Read Thado Chin Thempudan 16 Bible Online

Thempudan 16 - Thado Chin bible

Thempudan 16

¹Aaron chapaten Pakai angsunga thilto aneipet lhona athilhon jouvin, Pakaiyin Mosi henga aseijin,

² nasopi Aaron henga, athilouna dingin thingkhong chunga hepi touna masanga ponjal sunga um muntheng sunga aphat jouse-a ahunglut louna dingin seipeh-in; ajehchu hepi touna chunga chu keima meiloma kahung kilah ding ahi, ati.

³ Aaron chu muntheng sunga hitia hi hunglut ding ahi: chonset thilto dinga bongchalnou khat, govam thilto dinga kelngoichal khat.

⁴Aman tupat sangkhol theng chu aki-ah-a, atahsa chunga chu tupat pon chu akichen ding, tupat konggah akigah-a, chule tupat lukhuh chu akikhuh ding ahi: hichehohi vontheng ahin, hijeh-a chu aman atahsa twija akisila, chuleh akivon ding bou ahi.

⁵Chule Israel chate houkhom ho-a kona chu chonset thilto-a dinga kelnou ni leh govam thilto-a dinga kelngoichal khat alahding ahi.

⁶Chule Aaron'in ama chonset thilto bongchal chu ama dinga atoa, ama-a dingle a-insung dinga longlhena abolding ahi.

⁷Chuteng aman kelcha ni chu alah-a, houkhom ho Houbuh kotkhah phunga Pakai angsunga apehdoh ding ahi.

⁸Chule Aaron'in kelcha ni chunga chu, khatchu Pakaiya dinga, chule adangkhat chu keldai dinga vangvetna aneiding ahi.

⁹Chule Aaron'in Pakaiya dinga vang chuhna kelcha chu ahinkaija, chonset thilto-a atoding ahi.

¹⁰Ahinla keldai dinga achunga vang chuhna kelcha chu, longlhenna bolna-a mandinga ahinga Pakaiya apehlut ding, chule keldai dinga gamthipma agalhadoh ding ahi.

¹¹Chule Aaron'in ama chonset thilto-a ding bongchal chu ahin kaija, ama le a-insung dinga longlhenna abolding, chule ama chonset thilto-a ding bongchal chu athading:

¹²Chule aman Pakai angsung maichama kona chu mei-am lhengkhat dim leh akhut dimsetna gimnamtui dimset kisubong chu alah ding, chule pondal sunga achoilut ding ahi.

¹³Chuteng aman hiche gimnamtui khu chun hettohsahna thingkhong chunga um hepi touna chu akhu-a chutia chu ama athi louna dinga, Pakai angsunga gimnamtui chu meisunga akoilutding ahi.

¹⁴Chule aman bongchal thisan chu alah-a, hichu akhutjunga hepi touna chung solam sanga atheding; chule hepi touna maija chu thisan chu akhut junga sagivei atheding ahi.

¹⁵ Chujouteng aman chonset thilto kelcha chu mipi ho-a dinga atha-a, athisan chu ponbuh sunga ahin choilutna, bongchal thisan abol banga chu abolding, chule hepi touna chung le hepi touna maija chu atheding ahi.

¹⁶Chule aman Israel chateho chu athenlou jeh-u le asuhkhel uva achonset jeh uva, munthenga dinga chu longlhenna abolpeh ding ahi: chule hitia chu athenlou nalah uva um houkhom ho houbuh-a dinga chu abolding ahi.

¹⁷Chule ama muntheng sunga ama le a-insung ding, chule Israel houkhom ho jouse dinga longlhenna boldinga agalutna chule ahungdoh kahse-a, koimacha houkhom ho Houbuh sunga chu umlou ding ahi.

¹⁸Chule Pakai angsunga um maicham mun'a chu che-a, hiche dinga chu longlhenna aga bolding; chule bongchal thisan le kelcha thisan chu phabep alah-a, maicham sakiho chunga chu akoi kimvel ding ahi.

¹⁹Chule aman hiche chunga chu akhutjunga thisan sagivei athea, asuhthenga, Israel chate athenlou naova kona asuhtheng ding ahi.

²⁰Chule aman muntheng le houkhom ho Houbuh chule maicham chu kichamna aboljou tengleh, kelcha hing chu ahin kaiding:

²¹Chule Aaron'in akhut teni chu kelcha lujanga angapma, achunga chu Israel chateho khangitlouna jouse, asuhkhel nao jouse leh achonsetnao jouse aphondoh-a, kelcha lujanga akoija, chule mihem aboldinga kilom khat khutna gamthipma aga lhadohsah ding ahi.

²²Kelcha chun amaho khangitlouna jouse chu achunga apoh-a, koima chen louna gama apohlut ding; chule mipa chun kelcha chu gamthipma agalha ding ahi.

²³ Chujouteng Aaron chu houkhom ho houbuh sunga hunga, munthenga agalut petna avonho, tupat vonho chu asuhlhah-a, chua chu adalhah ding ahi.

²⁴Chule aman munthenga um twija atahsa akisila, avonho akivona, chule hungdoh-a govam thilto, mipi ho govam thilto chu atoding, chule ama-a ding le mipi ho-a dinga longlhenna abolding ahi.

²⁵Chule chonset thilto thao chu maicham chunga agoding ahi.

²⁶Chule keldai dinga kelcha galhadohpa chun aponho akisop ding, chule atahsa twija asila, chujouteng gebuh sunga hunglut ding ahi.

²⁷ Chule thisan munthenga longlhen bolna-a kipolut chonset thilto-a ding bongchal le chonset thilto-a ding kelcha chu khatnin gebuh pama apohdoh ding; chule amahon avunho, apheho le a-eh ho chu meija agodiu ahi.

²⁸Hitiho meija gagoupa chun aponho asopding, ama chu twija atahsa akisil ding, chujouteng leh gebuh sunga hunglut ding ahi.

²⁹Chule hichehi nangho dinga a-itih-a chondan hiding ahi: lhasagi chana nisom lhin nikhole nanghon nahinnao nakisuh gim dingu, nagamsung miu hihen lang, gamdangmi nalah uva khopen hijongle natoh kiti him him natohlou dingu ahi.

³⁰Ijeh inem itileh Pakai angsunga nachonset nahou jouse-a kona nathen theina dinguva, chuche nikho teng chuleh nangho suhthengna dinga thempun nangho dinga longlhenna nabolpeh dingu ahi.

³¹Hiche nikho chu nangho dinga choldona dinga cholngah ni hiding, chule a-itih-a chondan hidinga nahinnao nasuh gim dingu ahi.

³²Chule aman apa khela thempu tohmuna natong dinga thao anua, akatdoh thempupa chun longlhenna chu abolding, chule tupat ponho le vontheng ho jeng jong chu akivon ding ahi.

³³Chule aman munthenga dinga longlhenna abolding, maicham leh houkhom ho houbuh-a dinga longlhenna abolding, chule thempuho leh houkhom mipi ho-a dinga longlhenna abolding ahi.

³⁴Hichehi Israel chatea dinga kumkhatna khatvei achonset nahou jouse jeh-a longlhenna bolna dinga, nangho-a kipe a-itih-a chondan hiding chu ahi. Chuin aman Pakaiyin Mosi athupeh bangin aboltan ahi.