, chule nilhah kah-a aboh hiding ahi.

⁶Chule thilongdoh pa toupha thil tapou chunga gatouva chun aponho asop ding, amatah twija kisil ding, chule nilhah kah-a aboh hiding ahi.

⁷Chule thilongdoh neipa tahsa tongkha tapou chun aponho akisop ding, amatah twija kisil ding, chule nilhah tokah-a aboh hiding ahi.

⁸Chule thilongdohpa chun mi atheng khattou achil aset khum khah-a ahileh, amapan aponho asopding, amatah twija kisil, chule nilhah kah-a aboh hiding ahi.

⁹Chule thilongdohpa touna tapou chu aboh hiding ahi.

¹⁰Chule koi hile ama delpha thil tapou gatongkha chan chu nilhah kahse-a aboh hiding; chutobang thilho tapou pole-a chun aponho akisop ding, amatah twija kisil, chule nilhah kah-a aboh hiding ahi.

¹¹Koihileh thilongdohpa tongkha-a twija akhut teni soplou chun, aponho akisop ding, amatah twija kisil, chule nilhah kah-a aboh hiding ahi.

¹²Chule thilongdoh pan atohkhah leija kisem umle bel tapou chu suhkeh ding, chule thinga kisem umle bel tapou chu twija silding ahi.

¹³Chule thilong neipa chu athilon na-a kona suhthenga aumteng, aman akisuhtheng nading nisagi akisimdoh ding, aponho asopma, chule atahsa chu twilonga asil ding, chule atheng hiding ahi.

¹⁴Chule aniget chan nileh aman vapal nou ni ahiloule vakhu ni akilah-a Pakai anga houkhom ho Houbuh kotphunga hunga chule hichu thempu apeh ding ahi.

¹⁵Chule thempu chun khat chu chonset thilto-a, chule adangkhat chu govam thilto-a atoding; chule thempupa chun Pakai anga athilondoh jeh-a chu ama dinga longlhena abolpeh ding ahi.

¹⁶Chule pasal khattou abotwi achedoh tah-a ahile, aman atahsa twija asilding, chule nilhah tokah-a aboh hiding ahi.

¹⁷Chule chuche abotwi chuhna pon le savunho jouse chu twija sopding, chule nilhah tokah-a aboh hiding ahi.

¹⁸Chujongle numei chu pasal to alupkhoma, amapa botwi chu apotdoh-a ahile, anilhona twija kisilding, chule nilhah kahse-a aboh hilhon ding ahi.

¹⁹Chule numei jin ama-a kona thil longdoh aneija, chule atahsa-a kona longdoh chu thisan ahia ahile; amanu chu ni sagi chom koidoh ding ahi: chule koi hileh amanu tongkha-a chu nilhah kahse-a aboh hiding ahi.

²⁰Chule amanun aga chom um sunga agalup pha chule aga toupha thil tapou ho chu aboh hiding ahi.

²¹Koi hileh amanu jalkhun gatongkha tapou chun aponho asopding, amatah twija kisil ding, chule nilhah tokah-a aboh hiding ahi.

²²Koihileh amanun atoupha thil tapou gatongkha chun, aponho asopding, amatah twija kisil ding, chule nilhah tokah-a aboh hiding ahi.

²³Amanu jalkhun chunga um hihen, atoupha thil khattou hileh, amapan agatoh khah leh, amapa chu nilhah kahse-a aboh hiding ahi.

²⁴Chule pasal'in amanu aluppi jengtah-a, amanu thi chu amapa chunga abeleh, amapa chu ni sagi aboh hiding; chule alupna jalkhun jouse chu aboh hiding ahi.

²⁵Chule numei khatnin angaina banglouva nitamtah thi aneija, ahiloule achoma aumna phat valsetna thi aneija ahile; athilon na-a athenlouna nikhosung sese chu amanu achoma aumna nikho hiding ahi; amanu chu aboh hiding ahi.

²⁶Thilonga aumsung se-a alupna jalkhun tapou chu amanu dinga chom koidoh-a aumna jalkhun tobang ding ahi. Chuleh amanun atoupha thil tapou chu, achoma aum sunga aboh banga aboh hiding ahi.

²⁷Chule koihile chuche thilho tongkha-a chu aboh hiding ahin, aponho akisopma, amatah jong twija kisila, chule nilhah tokah-a aboh hiding ahi.

²⁸Ahinla athilonna-a kona chu athen tah-a ahile, amanun ama-a dinga nisagi akisimdoh ding, chujouteng amanu atheng hiding ahitai.

²⁹Chule aniget chanileh amanun vapal ni ahilouleh vapal nou ni akilah-a, houkhom ho houbuh kotkhah phunga thempupa henga ahin choiding ahi.

³⁰Chuteng thempupa chun khat chu chonset thilto-a, chule khat chu govam thilto-a ato ding, amanu thenlouna thilongdoh jeh-a chu amanu-a dinga Pakai angsunga longlhena abolpeh ding ahi.

³¹Chutia chu amahon alah uva um houkhom ho houbuh chu asuhboh tenguleh, athenlou naova athilouna dinguva, nanghon Israel chate chu thenlouna-a kona nakhendoh dingu ahi.

³²Hichehi ama-a kona thilondoh jeh le, abotwi chedoh jeh-a thenglouho,

³³Chule athilon jeh-a dammo-a numei, chuleh athi longa pasal le numei, chule thinei numei lupia pasal ho-a dinga danthu chu ahi.