Read Thado Chin Thempudan 18 Bible Online

Thempudan 18 - Thado Chin bible

Thempudan 18

¹Chuin Pakaiyin Mosi henga aseijin, hitin ati,

²Israel chate henga thu seijin lang, ajah uva hitin seijin, Keima Pakai na Pathen'u kahi.

³Nana chenao Egypt gam chonna banga nangho nachon loudiu, chule keiman nangho kahin lhutna Canaan gam chonna banga jong nachon louhel dingu: chule amaho chona dan jong najuilou dingu ahi.

⁴Nangho kathulhah ho-a nachon uva, chule hicheho-a chu nalam lhah theina dinguva kachona danho nanit dingu ahi; Keima Pakai na Pathen nu kahi.

⁵ Hijeh-a chu nanghon ka chondan kisun hole keima thutanna ho nanitdiu: hichu mikhatnin anitleh ama hicheho-a chu hing ding ahi; keima Pakai kahi.

⁶Nangho koimachan akinaipi a-insungmi sagohkeo hodohpeh dinga najot lou dingu ahi: Keima Pakai kahi.

⁷Nangman napa sagohkeo hina ahilouleh nanu sagohkeo hina chu naho dohpeh louding ahi: amanu nanu ahin, amanu sagohkeo hina chu nangman naho dohpeh louding ahi.

⁸ Nangman napa jinu sagohkeo hina naho dohpeh louding ahi: Hichu napa sagohkeo hina ahi.

⁹ Nangman nasopi, napa chanu hihen, nanu chanu hijongle, in'a peng hihen mun danga peng hijongleh, asagohkeo hina chu naho dohpeh louding ahi.

¹⁰Nangman nachapa chanu hihen, nachanu chanu hijongle, asagohkeo hina chu naho dohpeh louding ahi. Ajehchu amaho sagohkeo hina chu nangma sagohkeo hina ahibouve.

¹¹Napa jinu chanu, napan ahinchu nasopinu ahi, nangman amanu sagohkeo hina naho dohpeh louding ahi.

¹² Nangman napa sopinu sagohkeo hina chu naho dohpeh louding ahi. Amanu chu napa kinaipi asopinu ahi.

¹³Nangman nanu sopinu sagohkeo hina naho dohpeh louding ahi. Ajehchu amanu chu nanu kinaipi asopinu ahi.

¹⁴Nangman napa sopipa sagohkeo hina naho dohpeh louding, nangman ama jinu jong nagajot lutlou ding ahi: amanu chu nanungah ahi.

¹⁵ Nangman namounu sagohkeo hina naho dohpeh louding ahi: amanu chu nachapa jinu ahin; nangman amanu sagohkeo hina naho dohpeh louding ahi.

¹⁶ Nangman nasopipa jinu sagohkeo hina naho dohpeh louding ahi: nasopipa sagohkeo hina ahi.

¹⁷ Nangman numei khatleh achanu sagohkeo hina naho dohpeh louding, chule achapa chanu ahilouleh achanu chanu jeng jong asagohkeo hinao hodohpeh dinga nakipui louding ahi: ajehchu amanu kiguijoppi numei ho ahiuve: hichehi gitlouna ahi.

¹⁸Chule nangman numei khatchu asopinu hinlai sungse-a, amanu suhgentheina ding le ama sagohkeo hina hodoh peh dinga asopinu chu nakipuithei louhel ding ahi.

¹⁹ Chujoule athenlou jeh-a chomkoija aumlai sungse-a, nangman amanu sagohkeo hina hodoh peh dinga najot louhel ding ahi.

²⁰ Chukalvala jong nangman nakisuhboh na dinga naheng nakom inneipi chu aluppi louding ahi.

²¹ Chule nangman nachilhah lah-a khatcha jong Molech houna dinga meija govam dinga naphal doh louhel ding, na Pathen min jong nasuh minset louding ahi: keima Pakai kahi.

²² Nangman numei toh nalupkhom banga pasal toh nalupkhom louding ahi: hiche chu thet umtah ahi.

²³ Chule nangma nakisuhboh nadinga ganhing kiti tapou toh nalupkhom louding ahi. Numei tapou jongchu ganhing khat anga aluppi dinga gaum lou ding ahi: hichehi jon chungnung ahi.

²⁴Hiche thil ho kiti tapouva hin nangho kisuboh hih-un: ajehchu nangho masanga kana paidoh namho chu hicheho jouse-a hi kisuboh ahiuvin:

²⁵Chule gam chu suhboh-in aumtan: hijeh-a chu keiman akhangitlou naochu talen kamat sah-a, gamsung amatah-in achengho chu ahin lohdoh ahi.

²⁶Hijeh-a chu nanghon keima chondanho le kathu tan naho nanit tei dingu, chule nanam mite ahiuva, gamdang mi nalah uva khopemho ahiuva jong, hiche kidah umho hi khatcha jong nabol lou dingu ahi:

²⁷(Ijeh inem itile nangho masanga agama um miho chun hiche kidah umhohi ana bolu ahin, chule gamsunghi suhboh-a anaum ahi;)

²⁸Agam min nangho masanga anaumho analodoh banga, nanghon jong nasuhboh tengule nalohdoh louna diuvin.

²⁹Ajehchu koihile hiche kidah umho lah-a khat bolla chu, hiche tobang bola mihem chu amite lah-a kona paidoh-a umding ahi.

³⁰Hijeh-a chu namasanguva ana kibol hitobang thet umtah chonnaho hi nabol louna dingule, hitiho-a hi suhboh-a naum louna dinguva, ka thupeh hohi nanit dingu ahi: keima Pakai na Pathen'u kahi.