Read Thado Chin Thempudan 19 Bible Online

Thempudan 19 - Thado Chin bible

Thempudan 19

¹Chule Pakaiyin Mosi henga aseije, hitin ati,

² Israel chate houkhom ho jouse henga hitihin seijin, Nangho nathen dingu ahi: ajehchu keima Pakai na Pathen'u hi atheng kahi.

³ Nangho amitakipmin nanu le napa naginuva, chule kacholngah nikho ho nanit dingu ahi, keima Pakai na-Pathen'u chu kahi.

⁴ Milimho lama kihei hih-un lang, alim semthu pathen ho jong kisem hih-un: keima Pakai na-Pathen'u chu kahi.

⁵Nanghon Pakai henga chamna thilto longlhenna nato uva ahile, nanghon hichu nalungcham tah uva nato dingu ahi.

⁶Hichu natodoh nikhou le ajing nikho-a nanehjou tei dingu ahi: ijemtia ani thum ni geija um nalaija ahile, hichu meija goding ahi.

⁷Chule hichu anithum ni-a akineh poupouva ahile, kidah umtah ahin; hichu kisang louding ahitai.

⁸Hijeh-a chu ane jouse chun Pakai thiltheng asuh minset jeh uva, akhangit lounao akipoh cheh dingu: chule hiche mihem chu amite lah-a kona paidoh-a umding ahi.

⁹ Nangman nagam ga na-at teng le, nangman nalou ningho jouse chu na-at sohkei louding, chule na-at na-a alhajah ho chu nakichom ngim louding ahi.

¹⁰Chule nangman nalengpi thei gaho nachom ngimsel louding, nalengpi thei gaho jong aboncha nalotheng louding; hitiho chu vaichate le gamdang mi dinga nakhenpeh ding ahi: keima Pakai na-Pathen'u chu kahi.

¹¹ Nangma naguchat louding, dihlou tah-a jong nabol louding, chule khat le khat kah-a jong jou nasei louding ahi.

¹² Chule nangma kamin panna jouva nakihahsel louding, na-Pathen minjong nasuh minset louding ahi: keima Pakai chu kahi.

¹³ Nangman naheng nakom najoulhep louding, chomjong nachom louding ahi. Akigoipa lo chu jan khovah-a jingkah geija nakoma naumsah louding ahi.

¹⁴ Nangman na-ngong nagaosap louding, mitcho masanga jong kipal lhuh theina nakoi louding ahi, na-Pathen joh nagin ding ahi: keima Pakai chu kahi.

¹⁵ Nathu tan na-a chonphat louna nabol louding ahi: nangman mivaichate chu nakhohsah chom louding, ahiloule mithaneite jong najabol chom louding: amavang chonphatah-a naheng nakom thu natan ding ahi.

¹⁶Chule nangma namite lah-a thuse seija nachesuh nachetouna louding: chule naheng nakom thisan thua jong jouthu-a napan louding ahi: keima Pakai chu kahi.

¹⁷ Nangman nalungsunga nasopipa nahotbol louding: iti nama jongle nangman naheng nakom naphosal louding, chule chonset nabolsah louding ahi.

¹⁸ Nangman phu nalah louding, namite chateho chunga thangthipna jong nanei louding ahi, amavang nangman naheng nakom chu nangma naki ngailut banga nangailut ding ahi: keima Pakai chu kahi.

¹⁹ Nanghon kachondan ho nanit diu ahi. Nanghon nagancha hou chu gancha dangto nakimatsah lou dingu ahi: nanghon nalou uva muchi natu hal lou dingu ahi. Chule tupat le samul kihal von jong nachunga nakaisah louding ahi.

²⁰Chule soh numei, pasal khat dinga khao khisa, lhadoh loulai le chamlhatna peh loulai khat chu tahsa ngaichatna jeh-a khattouvin aluppia ahile, amanu chu kijepding ahi: amanu chamlhat ahiloujeh-a anilhona vang kithat louding ahi

²¹Chule amapa chun asuhkhelna thilto chu Pakai henga houkhom ho houbuh kotkhah bula chu ahinchoi ding, suhkhkelna thilto dinga kelngoi chal khat ahinkai ding ahi.

²²Chuteng thempupa chun amapan anabol chonsetna jeh-a chu, amapa dinga suhkhel thilto kelngoi chal chu Pakai anga atodoh-a, amapa dinga longlhenna abolpeh ding ahi: chutengle amapan anabol chonsetna chu kingaidam ding ahi.

²³Chule nangho chuche gama nalut uva, chule nanghon nehdinga thing namkim naphu tengule, aga chu cheptan louva nasim dingu: hichu nangho dinga kum thum cheptan lou hiding; hichu nanehlou dingu ahi.

²⁴Ahinla akum li na-a vang chuche gaho jouse chu, Pakai vahchoina dinga atheng hiding ahitai.

²⁵Chule akum nga na vang, nangho-a dinga aga asodoh thei nadinga aga naneh dingu ahi: keima Pakai na-Pathen'u chu kahi.

²⁶ Nanghon imacha athisan puma nanehtha lou dingu: chule mitpheldoi le ailhim namanchah lou dingu ahi.

²⁷ Nanghon nasamu nahet tol kimvel lou dingu, chule nabeng mul hou jong aning navoset lou dingu ahi.

²⁸Nanghon mithiho jeh-a natahsao na-at pop lou dingu, chule nati chunguva jong imacha lim nasemlou dingu ahi: keima Pakai chu kahi.

²⁹ Nangman jonthanhoi sahna dinga nachanu noti'a napansah louding ahi; achuti loule gamsung hi jonthanhoina-a hunglhun tin, gamsunghi gitlouna-a dim ding ahi.

³⁰ Nanghon kacholngah ho nanit diu; chule kamun theng naja dingu ahi: keima Pakai chu kahi.

³¹ Nanghon amaho-a kona nakisuhboh louna dingun lhakou mangchaho ngaisang hih-un, chule doithemho jong hol hih-un: keima Pakai na-Pathen'u chu kahi.

³²Nangma lukangho masanga nadin doh ding, tehse mai najading, chule na Pathen nagin ding ahi: keima Pakai kahi.

³³ Chule namdang khat nagam sunga nangho toh akhopem khoma ahile, ama chu dihlou tah-a nabol lou dingu ahi.

³⁴Amavang gamdang mi nangho toh chengkhoma chu nangho-a dinga nalah uva peng tobang hiding, nangho naki ngailut banguva nangailut dingu ahi: ajehchu nangho jong Egypt gama gamdang mi nana hiu ahi: keima Pakai na-Pathen'u chu kahi.

³⁵ Nanghon thutanna lam, asaotena ahin, agih tena ahin, ahiloule asan tena hijongle chonphat louna nabol lou dingu ahi.

³⁶Khaikot dih, gihtum dih, Ephah dih, chule hin dih nanei diu ahi: keima Egypt gama kona nahin puidoh uva Pakai na Pathen'u kahi.

³⁷Hijeh-a chu nanghon kachondan ho le kathutan jouse najuidiu, chule naboldiu ahi: keima Pakai chu kahi.